Memleket basşysy Qasym-Jomart Toqaev qazaqstandyqtardy Ūlttyq dombyra künımen qūttyqtady. Būl turaly "Adyrna" "Aqordaǧa" sılteme jasap habarlaidy.
Qūrmettı otandastar!
Ardaqty aǧaiyn!
Sızderdı Ūlttyq dombyra künımen şyn jürekten qūttyqtaimyn! Būl – Elbasynyŋ ruhani jaŋǧyru jolyn jäne salt-dästürımızdıŋ män-maŋyzyn därıpteitın igı bastama. Qos ışektı qara dombyranyŋ ünınde Ūly dalanyŋ tamyry tereŋ tarihy men san ǧasyrlyq şejıresı bar. Qazaqtyŋ bekzat bolmysy men asyl qasietterı qaşanda änmen ärlenıp, küimen kömkerılgen. Halqymyzdyŋ töl önerın törımızden tüspegen dombyrasyz elestetu mümkın emes. Ūlttyq ruhty kümbırlegen küiden artyq köteretın dünie kemde kem. Halqymyzdyŋ körnektı aqyny Qadyr Myrza Älı jyrlaǧandai: «Naǧyz qazaq – qazaq emes, naǧyz qazaq – dombyra». Bız ūlttyq aspabymyzdyŋ bükıl älem moiyndaǧan mädeni qūndylyqqa ainalǧanyn maqtan etemız. Atadan balaǧa amanat bolǧan osyndai asyl qazynamyzdy qadır tūtu – bärımızdıŋ qasiettı boryşymyz. Jyldan jylǧa dombyra tartatyn jastardyŋ qatary köbeiıp kele jatqany quantady. Qazaqtyŋ dästürlı än-küiın nasihattap jürgen barşa önerpazdarǧa alǧys aitamyn. Dombyra merekesı qūtty bolsyn! Är şaŋyraqtan än-küi üzılmesın!
