Sońǵy kúnderi «Qazaqsha aqparat alý - quqyǵymyz» dep urandatqan «QazaqshaJaz»beıbit qozǵalysy áleýmettik jelilerdegi tanymal kompanııalar men brendterdiń paraqshalaryn dúr silkindirdi.
Qozǵalystyń negizgi maqsaty - jelide qazaqsha aqparat berýdi talap etý. Ókinishke oraı, qyzmet kórsetý oryndarynyń kópshiligi áleýmettik jelilerdegi paraqshalaryn tek orys tilinde júrgizedi. Dese de, QR til týraly zańynyń 1-taraý, 21-babynda «Blankiler, mańdaıshalar, habarlandyrýlar, jarnamalar, preıskýranttar, baǵa kórsetkishteri, basqa da kórneki aqparat memlekettik tilde jáne orys tilinde, al qajet bolǵan jaǵdaıda basqa da tilderde jazylady» dep kórsetilgen.
«Adyrna» ulttyq portaly uıymdastyrýshylarmen áńgimelesip, qozǵalysty bastaýǵa ne túrtki bolǵanyn surady.
Bıznes álemi áli kúnge deıin qazaqtildi tutynýshyny mensinbeı keledi
Dál osy oı qazaq tiliniń mártebesine alańdaıtyn kez kelgen adamnyń kókeıinde júrdi. Bizdiń qoǵamda tanymal brendterdiń paraqshalaryna «Nege osy aqparatty qazaq tilinde de jazbaısyzdar?» degen pikir qaldyryp, óz quqyqtaryn talap etip júrgen adamdar kóp. Demek, ıdeıa aspannan túsken joq. Al biz bul oıdy júıeli túrde bir topqa biriktirdik. Endigi ýaqytta bólek-bólek emes, jumyla otyra quqyǵymyzdy talap etý úshin «QazaqshaJaz» qozǵalysyn uıymdastardyq. Shyny kerek, barlyǵymyz sol iri kompanııalardyń ónimderin tutynamyz: Samsýngtyń gadjetterin paıdalanamyz, Glovo-dan tamaqqa tapsyrys beremiz. Statıstıkaǵa súıetin bolsaq, olardyń tutynýshylarynyń jartysynan kóbi - qazaqtildi adamdar. Alaıda bizdiń korporatıvti álemde, jalpy bıznes áleminde qazaqtildi tutynýshyny áli kúnge deıin mensinbeý, olarǵa basa nazar aýdarmaý ıdeıasy bar. Dese de, ýaqyt elimizde qazaqsha sóıleıtin adamdardyń basym kópshilikke ıe bolǵanyn kórsetti. Osyǵan baılanysty, bıznes te qazaqsha sóıleıtin adamdardyń suranystaryna qaraı jaımendep beıimdelý ústinde. Biz sol sheshim qabyldaý proesin jyldamdatý úshin tutynýshy talabymyzdy pikir retinde resmı akkaýnttarda qaldyryp jatyrmyz.
Bizdiń qoǵam qazaqtildi aqparatqa ash!
«QazaqshaJaz» qozǵalysqa kezdeısoq aınalyp ketti. Biz o basta
100-200 adam bolady dep oıladyq, biraq qazir olardyń sany 1600-ge jetti. Bul qoǵamdaǵy adamdardyń qazaq tilindegi aqparatqa ash otyrǵanyn kórsetti.
QazaqshaJaz - mádenıetti qozǵalys
Qozǵalystyń maqsaty - mádenıetti túrdi qazaqsha aqparatty talap etý. Biz «Tek qana qazaqsha jazyńyzdar» dep emes, «Qazaqsha da qosyp jazyńyzdar», «Biz sizderdiń ónimderińiz týraly aqparatty qazaq tilinde de alǵymyz keledi» dep sypaıy túrde pikir qaldyryp júrmiz.
«QazaqshaJaz» sońǵy úsh kúnde KFC, Glovo, Chokofood, Samsýng, Tehnodom syndy iri kompanııalardy óz nysanasyna aldy. Qazirgi tańda bul kompanııalar qozǵalystyń talaptaryn eskerip, áleýmettik jelilerdegi jazbalaryn qazaq tilinde de júrgize bastady.
«Adyrna» ulttyq portaly til janashyrlarynyń bastamalaryna sáttilik tileıdi. Tilimizdiń mártebesi bıikteı bersin!
Dıana ASANOVA “Adyrna” ulttyq portaly
