شىمكەنت قالاسىندا كارانتين كەزىندەگى شەكتەۋ شارالارىنىڭ ەنگىزىلۋىنە بايلانىستى تابىسىنان ايىرىلعان 100 504 ازاماتقا شىلدە ايىنا 42 500 تەڭگە مولشەرىندە بىرجولعى تولەم بەرىلدى. قالا بويىنشا 105 821 تۇرعىننان ءوتىنىش كەلىپ تۇسكەن. بۇل تۋرالى قالالىق جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ج.ۋتەباەۆا اقپاراتتىق-كوممۋنيكاتسيالىق ورتالىعىندا وتكەن بريفينگتە ءمالىم ەتتى.
الەۋمەتتىك تولەمدى كىمدەر جانە قالاي الۋعا بولاتىنى تۋرالى ءتۇسىندىرىپ وتكەن سالا مامانى بۇگىنگى تاڭدا ءوتىنىش بەرۋ جەڭىلدەپ، تولەم الۋ ءتارتىبى وزگەرگەنىن ايتتى.
«وتىنىمدەردى egov.kz – ۆەب-پورتالى، 42500.enbek.kz پورتالى، telegram-bot-تار، Aitu مەسسەندجەرىندەگى 42500.enbek.kz قوسىمشاسى جانە دە ەكىنشى دەڭگەيدەگى بانكتەردىڭ ءموبيلدى قوسىمشالارى مەن ينتەرنەت-رەسۋرستارى ارقىلى بەرۋگە بولادى. بىرجولعى تولەم جالاقىسى ساقتالمايتىن دەمالىستا جۇرگەن قىزمەتكەرلەرگە، جەكە كاسىپكەرلەرگە، جەكە پراكتيكامەن اينالىساتىن ادامدارعا، نىساناسى جۇمىستاردى ورىنداۋ (قىزمەتتەر كورسەتۋ) بولىپ تابىلاتىن ازاماتتىق-قۇقىقتىق سيپاتتاعى شارتتار بويىنشا تابىس تاباتىن جەكە تۇلعالارعا، بىرىڭعاي جيىنتىق تولەمدى تولەۋشىلەر بولىپ تابىلاتىن جەكە تۇلعالارعا بەرىلەتىن بولادى»،-دەدى ج.ۋتەباەۆا.
سونىمەن بىرگە، جالدامالى جۇمىسشى، جەكە كاسىپكەرلەر، سونىڭ ىشىندە بجت-نى تۇراقتى تولەۋشىلەر (اي سايىن) بولىپ تابىلاتىن مۇگەدەكتەر، ستۋدەنتتەر، ەگەر ولار شەكتەۋلەرگە بايلانىستى تابىستارىنان ايرىلسا، بىرجولعى تولەم الۋعا قۇقىلى.
ايتا كەتەيىك، وتىنىشتەر 2020 جىلدىڭ 1 قىركۇيەگىنە دەيىن قابىلدانادى. تولەم شىلدە ايىنا عانا تولەنەدى.
شىمكەنت
