ەلوردا كۇنى مەرەكەسى قارساڭىندا شىمكەنت قالاسىندا 9 ينۆەستيتسيالىق ءوندىرىس ورنى ىسكە قوسىلدى. اشىلۋ سالتاناتىنا قالا اكىمى مۇرات ايتەنوۆ ونلاين رەجيمدە قاتىستى.
ونلاين-جيىندا مۇرات دۇيسەنبەكۇلى جاڭادان اشىلىپ جاتقان كاسىپورىندارمەن تىكەلەي ەفيردە بايلانىسقا شىعىپ، ەڭبەك ۇجىمدارىمەن پىكىر الماستى. شاھار باسشىسى ءوز سوزىندە ەلىمىزدە مەملەكەت تاراپىنان كاسىپكەرلىككە جوعارى قولداۋ جاسالىپ وتىرعانىنا توقتالىپ، ناتيجەسىندە ءۇشىنشى مەگاپوليستە جاڭا جۇمىس ورىندارىنىڭ اشىلىپ جاتقانىن اتاپ ءوتتى.
- بۇگىنگى تاڭدا شىمكەنت قالاسى ونەركاسىپ پەن ساۋدانىڭ، مادەنيەت پەن وركەنيەتتىڭ قالاسى بولىپ سانالادى. مىنەكي، استانا كۇنى مەرەكەسى قاراساڭىندا قالا اۋماعىندا بىرنەشە جاڭا ينۆەستيتسيالىق وندىرىستىك جوبالار ىسكە قوسىلدى. قالامىزداعى ونەركاسىپ كاسىپورىندارى «بيزنەستىڭ جول كارتاسى-2025» جانە ەكونوميكانىڭ باسىم سالالارىن دامىتۋداعى «قاراپايىم زاتتار ەكونوميكاسى» مەملەكەتتىك قولداۋ باعدارلامالارى شەڭبەرىندە جۇزەگە اسىرىلۋدا. ەلىمىزدىڭ مۇنداي جەتىستىكتەرگە جەتۋى تۇڭعىش پرەزيدەنتىمىز نۇرسۇلتان ءابىشۇلى نازارباەۆتىڭ سىندارلى ساياساتىنىڭ ارقاسى، - دەدى قالا اكىمى.
ەلوردا كۇنىنە وراي شىمكەنت قالاسى اۋماعىندا ىسكە قوسىلعان جوبالاردىڭ جالپى قۇنى 2,5 ملرد تەڭگەنى قۇرايدى. سونىڭ ناتيجەسىندە جالپى 140 ادام جۇمىسپەن قامتىلعان. ولارعا توقتالساق، «QagazOrdasy» جشس - ا4, ا3, ا2 فورماتتاعى قاعاز ءوندىرۋ فابريكاسى; «NURTAU distributioncompany» جشس – شوكولادتى كامپيت جانە ساعىز شىعاراتىن كونديتەرلىك فابريكا قۇرىلىسى; «PROF AKS» جشس – شىنى پاكەتتەرگە ارنالعان اليۋميني ديستانتسيالىق جاقتاۋلار ءوندىرىسى; «NEW TECHNOLOGY» جشس - ديزەلدىك گەنەراتور زاۋىتىنىڭ قۇرىلىسى; «ارمان اگرو» شق - كولەمى 3.7 گا وندىرىستىك جىلىجاي; «زاۋرە» شق - كولەمى 3 گا وندىرىستىك جىلىجاي; «كەرەمەت ساپا» جشس – ينتەنسيۆتى الما باعى; «ككك» جشس – قۇس فەرماسى; «نورمۋحامەدوۆ» جك - بال ءوندىرۋ.
ايتا كەتسەك، قازىرگى تاڭدا قالا اۋماعىندا قۇرىلىس يندۋسترياسى، جەڭىل ونەركاسىپ، ماشينا جاساۋ، مەتاللۋرگيا، مۇناي-حيميا ءوندىرىسى جانە ت.ب. سالالاردا 600-دەن اسا ونەركاسىپ كاسىپورىندارى جۇمىس ىستەيدى. قالادا 426 گەكتار اۋماقتا «وڭتۇستىك» جانە «تاسساي» يندۋستريالىق ايماقتارى ورنالاسقان. ايماقتاردا 6 مىڭنان اسا جۇمىس ورنىن قۇرايتىن 125,6 ملرد.تەڭگەگە 124 جوبا جۇزەگە اسىرىلۋدا. ونىڭ ىشىندە، 69,1 ملرد.تەڭگەگە 81 جوبا ىسكە قوسىلىپ، بۇگىندە 4 مىڭنان اسا جۇمىس ورنى اشىلدى.
سونىمەن قاتار، 200 گەكتار اۋماقتا «وڭتۇستىك» ارنايى ەكونوميكالىق ايماعى تابىستى جۇمىس ىستەۋدە. ايماقتا 3 مىڭنان اسا جۇمىس ورنىن قۇرايتىن 90,1 ملرد.تەڭگەگە 42 جوبا ىسكە اسىرىلۋدا. بۇگىنگى تاڭدا 30,8 ملرد.تەڭگەگە 17 جوبا ىسكە قوسىلىپ، 1,5 مىڭ جاڭا جۇمىس ورنى اشىلدى.
ونلاين-جيىن سوڭىندا مۇرات دۇيسەنبەكۇلى بارلىق قالا تۇرعىندارى مەن قوناقتارىن ەلوردا كۇنى مەرەكەسىمەن قۇتتىقتادى. سونداي-اق كارانتين شارالارىن قاتاڭ ساقتاپ، دەنساۋلىقتارىن كۇتۋگە شاقىردى.
شىمكەنت
