توقاەۆ قۇدايبەرگەنوۆتى نەگە بوساتتى؟

743

قازاقستان پرەزيدەنتى قاسىم-جومارت توقاەۆ شتاتتان تىس كەڭەسشىسىن قىزمەتتەن بوساتتى. مۇنى پرەزيدەنتتىڭ ءباسپاسوز حاتشىسى بەرىك ءۋالي جاريالادى.

«ولجاس قۇدايبەرگەنوۆ قازاقستان رەسپۋبليكاسى پرەزيدەنتىنىڭ ەكونوميكالىق ماسەلەلەر بويىنشا شتاتتان تىس كەڭەسشىسى قىزمەتىنەن بوساتىلدى. مەملەكەت باسشىسى قاسىم-جومارت توقاەۆ ولجاس ابدىمالىكۇلىنا ەكونوميكانى دامىتۋ جونىندەگى ۇسىنىستارى ءۇشىن العىس ايتتى» – دەيدى ب. ءۋالي.

پرەزيدەنت بۇعان دەيىن ۇكىمەتتىڭ جۇمىسىن سىنعا الىپ، جاعدايدى تۇزەۋگە ەكى اپتا ۋاقىت بەرگەن. الايدا ولجاس ابدىمالىكۇلى شەندى ەمەس، شتاتتان تىس ادام. وسىدان بىرنەشە كۇن بۇرىن فەيسبۋك جەلىسىندە ەلىمىزدە 2 ملن ادامنىڭ كوروناۆيرۋسپەن اۋىرعانىن جازعان ەدى.

«قازىر رەسمي دەرەك بويىنشا، 67 مىڭ ادامنان كوروناۆيرۋس انىقتالدى، جىل باسىنان 15 شىلدەگە دەيىن 234 مىڭ ادام پنەۆمونيامەن اۋىردى، پنەۆمونيا بويىنشا تازا ءوسىم 163 مىڭ. سوندا 67+163= 230 مىڭ.

ياعني كوروناۆيرۋسپەن  اۋىرعاندار سانى كەمىندە 230 مىڭ. ەگەر ءوسىمدى ەسەپكە الماساق، وندا كوروناۆيرۋسپەن اۋىرعاندار 301 مىڭ ادام بولماق.

بىراق ۇيدە اۋىرعاندار دا بار. اۋرۋحاناعا تەك سيمپتومى بار ناۋقاستار قارالىپ، 85 پايىز سيمپتومسىز اۋىرعانىن ەسكەرسەك، 2 ميلليون قازاقستاندىق كوروناۆيرۋسپەن اۋىرعان نەمەسە اۋىرىپ جاتىر.

رەسمي دەرەك بويىنشا، كوروناۆيرۋستان 464 ادام قايتىس بولدى، 15 شىلدەگە دەيىن 3327 ادام پنەۆمونيادان كوز جۇمدى، بۇل بىلتىرعى جىلمەن سالىستىرعاندا 1,75 ەسە كوپ، بىلتىر وسى كەزەڭدە 1896 ادام قايتىس بولدى.

سوندا كوروناۆيرۋستان كەمىندە 1895 ادام، ەڭ كوپ دەگەندە 3791 ادام قايتىس بولدى. بۇل ستاتيستيكاعا كوروناۆيرۋستان ەمدەلىپ، بىراق باسقا سەبەپتەن قايتىس بولعانداردى (ينسۋلت، ينفاركت، ت.ب.) دا قوسۋ كەرەك»، - دەگەن ەدى بىرنەشە كۇنگى فەيسبۋك جازباسىندا.

انىقتالعانداي، كەڭەسشىگە ەشقانداي اقى تولەنبەيدى ەكەن. ءارى كەلىسىم التى ايعا دەيىن جاسالعان.

«بىلتىر جەلتوقسان ايىندا پرەزيدەنت كەزدەسۋ كەزىندە شتاتتان تىس كەڭەسشى بولۋدى ۇسىندى. كەيىنىرەك مۇنىڭ  شامامەن التى ايعا شىعار، ماۋسىمدا اۋىس-ءتۇيىس بولۋى مۇمكىن ەكەنىن ايتتى. ماۋسىمدا كەتەتىن شىعارمىن دەپ ويلادىم، شاماسى، ول ۋاقىتتا پرەزيدەنت باسقا شارۋالارمەن جۇرسە كەرەك. بۇگىن تاڭەرتەڭ حابارلاسىپ، جۇمىسىما العىس ءبىلدىردى. ءبىراز  پايدام تيگەنىن ايتىپ، اۋىس-ءتۇيىس جاساعانىن جەتكىزدى.

ەندى شتاتتان تىس كەڭەسشى ەمەسپىن. بۇل قىزمەتكە اقى تولەنبەيتىن، ەشقانداي دا كەلىسىمشارت، نە كابينەت، نە قىزمەتكەرلەر بولمادى…   جازبالارىمدى ءاردايىم شتاتتان تىس كەڭەسشىنىڭ ەمەس، جەكە ادامنىڭ جازباسى دەپ استىن سىزىپ كورسەتۋگە تىرىستىم. بۇل جازبالار مەنىڭ كەيبىر پىكىرىمدى ساياسيلاندىرىپ جىبەرەتىن.  سوندىقتان ەندى مەنىڭ جازبالارىم ونداي ساياسي رەڭككە يە بولمايدى دەپ ۇمىتتەنەمىن.

پرەزيدەنتتىڭ شتاتتان تىس كەڭەسشىسى رەتىندە حالىق ءۇشىن قولىمنان كەلگەنىن جاساۋعا تىرىستىم. ارى قاراي دا پايدامدى تيگىزەمىن دەگەن ءۇمىت بار. ونىڭ ۇستىنە بيزنەس، مەملەكەتتىك ورگاندار جانە پرەزيدەنت اكىمشىلىگىمەن جۇمىسىمىزدا ەشتەڭە وزگەرمەيدى«، – دەپ جازادى و.قۇدايبەرگەنوۆ.

 

جاسۇلان اسقارۇلى،

"ادىرنا" ۇلتتىق پورتالى

 

پىكىرلەر
رەداكتسيا تاڭداۋى