الماتى قالاسىنا كەلۋشى تۋريستەر اعىنى ارتقان. ۇلتتىق ستاتيستيكا بيۋروسىنىڭ مالىمەتى بويىنشا، 2023 جىلى الماتىعا تۋريستەردىڭ جالپى سانى 2 038 417 ادامدى قۇرادى، بۇل 2022 جىلمەن سالىستىرعاندا 12,6%-عا جانە 2019 جىلعى پاندەميا الدىنداعى دەڭگەيدەن 52,7%-عا ارتىق.
شەتەلدىك تۋريستەر سانىنىڭ 2022 جىلمەن سالىستىرعاندا ءوسىمى 29,5%-دى قۇرادى، ياعني، 540 744 ادام شاھاردىڭ تىنىس-تىرشىلىگىمەن تانىسۋعا كەلگەن. بۇل كورسەتكىش الماتىنى قازاقستاننىڭ باسقا قالالارى اراسىندا تۋريستىك الەۋەتى جاعىنان كوشباسشى ەكەنىن ايقىندادى. 2019 جىلمەن سالىستىرعاندا قالاداعى شەتەلدىك تۋريستەر سانى 24,1%-عا ءوستى.
تۋريزم سالاسىندا جۇمىسپەن قامتىلعاندار سانى 10,4%-عا ءوسىپ، 80 983 ادامدى نەمەسە الماتى قالاسىنىڭ جالپى جۇمىس ىستەيتىن حالقىنىڭ 7,7%-ىن قۇرادى. تۋريزم سالاسىنا ينۆەستيتسيانىڭ 47,7%-عا ءوسىمى 106,4 ملرد. تەڭگەگە جەتتى، بۇل نەگىزگى كاپيتالعا سالىنعان ينۆەستيتسيانىڭ جالپى كولەمىنىڭ 6%-ى.
وتكەن جىلى الماتى قالاسىنىڭ تۋريزم سەكتورىنداعى سالىق تۇسىمدەرى 64%-عا ءوسىپ، 71,7 ملرد. تەڭگەنى قۇراسا، جەرگىلىكتى بيۋدجەتتىڭ جالپى سالىقتىق تۇسىمدەرىندەگى ۇلەسى 5%-عا جەتتى.
قالالىق تۋريزم باسقارماسىنىڭ مالىمەتىنشە، كورسەتكىشتەردىڭ ءوسۋى الماتىنىڭ تۋريستىك باعىت رەتىندە تارتىمدىلىعىنىڭ ارتقانىن كورسەتەدى. ءوز كەزەگىندە تۋريستىك قىزمەتتەر مەن ينفراقۇرىلىمعا سۇرانىستىڭ ارتۋى تۋريزم سالاسىنا ينۆەستورلار تارتۋ ءۇشىن، جاڭا جۇمىس ورىندارىن قۇرۋ جانە ساپالى قىزمەت كورسەتۋدى ءۇشىن جاقسى كورسەتكىش.
2023 جىلى ءتۋريزمدى دامىتۋعا جەرگىلىكتى بيۋدجەتتەن 2,1 ملرد تەڭگە ءبولىندى. بۇل رەتتە جۇمسالعان 1 تەڭگە سالىق تۇرىندە بيۋدجەتكە 34,14 تەڭگە كولەمىندە قايتارىلدى، بۇل تۋريزم سالاسىنىڭ قالا ەكونوميكاسىنا قوسقان وڭ ۇلەسى مەن تيىمدىلىگىن كورسەتەدى.
سوڭعى 5 جىلدا الماتىدا 1345 ءنومىرى بار 12 قوناقۇي اشىلدى، ونىڭ ىشىندە جەلىلىك قوناقۇيلەر دە بار (Hilton, Accor جانە InterContinental). 2027 جىلى بولمەلەر سانىن 1,5 ەسە ۇلعايتىپ، 17 مىڭ بولمەگە جەتكىزۋ جوسپارلانۋدا. اعىمداعى جىلدىڭ ماۋسىم ايىندا الماتى حالىقارالىق اۋەجايىندا ەكى ەسە كوپ كەلۋشىلەردى (14 ملن ادامعا دەيىن) قابىلداۋعا مۇمكىندىك بەرەتىن جاڭا جولاۋشىلار تەرمينالىن ىسكە قوسۋ كۇتىلۋدە.
