بۇگىن شىمكەنت قالاسى اقپاراتتىق-كوممۋنيكاتسيالىق ورتالىعىندا قالاداعى ەپيدەميولوگيالىق جاعداي بويىنشا ونلاين بريفينگ ءوتىپ، شىمكەنت قالاسى دەنساۋلىق ساقتاۋ باسقارماسى باسشىسىنىڭ مىندەتىن اتقارۋشىسى تيمۋر ۆارزيلوۆ پەن رەسەيدەن كەلگەن جوعارى دارەجەلى رەانيماتولوگ دەنيس تسۆەتكوۆ قالاداعى ەپيدەميولوگيالىق احۋال توڭىرەگىندە باياندادى.
تيمۋر ءۆارزيلوۆتىىڭ مالىمدەۋىنشە، قازىردە شىمكەنتتە ەپيدەميولوگيالىق جاعداي تۇراقتى. ناۋقاستارعا قاجەتتى مەديتسينالىق كومەك بەرىلۋدە.
- شىمكەنت قالاسىندا 2020 جىلعى 20 شىلدە كۇنگى مالىمەت بويىنشا 4453 COVID-19 جاعدايى تىركەلگەن. وتكەن تاۋلىكتە 53 كوروناۆيرۋس جۇقتىرعان. جازىلىپ شىققان ناۋقاستار سانى - 2768. جالپى بۇگىنگى كۇنى قالا بويىنشا 3860 توسەك ورىن بار (650 - ينفەكتسيالىق توسەك، 3210 - پروۆيزورلىق توسەك), ونىڭ ىشىندە بوس توسەك-ورىندار سانى 1809 – (284 – ينفەكتسيالىق، 1525 – پروۆيزورلىق توسەك). اۋىر دارەجەدەگى ناۋقاستار ءۇشىن ينفەكتسيالىق ستاتسيونارلاردا 60 رەانيماتسيالىق توسەك-ورىن، پروۆيزورلىق ستاتسيونارلاردا 91 توسەك-ورىن بار. سونداي-اق قالاداعى ەمحانالاردا قوسىمشا 628 توسەك-ورىن كۇندىزگى ستاتسيونار ۇيىمداستىرىلعان. شىمكەنتتە 2020 جىلدىڭ 1 قاڭتار مەن 17 شىلدە ارالىعىندا پنەۆمونيانىڭ 11035 جاعدايى تىركەلىپ، ونىڭ ىشىندە 8944 ناۋقاس ەمدەلدى. بۇل رەتتە قالانىڭ مەديتسينالىق مەكەمەلەرىندە بۇگىنگى كۇنى 339 وكپەنى جاساندى جەلدەتۋ اپپاراتى (يۆل), 673 "بوبروۆ" تىنىس الۋ اپپاراتتارى قولدانىلادى. قوسىمشا 2 اۋرۋحانادا وتتەگى ستانتسياسىن ىسكە قوسۋ بويىنشا جۇمىستار جۇرگىزىلۋدە. ءبىر اي ىشىندە تاعى 3 اۋرۋحانا قوسىلادى. 2020 جىلعى 17 شىلدەدەگى جاعداي بويىنشا تەستتەر قورى – 12456, ءبىر كۇندىك 609 پتر (پولەمەرازدى تىزبەكتى رەاكتسيا) وتكىزىلگەن، - دەدى ت. ۆارزيلوۆ.
سونداي-اق بريفينگتە شىمكەنتكە ارنايى تاجىريبە الماسۋ ماقساتىندا كەلگەن جوعارى دارەجەلى رەانيماتولوگ د.تسۆەتكوۆ جەرگىلىكتى دارىگەرلەردىڭ كوروناۆيرۋسقا قارسى اتقارىپ جاتقان جۇمىستارىنا وڭ باعاسىن بەردى.
- بايقاعانىمىز، قازىرگى ۋاقىتتا جەرگىلىكتى دارىگەرلەر شتاتتى رەجيمدە جۇمىس ىستەپ، اۋرۋحاناعا تۇسكەن كەز كەلگەن ناۋقاسقا ساپالى مەديتسينالىق كومەك كورسەتۋدە. ناۋقاستاردىڭ ستانتسيونارعا كەلىپ تۇسكەن ۋاقىتىنان باستاپ، تولىق ەمدەۋ جۇمىستارىنىڭ جۇرگىزىلۋىن كورىپ شىقتىق. بۇل تۇرعىدا بارلىعى دۇرىس. شىمكەنت قالاسىنداعى اۋرۋحانالاردا ينتەنسيۆتى تەراپيانى قاجەت ەتەتىن اۋىر جاعدايداعى ناۋقاستار جانساقتاۋ بولىمىندە ەم الۋدا. بۇعان قوسا ولارعا رەسپيراتورلىق تەراپيا بويىنشا ەم جۇرگىزىلەدى ەكەن. بۇل وتە جاقسى. الەمدىك مەديتسينا دەڭگەيىندە قولدانىلىپ جاتقان ەمدەۋ تاسىلدەرىنىڭ ءبىرى جاساندى جەلدەتۋ مەن ينۆازيالىق جەلدەتۋ اپپاراتىن قولدانا وتىرىپ، اۋىر جاعدايداعى ناۋقاستى امان الىپ قالۋ. بۇل ءتاسىلدى جەرگىلىكتى ماماندار جاقسى مەڭگەرگەن. شىمكەنتتە ناۋقاستارعا كاسىپتىك مەديتسينا ماماندارىنىڭ كومەگى قولجەتىمدى. قالا تۇرعىندارىگنا ايتارىم، اۋرۋ باستالعان ساتتەن باستاپ، مەديتسينالىق كومەككە جۇگىنىڭىزدەر، - دەدى رەسەيلىك دارىگەر.
ايتا كەتسەك، رەسەيدەن كەلگەن مەديتسينا ماماندارى قالاداعى بىرنەشە مەديتسينا ۇيىمدارىن ارالاپ، ەمدەۋ تاكتيكاسى بويىنشا جەرگىلىكتى دارىگەرلەرمەن تاجىربيە الماسۋدا. جالپى شەت ەلدەن 7 مامان كەلگەن. ونىڭ 3-ەۋى رەانيماتولوگ-دارىگەر جانە 4 ينفەكتسيونيست.
بريفينگتە دەنساۋلىق ساقتاۋ باسقارماسى باسشىسىنىڭ مىندەتىن اتقارۋشىسى ت. ۆارزيلوۆ بۇگىنگى تاڭدا شىمكەنتتە ءدارى-دارمەك قورى جەتكىلىكتى ەكەنىن دە اتاپ ءوتتى.
- قالادا ءدارى-دارمەك قۇرالدارى مەن مەديتسينالىق قۇرال-جابدىقتاردىڭ 10 ءىرى كوتەرمە جەتكىزۋشىسى بار. تىركەلگەن 730 ءدارىحانانىڭ 560-ى جۇمىس ىستەيدى. جالپى، سوڭعى 7 كۇن ىشىندە ۇكىمەت تاراپىنان ارنايى بولىنگەن 2 ۇشاقپەن جانە فارم كومپانيالارىنىڭ بىرجولعى رۇقساتىمەن ءبىر ۇشاق، ءۇندىستان، رەسەي، ۋكراينا، وزبەكستان ەلدەرىنەن 9 جۇك كولىگى جەتكىزىلدى. ءبىر جولعى رۇقساتپەن 8 فارم كومپانياسىنا دارىلىك زاتتاردى قالاعا اكەلۋگە رۇقسات بەرىلدى. ءدارى-دارمەكتەر قالانىڭ بارلىق ءىرى جەكە ءدارىحانالارىنا جانە 13 ەمدەۋ مەكەمەلەرىنە جەتكىزىلدى. بۇگىنگى كۇنى قالادا دارىلىك زاتتاردىڭ نەگىزگى قورى جەتكىلىكتى. ونىڭ ىشىندە تەمپەراتۋرانى تومەندەتەتىن 47500 قوراپ، ۆيرۋسقا قارسى پرەپاراتتاردىڭ 71300 قوراپ، 65300 انتيبيوتيك، 39658 انتيكوگۋليانتتار، س – 22400 ءۆيتامينى، 453122 جەكە قورعانىس قۇرالدارى بار، - دەدى ت. ۆارزيلوۆ.
شىمكەنت
