«تەاتر – سىمباتتى ونەردىڭ ىشىندەگى ەڭ زور ونەردىڭ ءبىرى»، – دەيدى مۇحتار اۋەزوۆ. تەاتر – كوركەمدىك-يدەيالىق باعىتى ءبىر، ويى ساباقتاس بىرنەشە ونەردىڭ باسىن ءبىر جەردە توقايلاستىراتىن سينتەزدىك ونەر. ال، وسى ونەردىڭ باستاۋىندا قاشاندا رەجيسسەر تۇرادى.
رەجيسسەردىڭ مىندەتى – ءار اكتەردىڭ امپلۋاسىن ءدال انىقتاپ، قويىلىمنىڭ ارحيتەكتونيكاسىن بيىك دەڭگەيدە جاساي الۋ. سونداي-اق، باقىت نۇرپەيىس «رەجيسسەر جەكەلەگەن سپەكتاكلدەردى قويۋمەن عانا اينالىسپايدى، سونىمەن قاتار يدەيالىق-ەستەتيكالىق ماقسات-مۇددەلەرى ءبىر ارنادا توعىساتىن ادامداردىڭ باسىن بىرىكتىرىپ، تۇتاس تەاتر ۇجىمىنىڭ قالىپتاسۋىنا ۇيىتقى بولادى جانە ول – رەپەرتۋار باعدارلاماسىن ءتۇزىپ، جەكە شىعارماشىلىق ادىستەمەلەردى ويلاستىراتىن دارا تۇلعا»، – دەيدى.
«ستانيسلاۆسكي جۇيەسىنىڭ» قازاق تەاتر ونەرىنىڭ قالىپتاسۋى مەن دامۋىنا ىقپالى زور بولعانى بەلگىلى. وتكەن عاسىردىڭ 20-جىلدارىنان باستاۋ العان قازاق تەاتر ونەرى الەمدىك ارەناعا دا شىعا باستادى. بۇل – ۇلكەن جەتىستىك. دەگەنمەن دە، قازىرگى قازاق تەاترىنا كوركەمدىك-ەستەتيكالىق ىزدەنىستەر مەن يدەيالىق توڭكەرىستەردەن باستاپ تەحنيكالىق جاڭالىققا، كورەرمەنمەن بايلانىسقا ءتۇسۋدىڭ جاڭا تۇرلەرى قاجەت ەكەنى بايقالادى.
زاماناۋي الەمدىك تەاتر پروتسەسسىندەگى بۇتىندەي تەاتر ونەرىندەگى وزگەرىستەرگە ىلەسۋ ءۇشىن، ەڭ الدىمەن، ەلىمىزدەگى ساحنالىق شىعارماشىلىقتىڭ تەورياسى مەن مەتودولوگياسىن مودەرنيزاتسيالاۋ كەرەك دەگەن ويدامىن.
حالىقتىڭ ءداستۇرلى وي ساناسىمەن تەرەڭ بايلانىس نەگىزىندە ۇلتتىق تەاتر ونەرىنىڭ كوكجيەگىن كەڭەيتۋ، جاڭا سەرپىلىس ىزدەۋ جولىندا جۇمات شانين، شاكەن ايمانوۆ، اسقار توقپانوۆ، نۇرمۇقان ءجانتورين، ءازىربايجان مامبەتوۆ، رايىمبەك سەيىتمەتوۆ، ەسمۇقان وباەۆتاردان باستاپ، نۇرقانات جاقىپباي، جانات قاجيەۆ، اۋباكىر راقىموۆ، سونداي-اق، سوڭعى ونجىلدىقتا قازاق تەاتر ونەرىن بيىككە كوتەرىپ جۇرگەن اسحات ماەميروۆ سياقتى رەجيسسەرلاردى جانە اكتەرلاردى زەرتتەگەن ءجون. تۇتاس زەرتتەۋلەر نەگىزىندە «قازاق ۇلتتىق تەاتر ونەرى جۇيەسى» دەگەن ۇعىمدى دا قالىپتاستىرۋعا مۇمكىندىك بولادى.
تەاتر – تاربيە ورداسى. ويدى وياتىپ، قيالدى قاناتتاندىراتىن قويىلىمدار كوپ بولعاي!
قۋانىش جۇمابەكۇلى
PhD دوكتورى،
«قازاقستاننىڭ 100 جاڭا ەسىمى» جوباسىنىڭ جەڭىمپازى
