Qazaqstan prezıdenti Qasym-Jomart Toqaev shtattan tys keńesshisin qyzmetten bosatty. Muny prezıdenttiń baspasóz hatshysy Berik Ýálı jarııalady.
«Oljas Qudaıbergenov Qazaqstan Respýblıkasy Prezıdentiniń ekonomıkalyq máseleler boıynsha shtattan tys keńesshisi qyzmetinen bosatyldy. Memleket basshysy Qasym-Jomart Toqaev Oljas Ábdimálikulyna ekonomıkany damytý jónindegi usynystary úshin alǵys aıtty» – deıdi B. Ýálı.
Prezıdent buǵan deıin úkimettiń jumysyn synǵa alyp, jaǵdaıdy túzeýge eki apta ýaqyt bergen. Alaıda Oljas Ábdimálikuly shendi emes, shtattan tys adam. Osydan birneshe kún buryn feısbýk jelisinde elimizde 2 mln adamnyń koronavırýspen aýyrǵanyn jazǵan edi.
«Qazir resmı derek boıynsha, 67 myń adamnan koronavırýs anyqtaldy, jyl basynan 15 shildege deıin 234 myń adam pnevmonııamen aýyrdy, pnevmonııa boıynsha taza ósim 163 myń. Sonda 67+163= 230 myń.
Iaǵnı koronavırýspen aýyrǵandar sany keminde 230 myń. Eger ósimdi esepke almasaq, onda koronavırýspen aýyrǵandar 301 myń adam bolmaq.
Biraq úıde aýyrǵandar da bar. Aýrýhanaǵa tek sımptomy bar naýqastar qaralyp, 85 paıyz sımptomsyz aýyrǵanyn eskersek, 2 mıllıon qazaqstandyq koronavırýspen aýyrǵan nemese aýyryp jatyr.
Resmı derek boıynsha, koronavırýstan 464 adam qaıtys boldy, 15 shildege deıin 3327 adam pnevmonııadan kóz jumdy, bul byltyrǵy jylmen salystyrǵanda 1,75 ese kóp, byltyr osy kezeńde 1896 adam qaıtys boldy.
Sonda koronavırýstan keminde 1895 adam, eń kóp degende 3791 adam qaıtys boldy. Bul statıstıkaǵa koronavırýstan emdelip, biraq basqa sebepten qaıtys bolǵandardy (ınsýlt, ınfarkt, t.b.) da qosý kerek», - degen edi birneshe kúngi feısbýk jazbasynda.
Anyqtalǵandaı, keńesshige eshqandaı aqy tólenbeıdi eken. Ári kelisim alty aıǵa deıin jasalǵan.
«Byltyr jeltoqsan aıynda prezıdent kezdesý kezinde shtattan tys keńesshi bolýdy usyndy. Keıinirek munyń shamamen alty aıǵa shyǵar, maýsymda aýys-túıis bolýy múmkin ekenin aıtty. Maýsymda ketetin shyǵarmyn dep oıladym, shamasy, ol ýaqytta prezıdent basqa sharýalarmen júrse kerek. Búgin tańerteń habarlasyp, jumysyma alǵys bildirdi. Biraz paıdam tıgenin aıtyp, aýys-túıis jasaǵanyn jetkizdi.
Endi shtattan tys keńesshi emespin. Bul qyzmetke aqy tólenbeıtin, eshqandaı da kelisimshart, ne kabınet, ne qyzmetkerler bolmady… Jazbalarymdy árdaıym shtattan tys keńesshiniń emes, jeke adamnyń jazbasy dep astyn syzyp kórsetýge tyrystym. Bul jazbalar meniń keıbir pikirimdi saıasılandyryp jiberetin. Sondyqtan endi meniń jazbalarym ondaı saıası reńkke ıe bolmaıdy dep úmittenemin.
Prezıdenttiń shtattan tys keńesshisi retinde halyq úshin qolymnan kelgenin jasaýǵa tyrystym. Ary qaraı da paıdamdy tıgizemin degen úmit bar. Onyń ústine bıznes, memlekettik organdar jáne prezıdent ákimshiligimen jumysymyzda eshteńe ózgermeıdi«, – dep jazady O.Qudaıbergenov.
Jasulan Asqaruly,
"Adyrna" ulttyq portaly
