ەلىمىز امان بولسىن دەپ باستايىق ءسوزىمىزدى. ەل ىشىندە ءسىز بەن ءبىز، ەل تىزگىنىن ۇستاعان ازاماتتار امان بولسىن.
وسىدان ءۇش جىل بۇرىن نەمىس جەرىنە جولىم ءتۇستى. بەرليننەن درەزدەن قالاسىنا اسىققان جۇردەك پوەزدا كەلە جاتىرمىن. ءبىر ءوزىم. بىراق قازاقپىن.جانىمداعىلار انا تىلىندە، مەن سياقتى شەتتەن كەلگەندەر اعىلشىن تىلىندە سويلەسىپ كەلەدى. ءتىل بىلمەگەن سوڭ ورماندى القاپتى كوزبەن ۇزاتىپ وتىرمىن.ءبىر كەزدە جانىمدا وتىرعان رەڭى ۆەتنامدىقتارعا كەلەتىن ەگدە ايەل مەن جاس جىگىت "قاي ەلدەنسىڭ"دەگەندى ءوز تىلىندە سويلەپ، قيمىلىمەن اڭعارتتى. قازاقستاننان دەدىم، قازاقشالاپ."كازاكستان،نازارباەۆ، نازارباەۆ" دەپ ريزاشىلىق بىلدىرەتىن ىزەتتەرىن كورسەتىپ، ەزۋلەرىنە كۇلكى جۇگىرىپ قاۋقىلداستى دا كەتتى. قولدارىمەن تاۋلاردىڭ، ادامداردىڭ سۇلباسىن سالىپ، باسبارماقتارىن شوشايتىپ ءماز بولعانى.ايدالادا جالعىزسىراپ كەلە جاتقاندا مىناداي تانىس سوزدەردى ەستىگەندە مەنىڭ دە جۇرەگىم جارىلىپ كەتە جازدادى. الەم "مەنىڭ قازاقستانىمدى، مەنىڭ ەلباسىمدى تانيدى ەكەن عوي" دەگەن ويدان جۇرەگىمدى ماقتانىش سەزىمى كەرنەي جونەلدى. شەتەلگە بارعاندا قازاقستاننىڭ تۋىنىڭ بەينەسى باسىلعان كيىمىن كيىپ، جالاۋشاسىن الا ءجۇرۋ كەرەك ەكەن عوي دەگەن وي كەلدى. قازىر سول جالاۋشانى سىيلاسام عوي ءماز بولار ەدى. درەزدەنگە وسىلاي قازاق بولعانىما ماقتانىپ عاجاپ كوڭىل كۇيمەن جەتتىم.
بىزدە مەملەكەتتىك باعدارلاما بارشىلىق قوي. جۇمىس بارىسىندا سولاردىڭ ىشىندە الەۋمەتتىك باعدارلامالاردى قايتا-قايتا وقىپ تۇرامىن.كوپشىلىكپەن كەزدەسۋگە بارعاندا، بولماسا ءجۋرناليسسىڭ عوي دەپ بىرەۋ سۇراپ قالسا "اۋزىمدى قۇر شوپپەن ءسۇرتىپ" تۇرمايىن دەپ. ال، ەلباسىنىڭ "رۋحاني جاڭعىرۋ" مەن "ۇلى دالانىڭ جەتى قىرى" باعدارلامالىق ماقالالارىن كۇندە وقيمىن. سىزىپ-سىزىپ وقىپ وتىرىپ قازاق بولعانىما ماقتانىپ الامىن، سەنبەسەڭىز ءسىز دە وقىڭىز. جەرىڭىزدىڭ تۇنعان تاريح، ەلىڭىزدىڭ وركەنيەتتىڭ الدىندا جۇرگەنىن كوڭىلگە ءتۇيىپ عاجاپ ءبىر كۇي كەشەسىز. ەگەر وسى باعدارلامالىق ماقالالاردا ايتىلعان تاپسىرمالار ورىندالسا ءبىز قازاقى رۋحتى تەگەۋرىندى مەملەكەتكە اينالامىز.ول ءۇشىن ماقالالاردا ايتىلعاندى ءار ازامات ءومىر ءسۇرۋ سالتىنا اينالدىرۋ كەرەك، سوندا ءار ازاماتتىڭ ساناسىندا سىلكىنىس بولادى. جالپى مەملەكەتتىك باعدارلامالار حالىققا ارنالعان. ال، حالىق وزىنە ارنالعاندى ءبىلۋ كەرەك. ءسوز سوڭىندا بۇگىنگىدەي ەل مەن ەلباسى تۋرالى كوپ ايتىلاتىن كۇندى پايدالانىپ، ەلدى ەلباسىنىڭ باعدارلامالىق ماقالالارىن قايتا وقىپ شىعۋعا شاقىرار ەدىم.
ال، ەلباسىنىڭ باستاۋىمەن سالىنعان ەلوردا قازاقستان مەملەكەتىنىڭ قاراشاڭىراعى. قاراشاڭىراق قازاقتىڭ قاسيەتتىسى.
ەلباسىنىڭ مەرەيلى جاسى مەن ەلوردا كۇنى ساناعا سىلكىنىس اكەلگەن، قۇتتى قادام بولسىن، ەلىمىزگە.
جاقسىلىقتى،قۋانىشتى كوبەيتە بەرەيىك.
بەيسەنكۇل نارىمبەتوۆا،
"سەرپىلىس" قوعامدىق قورىنىڭ ءتورايىمى، "قىزمەت" گازەتىنىڭ باس رەداكتورى
