الماتى وبلىسىنىڭ الاتاۋ قالاسىندا 46 جىل بويى جەكە كۋالىكسىز جانە جەكە سايكەستەندىرۋ ءنومىرىنسىز (جسن) ءومىر سۇرگەن ايەل انىقتالدى. ونىڭ قۇجاتتارىن راسىمدەۋگە پروكۋراتۋرا كومەكتەستى، دەپ حابارلايدى “ادىرنا”.
الماتى وبلىسى پروكۋراتۋراسىنىڭ حابارلاۋىنشا، ايەل 1980 جىلى دۇنيەگە كەلگەن. الايدا اناسى ونىڭ تۋ تۋرالى دەرەكتەرىن ازاماتتىق حال اكتىلەرىن تىركەۋ ورگاندارىنا ەنگىزبەگەن. سونىڭ سالدارىنان ايەل وسى ۋاقىتقا دەيىن جەكە باسىن كۋالاندىراتىن قۇجاتسىز ءومىر سۇرگەن.
ماسەلەنى شەشۋ وڭاي بولماعان. ايەلدىڭ تۋعان كەزەڭىنە قاتىستى مەديتسينالىق مۇراعات قۇجاتتارى ساقتاۋ مەرزىمىنىڭ اياقتالۋىنا بايلانىستى جويىلعان. سوندىقتان ونىڭ تۋ فاكتىسىن انىقتاۋ ءۇشىن سوتقا جۇگىنۋ قاجەت بولعان.
الايدا جسن-ءى بولماعاندىقتان، ايەلدىڭ ءوزى سوتقا ارىز بەرە الماعان. بۇعان دەيىن اپكەسى بۇل ماسەلەنى شەشۋگە ارەكەتتەنگەنىمەن، ونىڭ ءوتىنىشى قاناعاتتاندىرىلماعان.
وسىدان كەيىن الاتاۋ قالاسىنىڭ پروكۋراتۋراسى ايەلدىڭ قۇقىقتارىن قورعاۋ ماقساتىندا سوتقا تالاپ ارىز ءتۇسىردى. پروكۋرورلار ونىڭ تۋ فاكتىسىن زاڭدى تۇردە انىقتاۋدى سۇراعان.
سوت پروكۋراتۋرانىڭ تالابىن قاناعاتتاندىردى. ەندى ايەل جەكە قۇجاتتارىن راسىمدەپ، مەديتسينالىق قىزمەت الا الادى. سونىمەن قاتار رەسمي جۇمىسقا ورنالاسۋعا جانە مەملەكەت تاراپىنان كورسەتىلەتىن الەۋمەتتىك قولداۋدى پايدالانۋعا مۇمكىندىك الدى.
