Qazaqstan Respublikasynyŋ Prezidentı Qasym-Jomart Kemelūly Toqaev jurnalisterdı käsıbi merekesımen qūttyqtady.
Özderıŋızge mälım, byltyr menıŋ arnaiy tapsyrmammen 28 mausym Būqaralyq aqparat qūraldary qyzmetkerlerınıŋ künı bolyp belgılendı. Osy arqyly būl sala mamandarynyŋ käsıbi merekesın derbes atap ötuge mümkındık jasaldy. Būdan bır ǧasyrǧa juyq uaqyt būryn ūlt ūstazy Ahmet Baitūrsynūly «Gazet – halyqtyŋ közı, qūlaǧy häm tılı» dep baǧa bergen edı. Būl ūlaǧatty sözdı qazır tek basylymdarǧa ǧana emes, barlyq elektrondy aqparat qūraldaryna, aqparat agenttıkterıne qatysty qoldanuǧa bolady. Sızderdıŋ jazǧan ärbır maqalalaryŋyzda, daiyndaǧan siujetterıŋızde eldıŋ mūŋy men mūqtajy, oiy men pıkırı, talaby men tılegı, qoǧam damuynyŋ tynysy aiqyn körınıs tauyp otyr. Öitkenı, jūmys barysynda jūrtpen etene aralasyp, «Halyq ünıne qūlaq asatyn memleket» qaǧidatyn jüzege asyruǧa zor eŋbek sıŋırdıŋızder. Sonymen qatar, käsıbi bılıktılıkterıŋız arqyly memleketımızdıŋ köş basyndaǧy örkeniettı elderdıŋ qataryna qosyluy üşın ölşeusız üles qosyp kelesızder. Qazaqstan jurnalistikasy özınıŋ qalyptasu kezeŋınen bastap memleketşıldık, eldık, ūlttyq qūndylyqtardy därıpteu, osy ūly ūǧymdarǧa adal bolu baǧytyn ūstanady. Qarymdy qalamgerler qalyptastyrǧan dästürdı keiıngı tolqyn jurnalister de laiyqty jalǧastyra bıldı. Qazır elımızdegı barlyq būqaralyq aqparat qūraldary Qazaqstannyŋ memlekettılıgın nyǧaitu, elımızde jürgızılıp jatqan reformalardy halyqqa jetkızu jolynda küş bırıktırude. Jurnalist bolu üşın käsıbi bılıktılıkke qosa, batyldyq pen tabandylyq kerek. Özgenıŋ mäselesıne janaşyrlyq tanytyp, ärbır ıske jauapkerşılıkpen qaraityn, jūrt jūmysyna jegılıp, eldıŋ kem-ketıgın tügendeuge tyrysatyn, qoǧamdaǧy tüitkılderge parasat biıgınen köz salatyn jäne ūlttyq deŋgeide oilai bıletın jurnalistı bükıl halyq qūrmetteidı. Ol üşın eŋ aldymen Otanǧa degen süiıspenşılık jäne elge adaldyq sekıldı qasietter qajet. Qazaqstannyŋ būqaralyq aqparat qūraldarynyŋ ökılderı bügınde osy tūrǧydan oi tolǧap, mäsele köteruge beiımdelude. Būl şynaiy patriotizmnıŋ körınısı dep bılemın. Sızderdıŋ elge janaşyrlyqtaryŋyz qazırgıdei qiyn-qystau kezeŋde anyq baiqaldy. Qaşanda ırgelı ıstıŋ basynda jüretın jurnalister älem damuyna kerı äser etken osynau daǧdarys tūsynda alǧy şepten tabyldy. Bükıl älemnıŋ tynysyn taryltqan pandemiia kezınde sızder densaulyq saqtau jäne qūqyq qorǧau qyzmetkerlerımen bırge aianbai eŋbek ettıŋızder. Otandyq jurnalister sät saiyn şartarapqa aqparat taratumen qatar, memleket pen qoǧamdy bailanystyratyn altyn köpır qyzmetın de atqarady. Sızderdıŋ būl saladaǧy atqarǧan ısterıŋızdı jaqsy bılemız jäne baǧalaimyz. Bızdıŋ bırlıgımız bekem, maqsatymyz ortaq, ruhymyz asqaq. Sonyŋ arqasynda kez-kelgen qiyndyqty jeŋıp, jasampazdyq pen örleu jolynda jaŋa belesterdı baǧyndyramyz dep senemın. Sızderge myqty densaulyq, baq-bereke jäne tolaiym tabys tıleimın!»,-delıngen prezidenttıŋ qūttyqtauynda.
"Adyrna" ūlttyq portaly
