سوڭعى كۇندەرى «قازاقشا اقپارات الۋ - قۇقىعىمىز» دەپ ۇرانداتقان «QazaqshaJaz»بەيبىت قوزعالىسى الەۋمەتتىك جەلىلەردەگى تانىمال كومپانيالار مەن برەندتەردىڭ پاراقشالارىن ءدۇر سىلكىندىردى.
قوزعالىستىڭ نەگىزگى ماقساتى - جەلىدە قازاقشا اقپارات بەرۋدى تالاپ ەتۋ. وكىنىشكە وراي، قىزمەت كورسەتۋ ورىندارىنىڭ كوپشىلىگى الەۋمەتتىك جەلىلەردەگى پاراقشالارىن تەك ورىس تىلىندە جۇرگىزەدى. دەسە دە، قر ءتىل تۋرالى زاڭىنىڭ 1-تاراۋ، 21-بابىندا «بلانكiلەر، ماڭدايشالار، حابارلاندىرۋلار، جارنامالار، پرەيسكۋرانتتار، باعا كورسەتكiشتەرi, باسقا دا كورنەكi اقپارات مەملەكەتتiك تiلدە جانە ورىس تiلiندە، ال قاجەت بولعان جاعدايدا باسقا دا تiلدەردە جازىلادى» دەپ كورسەتىلگەن.
«ادىرنا» ۇلتتىق پورتالى ۇيىمداستىرۋشىلارمەن اڭگىمەلەسءىپ، قوزعالىستى باستاۋعا نە تۇرتكى بولعانىن سۇرادى.
بيزنەس الەمى ءالى كۇنگە دەيىن قازاقتىلدى تۇتىنۋشىنى مەنسىنبەي كەلەدى
ءدال وسى وي قازاق ءتىلىنىڭ مارتەبەسىنە الاڭدايتىن كەز كەلگەن ادامنىڭ كوكەيىندە ءجۇردى. ءبىزدىڭ قوعامدا تانىمال برەندتەردىڭ پاراقشالارىنا «نەگە وسى اقپاراتتى قازاق تىلىندە دە جازبايسىزدار؟» دەگەن پىكىر قالدىرىپ، ءوز قۇقىقتارىن تالاپ ەتىپ جۇرگەن ادامدار كوپ. دەمەك، يدەيا اسپاننان تۇسكەن جوق. ال ءبىز بۇل ويدى جۇيەلى تۇردە ءبىر توپقا بىرىكتىردىك. ەندىگى ۋاقىتتا بولەك-بولەك ەمەس، جۇمىلا وتىرا قۇقىعىمىزدى تالاپ ەتۋ ءۇشىن «QazaqshaJaz» قوزعالىسىن ۇيىمداستاردىق. شىنى كەرەك، بارلىعىمىز سول ءىرى كومپانيالاردىڭ ونىمدەرىن تۇتىنامىز: سامسۋنگتىڭ گادجەتتەرىن پايدالانامىز، Glovo-دان تاماققا تاپسىرىس بەرەمىز. ستاتيستيكاعا سۇيەتىن بولساق، ولاردىڭ تۇتىنۋشىلارىنىڭ جارتىسىنان كوبى - قازاقتىلدى ادامدار. الايدا ءبىزدىڭ كورپوراتيۆتى الەمدە، جالپى بيزنەس الەمىندە قازاقتىلدى تۇتىنۋشىنى ءالى كۇنگە دەيىن مەنسىنبەۋ، ولارعا باسا نازار اۋدارماۋ يدەياسى بار. دەسە دە، ۋاقىت ەلىمىزدە قازاقشا سويلەيتىن ادامداردىڭ باسىم كوپشىلىككە يە بولعانىن كورسەتتى. وسىعان بايلانىستى، بيزنەس تە قازاقشا سويلەيتىن ادامداردىڭ سۇرانىستارىنا قاراي جايمەندەپ بەيىمدەلۋ ۇستىندە. ءبىز سول شەشىم قابىلداۋ پروتسەسىن جىلدامداتۋ ءۇشىن تۇتىنۋشى تالابىمىزدى پىكىر رەتىندە رەسمي اككاۋنتتاردا قالدىرىپ جاتىرمىز.
ءبىزدىڭ قوعام قازاقتىلدى اقپاراتقا اش!
«QazaqshaJaz» قوزعالىسقا كەزدەيسوق اينالىپ كەتتى. ءبىز و باستا
100-200 ادام بولادى دەپ ويلادىق، بىراق قازىر ولاردىڭ سانى 1600-گە جەتتى. بۇل قوعامداعى ادامداردىڭ قازاق تىلىندەگى اقپاراتقا اش وتىرعانىن كورسەتتى.
QazaqshaJaz - مادەنيەتتى قوزعالىس
قوزعالىستىڭ ماقساتى - مادەنيەتتى ءتۇردى قازاقشا اقپاراتتى تالاپ ەتۋ. ءبىز «تەك قانا قازاقشا جازىڭىزدار» دەپ ەمەس، «قازاقشا دا قوسىپ جازىڭىزدار»، «ءبىز سىزدەردىڭ ونىمدەرىڭىز تۋرالى اقپاراتتى قازاق تىلىندە دە العىمىز كەلەدى» دەپ سىپايى تۇردە پىكىر قالدىرىپ ءجۇرمىز.
«QazaqshaJaz» سوڭعى ءۇش كۇندە KFC, Glovo, Chokofood, سامسۋنگ، تەحنودوم سىندى ءىرى كومپانيالاردى ءوز نىساناسىنا الدى. قازىرگى تاڭدا بۇل كومپانيالار قوزعالىستىڭ تالاپتارىن ەسكەرىپ، الەۋمەتتىك جەلىلەردەگى جازبالارىن قازاق تىلىندە دە جۇرگىزە باستادى.
«ادىرنا» ۇلتتىق پورتالى ءتىل جاناشىرلارىنىڭ باستامالارىنا ساتتىلىك تىلەيدى. ءتىلىمىزدىڭ مارتەبەسى بيىكتەي بەرسىن!
ديانا اسانوۆا “ادىرنا” ۇلتتىق پورتالى
