ء"ار شاڭىراقتان ءان-كۇي ۇزىلمەسىن!". پرەزيدەنت ۇلتتىق دومبىرا كۇنىمەن قۇتتىقتادى

2132
Adyrna.kz Telegram

مەملەكەت باسشىسى قاسىم-جومارت توقاەۆ قازاقستاندىقتاردى ۇلتتىق دومبىرا كۇنىمەن قۇتتىقتادى. بۇل تۋرالى "ادىرنا" "اقورداعا" سىلتەمە جاساپ حابارلايدى.

قۇرمەتتى وتانداستار!

ارداقتى اعايىن! 

سىزدەردى ۇلتتىق دومبىرا كۇنىمەن شىن جۇرەكتەن قۇتتىقتايمىن!

بۇل – ەلباسىنىڭ رۋحاني جاڭعىرۋ جولىن جانە سالت-ءداستۇرىمىزدىڭ ءمان-ماڭىزىن دارىپتەيتىن يگى باستاما.

قوس ىشەكتى قارا دومبىرانىڭ ۇنىندە ۇلى دالانىڭ تامىرى تەرەڭ تاريحى مەن سان عاسىرلىق شەجىرەسى بار.

قازاقتىڭ بەكزات بولمىسى مەن اسىل قاسيەتتەرى قاشاندا انمەن ارلەنىپ، كۇيمەن كومكەرىلگەن.

حالقىمىزدىڭ ءتول ونەرىن تورىمىزدەن تۇسپەگەن دومبىراسىز ەلەستەتۋ مۇمكىن ەمەس.

ۇلتتىق رۋحتى كۇمبىرلەگەن كۇيدەن ارتىق كوتەرەتىن دۇنيە كەمدە كەم.

حالقىمىزدىڭ كورنەكتى اقىنى قادىر مىرزا ءالى جىرلاعانداي: «ناعىز قازاق – قازاق ەمەس، ناعىز قازاق – دومبىرا».

ءبىز ۇلتتىق اسپابىمىزدىڭ بۇكىل الەم مويىنداعان مادەني قۇندىلىققا اينالعانىن ماقتان ەتەمىز.

اتادان بالاعا امانات بولعان وسىنداي اسىل قازىنامىزدى قادىر تۇتۋ – ءبارىمىزدىڭ قاسيەتتى بورىشىمىز.

جىلدان جىلعا دومبىرا تارتاتىن جاستاردىڭ قاتارى كوبەيىپ كەلە جاتقانى قۋانتادى.

قازاقتىڭ ءداستۇرلى ءان-كۇيىن ناسيحاتتاپ جۇرگەن بارشا ونەرپازدارعا العىس ايتامىن.

دومبىرا مەرەكەسى قۇتتى بولسىن!

ءار شاڭىراقتان ءان-كۇي ۇزىلمەسىن!

 

پىكىرلەر