شىمكەنت قالاسىندا قازىرگى ەپيدەميولوگيالىق جاعدايعا قاراماستان، جول جوندەۋ جۇمىسى قارقىندى جۇرۋدە. سونداي-اق، قۇرىلىسشىلار نىساندى مەرزىمىنەن بۇرىن تاپسىرۋدى جوسپارلاپ وتىر. قالاداعى اۆتوموبيل جولدارىنىڭ قۇرىلىسىمەن تانىسقان باق وكىلدەرى بىرنەشە نىسانداعى جوندەۋ جۇمىسىنىڭ بارىسىن كوردى.
اۋەلى «اقجايىق» شاعىناۋدىنىنداعى سىرىم باتىر كوشەسىندە بولىپ، بۇگىنگە دەيىن اتقارىلعان تىرلىكتىڭ كۋاسى بولدى. اتالعان كوشەدە ورتاشا دارەجەدەگى جوندەۋ جۇمىسى جۇرۋدە. جوندەۋ جۇمىسىنىڭ جالپى ۇزىندىعى - 4,8 شاقىرىم. قازىرگى تاڭدا كولىك قاتىناستىڭ كوبەيۋىنە بايلانىستى جولدىڭ ەنى دە 1-1,5 مەترگە كەڭەيتىلگەن. قۇرىلىستى «انداس گرۋپ» مەردىگەر كومپانياسى جۇرگىزۋدە.
– جولدىڭ قۇرىلىسى كەستەگە ساي جۇرگىزىلۋدە. قازىرگە دەيىن بولىنگەن 423 ملن. تەڭگە قارجىنىڭ جارتىسىن يگەردىك. اياقتالۋ مەرزىمى وسى جىلدىڭ تامىز ايى. نىساننىڭ قۇرىلىسىن ءوز مەرزىمىندە اياقتاۋدى جوسپارلاپ وتىرمىز، - دەيدى جول قۇرىلىسى ۋچاسكەسىنىڭ باسشىسى م.بەكباۋوۆ.
كەلەسى قۇرىلىسى قىزۋ ءجۇرىپ جاتقان كوشە – بايتۇرسىنوۆ كوشەسىنىڭ ارعىنبەكوۆ كوشەسى قيىلىسىنان دەندروساياباققا دەيىنگى بولىگى. اتالعان جولدىڭ بولىگىنە بۇگىنگە دەيىن تەك شاعال تاس توسەلىنگەن بولاتىن. قازىر مۇندا اسفالت توسەلىنىپ، جاياۋ جۇرگىنشىلەر جولى، ۆەلوجول جانە يرريگاتسيا جۇيەسى قاراستىرىلعان. جولدىڭ ۇزىندىعى - 500 مەتر. قازىر مۇندا 8 تەحنيكا جانە 48 جۇمىسشى نىساندى مەرزىمىنەن بۇرىن اياقتاۋى ءۇشىن تىنىمسىز ەڭبەكتەنۋدە.
قالاداعى قايتا جوندەۋ جۇمىسى ءجۇرىپ جاتقان جولدىڭ ءبىرى جانگەلدين كوشەسى. بۇگىندە مونتاجداۋ جۇمىسى اياقتالىپ، ءبىرىنشى قابات اسفالت توسەلىنىپ جاتىر جانە جوندەۋ جۇمىسى بارىسىندا يرريگاتسيا جۇيەسى دە قايتا جوندەلىپ، جولدىڭ جيەكتاستارى اۋىستىرىلادى. جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ا.تۇرحانوۆتىڭ سوزىنشە، قالاداعى جول قۇرىلىسىنىڭ باسىم بولىگىن وسى جىلدىڭ تامىز ايىندا اياقتالادى.
– شىمكەنت قالاسىندا وسى جىلى 45 مەردىگەر مەكەمە 414 شاقىرىم جولدى قايتا قۇرۋ جانە كۇردەلى جوندەۋ جۇمىسىن جۇرگىزۋدى باستادى. قۇرىلىس جۇمىسىنا 2300-گە جۋىق جۇمىسشى جانە 400 تەحنيكا جۇمىلدىرىلعان. قالاداعى ىشكى ورام كوشە قۇرىلىسىنىڭ 80 پايىزى تامىز ايىندا اياقتالسا، نەگىزگى ورتالىق كوشەلەردىڭ قۇرىلىسى قازان جانە قاراشا ايلارىندا تولىعىمەن پايدالانۋعا تاپسىرۋ جوسپارلانعان. سونىمەن قاتار، قالاداعى اۆتوموبيل جولدارىن قايتا قۇرۋ جانە ورتا دارەجەدەگى جوندەۋ جۇمىسىنا بيۋدجەتتەن 27 ملرد. تەڭگە قارجى ءبولىنىپ، بۇگىنگە دەيىن 9 ملرد تەڭگە قارجى يگەرىلگەن. جىل سوڭىنا دەيىن بارلىق قارجىنى يگەرىلىپ، جول قۇرىلىسىن اياقتاۋدى جوسپارلاپ وتىرمىز،- دەيدى ا.تۇرحانوۆ.
شىمكەنت
