ەلىمىزگە مىندەتتى الەۋمەتتىك مەديتسينالىق ساقتاندىرۋ جۇيەسى وسى جىلدىڭ قاڭتار ايىنان باستاپ ىسكە قوسىلدى. بىراق ازاماتتاردىڭ بارىنە ساقتاندىرۋ پاكەتىنە ەنگەن قىزمەتتەر ستاتۋسىنا قاراماستان كورسەتىلدى. «ادىرنا» ۇلتتىق پورتالىنىڭ وقىرماندارى شىلدە ايىنان باستاپ ەمحانالاردان مەديتسينالىق قىزمەت تۇرلەرىن پايدالا الماي جۇرگەندەرىن ايتىپ، شاعىمداندى.
«ءدال وسىنداي ءومىر مەن ءولىم ارپالىسقان شاقتا دەنساۋلىق ساقتاۋ سالاسىنىڭ مۇنىسى نەسى؟بۇعان دەيىن تىركەلگەن ەمحانالاردان الىپ جۇرگەن تەگىن پروتسەدۋرالار بويىنشا مەدساقتاندىرۋ تولەنبەگەن پاتسيەنتتەرگە كومپيۋتەردەن اۆتوماتتى تۇردە باس تارتاتىن باعدارلامانى قوسىپ ۇلگەرىپتى! ءيا، مۇنداي زاڭ قاڭتاردان بەرى بار. بىراق، ىسكە قوسىلماعان بولاتىن. مەن ءۇش ايدان بەرى وسى ەمحانادا قارالىپ ءجۇرمىن، بۇنداي بولعان جوق ەدى عوي دەسەم، 1-ءىنشى شىلدەدەن وسى باعدارلاما قوسىلدى دەيدى. كونستيتۋتسيامىزدا ءاربىر ازامات تەگىن مەديتسينالىق كومەك الۋعا قۇقىلى دەگەن باپ بار. كونستيتۋتسيا زاڭدىق كۇشى بويىنشا بارلىق زاڭنان جوعارى. ەندەشە، قر كونستيتۋتسياسىنا مەدساقتاندىرۋ تولەنبەگەن ازاماتتارعا تەگىن مەديتسينالىق كومەك كورسەتىلمەيدى دەگەن باپ ەنگىزىلسىن! ءدال وسىنداي، ءومىر مەن ءولىم ارپالىسقان، دەنساۋلىق ماسەلەسى ءبىرىنشى ورىنعا شىققان، ەل جۇمىسسىز، تابىسسىز تىعىرىققا تىرەلگەن شاقتا بۇل تالاپتى ىسكە قوسۋدىڭ ەشبىر ءجونى جوق!»،- دەدى فەيسبۋك جەلىسىن قولدانۋشى اقسۇڭقار اقىنبابا.
«ادىرنا» ۇلتتىق پورتالى بۇل ماسەلەنىڭ انىق-قانىعىنا جەتۋ ءۇشىن
«الەۋمەتتىك مەديتسينالىق ساقتاندىرۋ قورىنا» حابارلاستى.
تىلەۋحان ءابىلداەۆ, «الەۋمەتتىك مەديتسينالىق ساقتاندىرۋ قورى»الماتى قالالىق فيليالىنىڭ ديرەكتورى:
- مىندەتتى الەۋمەتتىك مەديتسينالىق ساقتاندىرۋ جۇيەسى 2017 جىلدىڭ شىلدەسىندە ىسكە قوسىلدى. جارنانى بيىلعى جىلعا دەيىن تەك جۇمىس بەرۋشىلەر تولەپ كەلدى. جۇيە 2020 جىلدىڭ 1قاڭتارىندا تولىققاندى كۇشىنە ەندى. بارلىق ساناتتار جارنا تولەۋگە مىندەتتەلدى. دەگەنمەن جىلدىڭ باستاپقى ءۇش ايى وتپەلى كەزەڭ بولىپ جاريالانىپ، كەيىن كارانتينگە بايلانىستى بۇل مەرزىم تاعى ءۇش ايعا ۇزارتىلدى. جالپىبۇل شارا ازاماتتاردىڭ ساقتاندىرۋ پاكەتىنىڭ ارتىقشىلىقتارىن سەزىنىپ، ولاردىڭ جۇيەگە قوسىلۋىنا مۇمكىندىك بەرۋ ماقساتىندا قولعا الىنعان بولاتىن. جەڭىلدىك مەرزىمى 1شىلدەدە اياقتالدى. التى ايدا ستاتۋسىن انىقتاپ، جۇيەگە قوسىلىپ ۇلگەرمەگەن ازاماتتار بارشىلىق. ولار ءمامس پاكەتىنە ەنگەن قىزمەتتەردى پايدالانۋ ءۇشىن وتكەن ايلاردىڭ جارناسىن تولەۋى ءتيىس. بىراق شۇعىل جاعدايلاردا بارلىق ازاماتتارعا ساقتاندىرىلسا دا، ساقتاندىرىلماسا دا كومەك كورسەتىلۋى ءتيىس. ياعني، اياق استى اۋىرىپ دارىگەر كومەگى قاجەت بولعان پاتسيەنتتەر بۇرىنعىشا جەدەل جاردەم شاقىرتىپ، ۋچاسكەلىك مامان كومەگىنە جۇگىنە الادى. وعان قوسا، الەۋمەتتىك ماڭىزى بار اۋرۋلار مەن سوزىلمالى سىرقاتتار دا كومەكتى تەگىن الا الادى.سونىمەن قاتار، ستاتۋس ماسەلەسى بويىنشا مەديتسينالىق ساقتاندىرۋ قورىنىڭ 1406 بايلانىس ورتالىعىنا حابارلاسۋعا بولادى. ورتالىق وپەراتورلارى ءارى قاراي ساۋالدى ءتيىستى فيليال ماماندارىنا جولدايدى.
نازارلارىڭىزعا الەۋمەتتىك مەديتسينالىق ساقتاندىرۋ قورىنا جارنا تولەمەيتىن ادامداردىڭ 14 ساناتىن ۇسىنامىز:
1) بالالار;
2) جۇمىسسىز رەتىندە تىركەلگەن ادامدار;
3) جۇمىس ىستەمەيتىن جۇكتى ايەلدەر;
4) بالا (بالالار) ءۇش جاسقا تولعانعا دەيىن ونى (ولاردى) ءىس جۇزىندە تاربيەلەپ وتىرعان جۇمىس ىستەمەيتىن ادامدار;
5) بالا (بالالاردى) تۋعا، جاڭا تۋعان بالانى (بالالاردى) اسىراپ الۋعا بايلانىستى، بالا (بالالار) ءۇش جاسقا تولعانعا دەيىن ونىڭ (ولاردىڭ) كۇتىمىنە بايلانىستى دەمالىستا جۇرگەن ادامدار;
6) 18 جاسقا دەيىنگى مۇگەدەك بالاعا كۇتىم جاسايتىن جۇمىس ىستەمەيتىن ادامدار;
7) زەينەتاقى الۋشىلار، ونىڭ ىشىندە ۇلى وتان سوعىسىنىڭ قاتىسۋشىلارى مەن مۇگەدەكتەرى;
8) قىلمىستىق-اتقارۋ (پەنيتەنتسيارلىق) جۇيەسى مەكەمەلەرىندە (قاۋىپسىزدىگى بارىنشا تومەن مەكەمەلەردى قوسپاعاندا) سوت ۇكىمى بويىنشا جازاسىن وتەپ جۇرگەن ادامدار;
9) تەرگەۋ يزولياتورلارىنداعى ادامدار;
10) جۇمىس ىستەمەيتىن ورالماندار (1 جىل بويى);
11) "التىن القا", "كۇمىس القا" القالارىمەن ناگرادتالعان نەمەسە بۇرىن "باتىر انا" اتاعىن العان، سونداي-اق ءى جانە ءىى دارەجەلى "انا داڭقى" وردەندەرىمەن ناگرادتالعان كوپ بالالى انالار;
12) مۇگەدەكتەر;
13) ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى ءبىلىم بەرۋ، سونداي-اق جوعارى وقۋ ورنىنان كەيىنگى ءبىلىم بەرۋ ۇيىمدارىندا كۇندىزگى وقۋ نىسانىندا ءبىلىم الىپ جاتقان ادامدار;
14) ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى ءبىلىم بەرۋ، سونداي-اق جوعارى وقۋ ورنىنان كەيىنگى ءبىلىم بەرۋ ۇيىمدارىندا كۇندىزگى وقۋ نىسانىندا وقۋدى اياقتاعان ايدان كەيىنگى كۇنتىزبەلىك ءۇش ايدىڭ ىشىندە وقۋىن اياقتاعان ادامدار.
ەگەر ءسىز جوعارىدا كورسەتىلگەن ساناتتاردىڭ ەشقايسىنا جاتپايتىن بولساڭىز، مىندەتتى تۇردە ءمامس جۇيەسىنە اي سايىن جارنا اۋدارۋىڭىز كەرەك.ەستەرىڭىزگە سالا كەتەيىك، 1 شىلدەدەن باستاپ جۇمىس بەرۋشىلەر مەن جۇمىسكەرلەر ايلىق جالاقىلارىنىڭ 2%-ىن ءمامس جۇيەسىنە اۋدارماعان جاعدايدامەديتسينالىق قىزمەت تۇرلەرىن تولىق پايدالانا المايدى.
قازىرگى تاڭدا كاسىپكەرلەردىڭ 15 ساناتى عانا 1 قازانعا دەيىن مەديتسينالىق ساقتاندىرۋ جارنالارى مەن اۋدارىمدارىنان بوساتىلدى.
ديانا اسانوۆا،
«ادىرنا» ۇلتتىق پورتالى
