قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ جۋرناليستەردى كاسىبي مەرەكەسىمەن قۇتتىقتادى.
وزدەرىڭىزگە ءمالىم، بىلتىر مەنىڭ ارنايى تاپسىرماممەن 28 ماۋسىم بۇقارالىق اقپارات قۇرالدارى قىزمەتكەرلەرىنىڭ كۇنى بولىپ بەلگىلەندى. وسى ارقىلى بۇل سالا ماماندارىنىڭ كاسىبي مەرەكەسىن دەربەس اتاپ وتۋگە مۇمكىندىك جاسالدى.
بۇدان ءبىر عاسىرعا جۋىق ۋاقىت بۇرىن ۇلت ۇستازى احمەت بايتۇرسىنۇلى «گازەت – حالىقتىڭ كوزى، قۇلاعى ءھام ءتىلى» دەپ باعا بەرگەن ەدى. بۇل ۇلاعاتتى ءسوزدى قازىر تەك باسىلىمدارعا عانا ەمەس، بارلىق ەلەكتروندى اقپارات قۇرالدارىنا، اقپارات اگەنتتىكتەرىنە قاتىستى قولدانۋعا بولادى.
سىزدەردىڭ جازعان ءاربىر ماقالالارىڭىزدا، دايىنداعان سيۋجەتتەرىڭىزدە ەلدىڭ مۇڭى مەن مۇقتاجى، ويى مەن پىكىرى، تالابى مەن تىلەگى، قوعام دامۋىنىڭ تىنىسى ايقىن كورىنىس تاۋىپ وتىر. ويتكەنى، جۇمىس بارىسىندا جۇرتپەن ەتەنە ارالاسىپ، «حالىق ۇنىنە قۇلاق اساتىن مەملەكەت» قاعيداتىن جۇزەگە اسىرۋعا زور ەڭبەك سىڭىردىڭىزدەر. سونىمەن قاتار، كاسىبي بىلىكتىلىكتەرىڭىز ارقىلى مەملەكەتىمىزدىڭ كوش باسىنداعى وركەنيەتتى ەلدەردىڭ قاتارىنا قوسىلۋى ءۇشىن ولشەۋسىز ۇلەس قوسىپ كەلەسىزدەر.
قازاقستان جۋرناليستيكاسى ءوزىنىڭ قالىپتاسۋ كەزەڭىنەن باستاپ مەملەكەتشىلدىك، ەلدىك، ۇلتتىق قۇندىلىقتاردى دارىپتەۋ، وسى ۇلى ۇعىمدارعا ادال بولۋ باعىتىن ۇستانادى. قارىمدى قالامگەرلەر قالىپتاستىرعان ءداستۇردى كەيىنگى تولقىن جۋرناليستەر دە لايىقتى جالعاستىرا ءبىلدى. قازىر ەلىمىزدەگى بارلىق بۇقارالىق اقپارات قۇرالدارى قازاقستاننىڭ مەملەكەتتىلىگىن نىعايتۋ، ەلىمىزدە جۇرگىزىلىپ جاتقان رەفورمالاردى حالىققا جەتكىزۋ جولىندا كۇش بىرىكتىرۋدە.
جۋرناليست بولۋ ءۇشىن كاسىبي بىلىكتىلىككە قوسا، باتىلدىق پەن تاباندىلىق كەرەك. وزگەنىڭ ماسەلەسىنە جاناشىرلىق تانىتىپ، ءاربىر ىسكە جاۋاپكەرشىلىكپەن قارايتىن، جۇرت جۇمىسىنا جەگىلىپ، ەلدىڭ كەم-كەتىگىن تۇگەندەۋگە تىرىساتىن، قوعامداعى تۇيتكىلدەرگە پاراسات بيىگىنەن كوز سالاتىن جانە ۇلتتىق دەڭگەيدە ويلاي بىلەتىن ءجۋرناليستى بۇكىل حالىق قۇرمەتتەيدى.
ول ءۇشىن ەڭ الدىمەن وتانعا دەگەن سۇيىسپەنشىلىك جانە ەلگە ادالدىق سەكىلدى قاسيەتتەر قاجەت. قازاقستاننىڭ بۇقارالىق اقپارات قۇرالدارىنىڭ وكىلدەرى بۇگىندە وسى تۇرعىدان وي تولعاپ، ماسەلە كوتەرۋگە بەيىمدەلۋدە. بۇل شىنايى ءپاتريوتيزمنىڭ كورىنىسى دەپ بىلەمىن. سىزدەردىڭ ەلگە جاناشىرلىقتارىڭىز قازىرگىدەي قيىن-قىستاۋ كەزەڭدە انىق بايقالدى. قاشاندا ىرگەلى ءىستىڭ باسىندا جۇرەتىن جۋرناليستەر الەم دامۋىنا كەرى اسەر ەتكەن وسىناۋ داعدارىس تۇسىندا العى شەپتەن تابىلدى. بۇكىل الەمنىڭ تىنىسىن تارىلتقان پاندەميا كەزىندە سىزدەر دەنساۋلىق ساقتاۋ جانە قۇقىق قورعاۋ قىزمەتكەرلەرىمەن بىرگە ايانباي ەڭبەك ەتتىڭىزدەر.
وتاندىق جۋرناليستەر ءسات سايىن شارتاراپقا اقپارات تاراتۋمەن قاتار، مەملەكەت پەن قوعامدى بايلانىستىراتىن التىن كوپىر قىزمەتىن دە اتقارادى. سىزدەردىڭ بۇل سالاداعى اتقارعان ىستەرىڭىزدى جاقسى بىلەمىز جانە باعالايمىز. ءبىزدىڭ بىرلىگىمىز بەكەم، ماقساتىمىز ورتاق، رۋحىمىز اسقاق. سونىڭ ارقاسىندا كەز-كەلگەن قيىندىقتى جەڭىپ، جاسامپازدىق پەن ورلەۋ جولىندا جاڭا بەلەستەردى باعىندىرامىز دەپ سەنەمىن.
سىزدەرگە مىقتى دەنساۋلىق، باق-بەرەكە جانە تولايىم تابىس تىلەيمىن!»،-دەلىنگەن پرەزيدەنتتىڭ قۇتتىقتاۋىندا.
"ادىرنا" ۇلتتىق پورتالى
