ەرمۇحامەد ەرتىسباەۆ: مينيستر ايماعامبەتوۆ كەشىرىم سۇراي سالۋى كەرەك ەدى

7558
Adyrna.kz Telegram

ۇزاق جىل ەلباسىنىڭ ساياسي ماسەلەلەر جونىندەگى كەڭەسشىسى بولعان ەرمۇحامەد ەرتىسباەۆ «نەكۋرىلتاي» يۋتۋب ارناسىنا  بەرگەن سۇحباتىندا ءبىلىم جانە عىلىم ءمينيسترى اسحات ايماعامبەتوۆكە وڭايعا سوقپاي وتىرعانىن ايتتى.

 

–ويتكەنى ساپاسىز  ءبىلىم ارقىلى ديپلوم ساتۋمەن اينالىسىپ وتىرعان جەكەمەنشىك ۋنيۆەرسيتەتتەر تاراپىنان وعان قاتتى قارسىلىق بارى بايقالادى. مەنىڭ ويىمشا، ءالى قىرىققا جەتپەگەن مۇنداي مىقتى، ءبىلىمدى ءمينيسترى ورنىندا قالدىرۋ كەرەك.

 

بىراق ديسسەرتاتسياسىنا قاتىستى ايتىلعان پىكىرگە كەلەر بولساق. ارينە، ءبىر نۇسقا بار: ول – سوتقا بەرۋ. ال ەكىنشى نۇسقا،  قازىرگىدەي پاندەميا جايلاعان اۋىر كەزەڭدە جۇمىس ىستەۋ بارىنەن دە ماڭىزدى دەيتىن بولساق، ونىڭ ورنىندا قالۋ، قالماۋىن تەك قانا پرەزيەنت شەشەدى. ارينە ادالدىق، شىنايىلىق قۋاتتى قارۋ بولىپ ەسەپتەلەدى. ال ايماعامبەتوۆتىڭ بەلسەندى جۇمىس ىستەپ جاتقانى ماعان ۇنايدى. سوندىقتان ونىڭ جۇمىسىن ودان ارى جالعاستىرعانىن قالار ەدىم.

ال ديسسەرتاتسياعا كەلەر بولساق، مينيستر «مەن كەيبىر قاتەلەردى تۇزەگەنىم راس، سول ءۇشىن كەشىرىم سۇرايمىن» دەپ ايتۋى كەرەك ەدى. مۇنداي جاعدايدا كونفليكت تە بىردەن، دەر كەزىندە شەشىلەدى. ەتيكالىق تۇرعىدان مۇنداي مادەنيەتتى دە ەنگىزۋ كەرەك دەپ ويلايمىن، – دەدى تۇڭعىش پرەزيدەنتتىڭ بۇرىنعى كەڭەسشىسى.

ساتپاەۆتاعى وقيعاعا قاتىستى  دا ءوز پىكىرىن بىلدىرگەن ەرتىسباەۆ  قۇقىق قورعاۋ ورگاندارىنىڭ ارەكەتىن وڭ باعالادى.

–مۇنداي وقيعا ورىن العان كەزدە بارلىق كارتينانى جەرگىلىكتى بيلىك اشىپ كورسەتۋى ءتيىس. ال پەدوفيل بۇرىن ەسەپتە تۇرعان. اشۋلانعان حالىق قىلمىسكەر تۇرعان ۇيگە باسا كوكتەپ كىردى. ال ول كەزدە كىشكەنتاي قىز ديۆاننىڭ استىندا بايلاۋلى جاتتى. ال پوليتسيا ءسابيدى ارتىنان تاۋىپ الدى. قىلمىسكەردى حالىققا بىلدىرمەي الىپ كەتتى. بۇل جەردە پوليتسيا كاسىبيلىكتىڭ جوعارى دەڭگەيىن كورسەتتى، ءوز مىندەتىن ادال اتقاردى دەپ ويلايمىن. كوز الدىڭىزعا ەلەستەتىپ كورىڭىزشى، ححI عاسىردا 2020 جىلى اشۋلانعان توپ قىلمىسكەردى كوپتىڭ كوزىنشە اياماي تەۋىپ، بىلگەنىن ىستەپ جاتسا... بۇل جاعداي قاندى قىلمىسقا ۇلاسار ەدى.  پوليتسيا قىلمىسكەردى ساقتاپ قالدى جانە قۇقىقتىق تۇرعىدان دۇرىس ىستەدى. ەندى پەدوفيل جازاسىن الادى. سوندىقتان مەن بۇل جەردە  ساتپاەۆ قالاسى قۇقىق قورعاۋ  ورگاندارىنىڭ ارەكەتىنە  5 دەگەن باعا قويار ەدىم.

ال پەدوفيلگە ءولىم جازاسىن تاعايىنداۋ بۇل ءمانسىز، ماعىناسىز نارسە، ءبىز زاڭدى ىزگىلەندىرۋ تۋرالى حالىقارالىق كەلىسىمدەرگە قول قويدىق. ءولىم جازاسى قازىر تەك قانا بەلارۋسسيادا بار. بۇل – لۋكاشەنكونىڭ تاڭداۋى... ال ءولىم جازاسىن تاعايىنداۋ نەمەسە ءومىر بويى باس بوستاندىعىنان ايىرۋ بۇل ەڭ اۋىر جازا دەپ ەسەپتەيمىن، – دەيدى ەرتىسباەۆ.

ەكس-كەڭەسشى ەرتىسباەۆ سونداي-اق قوعامدا كوپ ءسوز بولعان ۇكىمەتتىڭ وتستاۆكاعا كەتۋ ماسەلەسىنە قاتىستى دا ءوز كوزقاراسىن ايتا كەتتى. ول «پارلامەنتتىك سايلاۋدان كەيىن عانا ۇكىمەت اۋىسۋى كەرەك» دەگەن ويدا.

–قازىر ماڭىزدىسى، ۇكىمەتتى اۋىستىرۋ ەمەس، بۇگىنگىدەي قيىن ۋاقىتتا پروتسەدۋرا قالاي وتەدى، قالاي جۇزەگە اسىرىلادى، سول ماڭىزدى. سوندىقتان ءماميننىڭ ورنىنا بازبىرەۋلەر ايتىپ جۇرگەندەي، ۇلتتىق بانكتىڭ توراعاسى دوساەۆ كەلىپ نەمەسە تاعى ءبىر-ەكى ءمينيستردى اۋىستىرىپ، كوسمەتيكالىق وزگەرىس جاساۋدىڭ قاجەتى شامالى. ونى جاساپ تا كەرەگى جوق. جاڭا ۇكىمەت ءبارىبىر ەسكى ۇكىمەت بولىپ شىعادى. سىن ونسىز دا كوبەيەدى. حالىقتىڭ نارازىلىعىن تۋعىزادى.  ەڭ دۇرىسى – الداعى پارلامەنتتىك سايلاۋدى كۇتۋ، – دەيدى ەرمۇحامەد ەرتىسباەۆ.

ەرتىسباەۆ سونىمەن قاتار، «سەناتورلاردى 6 جىلعا ەمەس، ءبىر نەمەسە ەكى جىلعا عانا سايلاۋ كەرەكتىگىن» ايتادى.

–15 جىلدان بەرى پارلامەنتتە وتىرعان سەناتوردى بىلەمىن. تۇك تە ىستەگەن جوق. ال ءبىر-ەكى جىلعا عانا سايلانسا، حالىقتىڭ الدىندا ءوزى ءۇشىن بەلسەندى جۇمىس ىستەر ەدى، –دەيدى  ەكس-كەڭەسشى ەرمۇحامەد ەرتىسباەۆ.

ەركىن قالدان،

«ادىرنا» ۇلتتىق پورتالى

پىكىرلەر