حاباروۆسك ولكەسىنىڭ گۋبەرناتورىنىڭ مىندەتىن اتقارۋشى ميحايل دەگتيارەۆ ۆۆس-گە ەكس-گۋبەرناتور سەرگەي فۋرگالدىڭ تۇتقىندالۋىنا بايلانىستى ەكى اپتا بويى ميتينگىگە شىققاندارمەن كەزدەسەسىز بە دەگەن سۇراققا جاۋاپ بەردى. دەگتيارەۆ «تەرەزە الدىندا ايقايلاۋشىلارعا» بارۋدىڭ ورنىنا ودان دا ماڭىزدى جۇمىستارى بار ەكەنىن ايتتى. بۇل تۋرالى "ادىرنا" "بي-بي-سي"-گە سىلتەمە جاساپ حابارلايدى.
حاباروۆسكىدەگى نارازىلىق 11 شىلدەدە باستالىپ، وسى كۇنگە دەيىن جالعاسۋدا. پۋتين حاباروۆسك گۋبەرناتورىنىڭ مىندەتىن اتقارۋشى قىلىپ تاعايىنداعان دەگتيارەۆتىڭ (فۋرگال سياقتى - ول دا ليبەرالدى-دەموكراتيالىق پارتياسىنىڭ مۇشەسى) كەلۋىنەن كەيىن نارازىلىق بىلدىرۋشىلەر ونىڭ ماسكەۋگە ورالۋىن تالاپ ەتە باستادى.
دەگتيارەۆ اكىمشىلىك عيماراتىنىڭ الدىنداعى ميتينگىشىلەرگە شىقپادى، دەگەنمەن ول ءوزىنىڭ كەڭسەسىنىڭ تەرەزەسىنەن نارازىلىق بىلدىرۋشىلەردىڭ ايقايلاپ جاتقانىن ەستيتىنىن ايتتى. دەگتيارەۆ جۇمىسقا بارار جولدا حاباروۆسك تۇرعىندارىمەن سويلەستى. ول جاياۋ ءجۇرىپ، ينستاگرامنان تىكەلەي ەفير تاراتتى.
جولدا تۇرعىندارعا ول «جۇمىس كوپ بولعاندىقتان» قىزمەتىنەن كەتپەيتىنىن ايتتى. الاڭداعى نارازىلىق بىلدىرۋشىلەر كوگەرشىندەردى تاماقتاندىرادى، سەبەبى، ولار الاڭعا قۇستارعا جەم بەرۋ سىلتاۋىمەن كەلەدى دەپ قالجىڭدادى.
«ولاردى كۇن سايىن نانمەن، شەمىشكەمەن قورەكتەندىرەدى. حاباروۆسك كوگەرشىندەرى - بۇكىل رەسەيدەگى ەڭ سەمىز جانە ەڭ باقىتتى كوگەرشىندەر»، - دەدى دەگتيارەۆ.
بەيسەنبىدە دەگتيارەۆ وبلىستىق اۋرۋحانانى تەكسەرۋگە بارىپ، حاباروۆسك ايماعىندا كوروناۆيرۋستىڭ اسەرىنەن كارانتين رەجيمىن كۇشەيتۋگە بولاتىنىن ەسكەرتتى. پروۆينتسياداعى اۋىرىپ جاتقانداردىڭ كوبەيگەنىن جانە «ادامدار ءوزارا قاشىقتىقتى ساقتامايدى» دەدى ول نارازىلىق اكتسيالارىن مەڭزەپ.
- جىگىتتەر، كەشكە حاباروۆسك وبلىسى ۇكىمەتىنىڭ تەرەزەسىنىڭ الدىنا جينالعانداردىڭ بارلىعىن ءوز كۇشتەرىن ەرىكتىلىككە جۇمىلدىرۋعا كەڭەس بەرەمىن، - دەدى گۋبەرناتوردىڭ مىندەتىن اتقارۋشى اۋرۋحاناعا بارعاننان كەيىن. جالعىزباستى ادامدارعا تاماق تاسىڭدار دەدى.
- ال، تەرەزە الدىندا ايقايلاۋدى دوعارىڭدار! بىرگە جۇمىس ىستەيىك، سوسىن كورەمىز. بىزدە 22 ميلليارد رۋبل تۇراتىن اياقتالماعان جوبالار بار. ال باسشىلارعا كوشەگە شىعىپ تەرەزە الدىندا ايقايلاۋشىلارمەن سويلەسۋدەن گورى اتقاراتىن ماڭىزدى جۇمىستار بار دەدى گۋبەرناتور مىندەتىن اتقارۋشى.
- ءسىز نارازى ادامدارمەن كەزدەسۋگە باراسىز با؟ - بي-بي-سي ءتىلشىسى دەگتيارەۆتەن تۇسىنىكتەمە بەرۋدى ءوتىندى.
- مەن شىقپايمىن! مەن ايتتىم عوي سىزگە، دۇرىس ادامدارعا ۇنەمى شىعامىن. مەن ادامدارمەن سويلەسەمىن، بىراق دۇرىس فورماتتا. دارىگەرلەرمەن، پاتسيەنتتەرمەن، مىسالى ... مىنە سىزبەن سويلەسىپ تۇرمىن. ال ەندى مىناۋ نە؟ بۇل ماعان دا، ورىستاردىڭ كوپشىلىگى داۋىس بەرگەن پرەزيدەنتكە دە قۇرمەتسىزدىك. ءبىرىنشى كەزەكتە وزىمە ەمەس. مۇنى ىستەيتىندەر، ولار وزدەرىن سىيلامايتىندار!
