الماتى وبلىسىندا ءدارى-دارمەكتى ازىق-تۇلىك دۇكەندەرى مەن پاتەرلەردە ساتقان ادامدار انىقتالدى، – دەپ حابارلايدى «ادىرنا» ۇلتتىق پورتالى Polisia.kz-كە سىلتەمە جاساپ.
الماتى وبلىسىنىڭ پوليتسيا دەپارتامەنتى مەملەكەت باسشىسىنىڭ، سونداي-اق ىشكى ىستەر مينيسترلىگى باسشىلىعىنىڭ تاپسىرمالارى اياسىندا ءدارى-دارمەكتەردى زاڭسىز ساۋدالاۋ دەرەكتەرىن انىقتاۋ بويىنشا ارنايى موبيلدىك توپتار قۇرىلعانىن ەسكە سالدى.
– پاندەميا كوپتەگەن ازاماتتارعا ىنتىماقتاستىق، اياۋشىلىق جانە ءوزارا كومەك سياقتى ۇعىمداردىڭ جات ەكەنىن كورسەتتى: ءبىر ساتتە بارلىعى فارماتسەۆت بولىپ، دارىحانالىق بيزنەستى جۇرگىزۋگە تىرىستى. وكىنىشكە وراي، جاسىرىن ءدارىحانالار ءتىپتى قيسىنعا كەلمەيتىن جەرلەردەن دە اشىلا باستادى: بازارداعى بۋتيكتەردە، ازىق-تۇلىك دۇكەندەرىندە، قاراپايىم پاتەرلەردە. ولار ليتسەنزياسىز ارەكەت ەتىپ، ءدارى-دارمەكتەردى رەتسەپتسىز بوساتتى. بۇنداي ارەكەتكە بارعان ادامدار ءبىر مەزەتتە بايىپ كەتۋ مۇمكىندىگىن پايدالانباق بولدى، ال ونىڭ سالدارى ولاردى ەش الاڭداتپادى. بۇل كەزەكتە جاسىرىن ساتىلاتىن دارىلىك زاتتاردىڭ شىعۋ تەگى دە كۇمان تۋدىرادى. ال بۇل ادامداردىڭ ءومىرى مەن دەنساۋلىعىنا تىكەلەي قاتىستى, – دەپ اتاپ ءوتتى الماتى وبلىسى پوليتسيا دەپارتامەنتى باستىعىنىڭ ورىنباسارى دانيار مەندەباەۆ.
تەك وسى ايدىڭ باسىنان بەرگى ۋاقىت ارالىعىندا وڭىردە فارماتسەۆتيكا سالاسىنداعى زاڭسىز كاسىپكەرلىكتىڭ 60-قا جۋىق دەرەگى انىقتالدى. زاڭسىز اينالىمنان اسا تاپشى پرەپاراتتاردىڭ مىڭداعان ورامى الىندى، ولاردىڭ قۇنىن “ىسكەر ازاماتتار” نارىقتاعىدان ءۇش ەسە جوعارى باعالاعان
– مىسالى، جەدەل-ىزدەستىرۋ ءىس-شارالارىن جۇرگىزۋ بارىسىندا ءدارى-دارمەكتەردى ازىق-تۇلىك دۇكەنىندە ءتيىستى قۇجاتتارسىز، قىمبات باعاعا ساۋدالاعان 1965 جىلعى ز. ەسىمدى ازاماتشا ۇستالدى. سونىمەن قاتار، ول بارلىق ءدارى-دارمەكتەردى رەتسەپتسىز، ءبىر-بىرتىندەپ ساتقان. ولاردىڭ قاتارىندا: “مۋكالتين”،” ۆاليدول”،” تسيترامون”،” انالگين”،” سترەپتوتسيد”،” ومەپرازول”،” تريحوپول”،” كەتونال فورتە”،” كاپتوپريل”،” سۋپراستين”،” مەزيم”،” رەنني”،” كورۆالول”،” ريمانتادين”،” انتيگريپپين”،” نافازولين”،” كولدفري “جانە ت.ب. جالپى سانى 170 دانا. ال ەكىنشى ءبىر جاعدايدا، بۇرىنعى مەدبيكە اۋدان ورتالىعىنداعى دارىحاناداعى ءدارى-دارمەكتەردى ساتىپ الىپ، اۋىلعا اكەلىپ، كەم دەگەندە ەكى ەسە قىمبات باعاعا ساتقان، – دەپ تۇيىندەدى دانيار مەندەباەۆ.
“ادىرنا” ۇلتتىق پورتالى
