21 ماۋسىم مەن 1 شىلدە ارالىعىندا ەلىمىز بويىنشا ۇلتتىق بىرىڭعاي تەستىلەۋ وتكىزىلدى. بيىل تەستىلەۋگە قاتىسۋعا رەكوردتىق كولەمدە وتىنىشتەر قابىلداندى: 131 754 ءوتىنىش تىركەلدى، ونىڭ 111 113-ءى، ياعني 82 پايىزى بيىلعى مەكتەپ تۇلەكتەرى. وتكەن جىلى بۇل كورسەتكىش 12%-عا تومەن بولعان. بۇل تۋرالى "ادىرنا" ءبىلىم جانە عىلىم مينيسترلىگىنە سىلتەمە جاساپ حابارلايدى.
2020 جىلعى ۇلتتىق بىرىڭعاي تەستىلەۋ 161 پۋنكتتە جۇرگىزىلدى. تەستىلەۋدىڭ ءادىل وتكىزىلۋ بارىسىن قاداعالاۋ ماقساتىندا قالالار مەن وڭىرلەرگە ءبىلىم جانە عىلىم مينيسترلىگى تاراپىنان 1 983 وكىل جىبەرىلدى. سونىمەن قاتار ۇبت بارىسىن قۇرامىنا سىبايلاس جەمقورلىققا قارسى اگەنتتىك، ۇكىمەتتىك ەمەس ۇيىم، باق، «ادالدىق الاڭى» جوبالىق كەڭسەلەرىنىڭ وكىلدەرى مەن قوعام بەلسەندىلەرى كىرگەن ارنايى مونيتورينگتىك توپقا مۇشە 510 ادام باقىلادى.
ماۋسىم ايىندا وتكىزىلگەن ۇلتتىق بىرىڭعاي تەستىلەۋدىڭ قورىتىندىسى بويىنشا، تەستىلەۋگە تىركەلگەن ازاماتتاردىڭ 92,1%-ى ۇبت-عا قاتىستى، 2019 جىلى بۇل كورسەتكىش 94%-دى قۇراعان بولاتىن. شەكتىك بالدى جيناعان تالاپكەرلەر سانى – 82 154, بۇل وتكەن جىلعى كورسەتكىشتەرمەن سالىستىرعاندا ءبىر دەڭگەيدە قالىپ وتىر. جالپى رەسپۋبليكا بويىنشا ورتاشا كورسەتكىش 64,06 بالدى قۇرادى، جالپى 2019 جىلعى ورتاشا كورسەتكىشپەن سالىستىرعاندا ايتارلىقتاي ايىرماشىلىق جوق (65,5 بالل).
بيىل العاش رەت ەلەكتروندىق ۇكىمەت بازاسى ارقىلى Face ID جۇيەسى پايدالانىلدى، وسىعان بايلانىستى ۇبت تاپسىرۋعا باسقا ادامنىڭ كىرۋى ارەكەتتەرىنىڭ سانى ايتارلىقتاي تومەندەدى. ماسەلەن، بيىل 7 مەكتەپ تۇلەگى ءوز ورنىنا ۇبت-عا باسقا ادامدى جىبەرمەك بولعان، وتكەن جىلى مۇنداي 34 جاعداي ورىن العان ەدى.
119 تەستىلەنۋشى دەنساۋلىعىنا بايلانىستى ۇبت تاپسىرمادى. ولار ءۇشىن باسقا كۇندەرى، 19 شىلدەگە دەيىن تەستىلەۋ ۇيىمداستىرىلاتىن بولادى.
بيىل العاش رەت تالاپكەرلەر ءۇشىن كالكۋلياتورلاردى پايدالانۋعا رۇقسات ەتىلدى، تەستىلەۋ ۋاقىتى ۇزارتىلىپ، تۇلەكتەر قورىتىندى مەكتەپ ەمتيحاندارىنان بوساتىلدى.
ۇبت جۇرگىزىلگەن ءار اۋديتوريا ارنايى بەينەباقىلاۋ كامەرالارىمەن جابدىقتالعان بولاتىن، ناتيجەسىندە 9,5 ملن-نان استام ادام ۇبت-نىڭ وتكىزىلۋ بارىسىن ونلاين رەجيمدە باقىلادى. ەندى ەرەجەگە سايكەس 2020 جىلعى 25 تامىزعا دەيىن بەينەجازبالار ءجىتى تەكسەرىلەدى. ەگەر بەينەجازبادا گرانت يەلەنگەن تالاپكەردىڭ تىيىم سالىنعان زاتتاردى پايدالانعانى انىقتالسا، تەستىلەنۋشىنىڭ ۇبت ناتيجەسى جويىلادى.
ەلىمىزدىڭ بارلىق ۇبت وتكىزۋ پۋنكتەرىندە ساقتىق شارالارى قولعا الىنىپ، مەديتسينالىق-سانيتارلىق نورمالار قاتاڭ ساقتالعان بولاتىن. ءاربىر ۇبت-عا قاتىسۋشى دەزينفەكتسيالاۋدىڭ 5 كەزەڭىنەن ءوتتى: دەزينفەكتسيالىق وتكەلدەردەن ءوتىپ، دەزينفەكتسيالانعان كىلەمشەدە اياق كيىمدەرىن زارارسىزداندىردى، دەنە قىزۋىن ولشەتكىزىپ، قولدارىن زارارسىزداندىرۋ سۇيىقتىعىمەن وڭدەدى جانە بىرنەشە مەديتسينالىق ماسكالار الدى.
تەستىلەۋگە كىرگىزۋ جانە وتىرعىزۋ كەزىندە تالاپكەرلەر اراسىندا كەم دەگەندە ەكى مەتر اراقاشىقتىق ساقتالدى. ءاربىر اۋديتوريا باكتەريتسيدتىك قۇرالدارمەن جانە اۋا رەتسيركۋلياتورلارىمەن كەزەڭ-كەزەڭمەن جەلدەتىلىپ، تازالاندى. اۋديتوريالار 35%-عا دەيىن تولتىرىلدى، ارقايسىسىندا تەك 10-18 ادام وتىردى. وتكەن جىلى ءبىر اۋديتوريادا ورتاشا ەسەپپەن 50 تالاپكەر بولعان.
جالپى، ماۋسىم ايىنداعى ۇلتتىق بىرىڭعاي تەستىلەۋ قالىپتى رەجيمدە ءوتتى.
ەستەرىڭىزگە سالا كەتەيىك، كەلەسى ۇبت تامىز ايىندا وتەدى، ونىڭ ناتيجەسى بويىنشا تالاپكەر شەكتىك بالل جيناسا، جوو-نىڭ اقىلى بولىمىنە تۇسە الادى. سونىمەن قاتار جوعارى وقۋ ورنىنىڭ اقىلى بولىمىنە ءتۇسۋ ءۇشىن قاڭتار ايىنداعى ۇبت سەرتيفيكاتتارى دا جارامدى.
"ادىرنا" ۇلتتىق پورتالى
