جۋرناليست اتتى ماماندىق يەسىن ءتورتىنشى بيلىك وكىلى دەپ تە اتايتىنى بەلگىلى. دەگەنمەن ماعان بۇل ماماندىقتىڭ اتاعى ەمەس، اتقاراتىن قىزمەتى ۇنايدى. مەن ءۇشىن جۋرناليست ءسوزى شىندىق جارشىسى دەگەن سوزبەن پارا-پار. "جۋرناليست بولار ادامنىڭ ءسوز بايلىعىنىڭ بولۋى ازدىق ەتەدى، ونداي ادامدا ۇلكەن جۇرەك بولۋى كەرەك!”، - دەۋشى ەدى اتام.
بالالىق شاقتان بولاشاققا اياق باسقان ساتتەن-اق كوپتەگەن كۇرمەۋلى ماسەلەلەر كەزىندە شەشىم قابىلداۋعا تۋرا كەلدى. بالا كۇنىمدە مەن ءۇشىن اتا-انام شەشىم قابىلداسا، ەندىگى كەزەكتە شەشىم قابىلداۋ تىزگىنى وزىمە ءتيدى. بولاشاعىمدى قالىپتاستىراتىن كەز تايادى. باسقاسى بەيمالىم، مەن ءۇشىن ماماندىق تاڭداۋ قيىنعا سوقپادى. ولاي دەيتىنىم، مەنىڭ تابيعاتىم كىشكەنە كۇنىمنەن جازۋعا، مەكتەپشىلىك شارالاردى ۇيىمداستىرۋعا جاقىن بولدى.
ونەر دەيتىن قاسيەتتى سۋسىنمەن سۋسىنداپ، قىر-سىرىنا قانىق بولماسام دا، سىرى مەن جىرىنان ازدا بولسا دا حاباردار ەدىم. جازعان شىعارمالارىما ۇستازىم جوعارى باعا بەرىپ، ماداقتاعاندا، مەنىڭ ماقتان سۇيگىش بالا كوڭىلىم ودان سايىن ءماز بولىپ، قاناتىما قانات ءبىتىپ ۇشا جازدايتىنمىن. جوعارعى سىنىپتاردا سايىستارعا قاتىسىپ، باعىمدى سىناپ ءجۇرىپ تاجىريبە ارتتىردىم. ۇلكەندى-كىشىلى دودالاردان توبە كورسەتىپ، باق سىناپ تالاي رەتتە قانجىعامدى مايلادىم.
مەنىڭ وسىنداي قىزىعى مەن شىجىعى قاتار جۇرەتىن، تاعىلىمدى دا تالابى جوعارى ماماندىققا تاڭداۋىمنىڭ ءتۇسۋى قىزىعۋشىلىقتان عانا ەمەس، قوعاممەن بايلانىس جاساۋ دا سەبەپ بولدى. كەيدە اينالاڭدا بولعان جاعداياتتاردى كوزبەن كورىپ، قۇلاقپەن ەستۋ ازدىق ەتەدى. مەن سونداي جايتتاردى حابارلاپ، حالىق پەن شىندىق اراسىنداعى اسپالى كوپىر بولعىم كەلەدى. مىسالى، قازىر ءبىزدىڭ قوعام پاندەميامەن ارپالىسىپ جاتىر. حالىقتىڭ مۇڭ-مۇقتاجى كۇننەن كۇنگە ارتىپ بارادى. مىڭداعان دارىگەرلەر ءجۇز مىڭداعان ادامعا كومەكتەرىن بەرۋدە. ءبىر جاعىندا كوپتەگەن جاڭا كاسىپورىندار اشىپ، حالىقتىڭ جۇممىسسىزدىڭ ماسەلەسىن شەشۋگە اتسالىسىپ جاتىر. وسىنداي قيىن-قىستاۋ ساتتە نەبىر پىسىقايلار باس پايداسىن ويلاپ، مەملەكەت قازىناسىنا قول سۇعۋدا...
اباي قۇنانبايۇلىنىڭ "پايدا ويلاما، ار ويلا" ءسوزىن باسشىلىققا الىپ، ەلگە قىزمەت ەتىپ، ونىڭ ءتۇيىندى ماسەلەلەرىن شەشۋگە اتسالىسۋ – باستى ارمانىم.
اقىل عالىمزات
