ەربول احمەتجانوۆ جامبىل وبلىستىق سوتىنىڭ توراعاسى لاۋازىمىنان بوساتىلدى، دەپ حابارلايدى «ادىرنا» ءتىلشىسى.
«وتىرىس بارىسىندا جامبىل وبلىستىق سوتىنىڭ ۋاقىتشا مىندەتىن اتقارۋشى توراعاسىن لاۋازىمىنان بوساتۋ ماسەلەلەرى، سونداي-اق قازاقستان رەسپۋبليكاسى جوعارعى سوتىنىڭ وبلىستىق جانە ولارعا تەڭەستىرىلگەن سوتتاردىڭ توراعالارىن تاعايىنداۋ تۋرالى ۇسىنىستارى قارالدى. قاراۋ ناتيجەسىندە جامبىل وبلىستىق سوتىنىڭ ۋاقىتشا مىندەتىن اتقارۋشى توراعاسى لاۋازىمىنان بوساتىلدى»، — دەپ حابارلادى جوعارعى سوت كەڭەسىنىڭ ءباسپاسوز قىزمەتى.
احمەتجانوۆ جامبىل وبلىستىق سوتىن 2020 جىلدىڭ اقپان ايىنان باستاپ باسقارعان. ول شەكارا قىزمەتكەرى ۆلاديسلاۆ چەلاحقا قاتىستى داۋلى ءىس بويىنشا سوت پروتسەسىن جۇرگىزگەن ەدى. 2012 جىلعى 11 جەلتوقساندا تالدىقورعانداعى قىلمىستىق ىستەر بويىنشا مامانداندىرىلعان اۋدانارالىق اسكەري سوتتا احمەتجانوۆ چەلاحتى «ارقانكەرگەن» شەكارا بەكەتىندە 15 ادامدى ولتىرگەنى ءۇشىن كىنالى دەپ تانىپ، ونى ەرەكشە رەجيمدەگى كولونيادا ءومىر بويىنا باس بوستاندىعىنان ايىرۋعا كەسكەن.
