ماگدەبۋرگ تۇرعىندارى روجدەستۆولىق جارمەڭكەدە بولعان شابۋىل قۇرباندارىن ەسكە الۋعا جينالدى. قۇربانداردى ەسكە الۋ ءراسىمى 21 جەلتوقسان كۇنى كەشكە ءوتتى، دەپ حابارلايدى "ادىرنا" ۇلتتىق پورتالى. بۇل تۋرالى KNA اگەنتتىگى حابارلادى.
كەشە كەشكە بىرنەشە ءجۇز ادام ماگدەبۋرگ ليۋتەران شىركەۋىنە جينالدى. وندا پروتەستانت جانە كاتوليك ەپيسكوپتارىنىڭ قاتىسۋىمەن ەكۋمەنيكالىق قىزمەت ءوتتى. شابۋىل ورنىندا جۇمىس ىستەگەن قۇتقارۋشىلار مەن توتەنشە جاعداي قىزمەتكەرلەرىنىڭ كوپشىلىگى وسى راسىمگە قاتىستى.
قىزمەتكە گەرمانيا پرەزيدەنتى فرانك-ۆالتەر شتاينمايەر، كانتسلەر ولاف شولتس جانە ساكسونيا-انحالت پرەمەر-ءمينيسترى راينەر حازەلوفف قاتىستى. سۋىق پەن جاڭبىرعا قاراماستان، جۇزدەگەن ادام قىزمەتتى حرام الدىنداعى شىركەۋ الاڭىندا ۇلكەن ەكران ارقىلى باقىلاپ تۇردى. ءدال 19:04-تە، قىلمىستىڭ بولعانىنا 24 ساعات تولعاندا، قالانىڭ بارلىق شىركەۋ قوڭىراۋلارى سوعىلدى.
جەكسەنبى، 22 جەلتوقسان كۇنى تاڭەرتەڭ بىرنەشە ءجۇز ادام ماگدەبۋرگتەگى اۋليە يوانن ليۋتەران شىركەۋىنە جينالدى. بۇل شىركەۋ التەر ماركت الاڭىنان 100 مەتر قاشىقتىقتا ورنالاسقان. شابۋىل ءدال وسى جەردە بولدى. وسى شىركەۋدىڭ جانىندا گۇلدەر، شىراقتار مەن ويىنشىقتاردان تۇراتىن ستيحيالى مەموريال پايدا بولدى.
KNA اگەنتتىگىنىڭ مالىمەتىنشە، سەنبى كەشىندە ماگدەبۋرگ ورتالىعىندا ۋلتراوڭشىلداردىڭ اكتسياسى دا ءوتتى. بۇل اكتسياعا بىرنەشە ءجۇز ادام جينالىپ، ولاردىڭ باستى پلاكاتىندا «قايتا ەميگراتسيا» تالابى جازىلعان ەدى.
ەسكە سالا كەتەيىك، 20 جەلتوقسان كۇنى ماگدەبۋرگتەگى روجدەستۆولىق جارمەڭكە قوناقتارىنا جاسالعان شابۋىل ناتيجەسىندە بەس ادام، ونىڭ ىشىندە 9 جاسار بالا قايتىس بولدى، 200-دەن استام ادام جاراقات الدى. شابۋىلدى جاساعان ساۋد ارابياسىنان كەلگەن، 2006 جىلدان بەرى گەرمانيادا تۇراتىن، يسلامنان باس تارتقان 50 جاستاعى دارىگەر تالەب ا. تۇتقىندالدى. سوت ونى قاماۋعا الۋ تۋرالى وردەر بەردى. تەرگەۋشىلەر شابۋىلدى يسلاميزم نەگىزىندەگى لاڭكەستىك دەپ سانامايدى.
مەملەكەت باسشىسى قاسىم-جومارت توقاەۆ گەرمانيا پرەزيدەنتى فرانك-ۆالتەر شتاينمايەرگە كوڭىل ايتۋ جەدەلحاتىن جىبەرىپ، مارقۇمداردىڭ تۋعان-تۋىستارىنا كوڭىل ايتاتىنىن جەتكىزدى.
