بۇل تۋرالى شىمكەنت قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى ءلاززات قاشقىنباەۆا باق وكىلدەرىنە بەرگەن سۇحباتى كەزىندە ايتتى.
– قالامىزدا ءدارى تاپشىلىعى تۋرالى شاعىم تۇسپەگەنىن، الايدا ءدارىحانالاردا دارىلەردىڭ تەز تاۋسىلىپ جاتقانى تۋرالى اقپاراتتار كەلگەنىن ايتا كەتەيىن. ياعني قويمالاردا دارىلەر بار، بىراق دارىحانالارعا جەتكەن سوڭ، تەز تاۋسىلىپ قالۋدا. قالادا 730-داي ءدارىحانا بار. ونىڭ 60%-ى ۇلكەن، قالعانى – كىشى ءدارىحانالار. كىشى ءدارىحانالاردا دارىلەردىڭ قورى از بولادى. ال ۇلكەن كومپانيالاردىڭ ءدارى-دارمەك قورى جەتكىلىكتى، – دەدى ل.قاشقىنباەۆا.
سونداي-اق، دەپارتامەنت باسشىسىنىڭ ورىنباسارى دارىلەردى مامانداردىڭ نۇسقاۋىمەن عانا قولدانۋ كەرەكتىگىن ەسكەرتتى.
– رەتسەپتسىز بوساتىلاتىن دارىلەردىڭ ساتىلۋى شەكتەلمەگەن. بىراق ءبىز بۇگىنگى جاعدايعا وراي ءتيىستى ورىندارمەن مەموراندۋم ءتۇزۋدى جوسپارلاۋدامىز. تاعى ءبىر ايتا كەتەتىن جايت، قازىرگى كۇندە حالىق عالامتوردان كورىپ، كوروناۆيرۋس ينفەكتسياسىنا دەكسامەتازون ءدارىسى كومەكتەسەدى دەپ ويلاپ ءجۇر. ول – گورموندىق ءدارى. ونى تەك دارىگەردىڭ نۇسقاۋىمەن عانا قولدانۋ كەرەك، – دەدى ل.رىسىمبەكقىزى.
ال شىمكەنت قالاسى بويىنشا فارماتسەفتيكا قاۋىمداستىعىنىڭ ءتورايىمى حاديشا ءالجانوۆا دارىلەردىڭ جەتكىزىلۋى جونىندە وزىندىك ەرەجەلەرى بارىن تىلگە تيەك ەتتى.
– قالامىزدا سوڭعى ون كۇندىك ىشىندە جاعداي ازداپ وزگەردى. حالىق مۇنى دۇرىس ءتۇسىنۋى كەرەك. شىمكەنتتە ءدارىحانالار كوپ بولعانىمەن، دارىلەردى جەتكىزۋ ەرەجەلەرى بار. ياعني، ءىرى كومپانيالار قويمالارىنا ءۇش ايعا دارىلىك قورلارىن جيناپ قويادى. ال ءبىزدىڭ ءدارىحانالار ءبىر ايلىق ءدارى-دارمەك قورىن الادى. بىراق قالىپتى سيتۋاتسيا وزگەرگەنگە بايلانىستى جانە ءدارى-دارمەكتىڭ كوبىسى شەتەلدەن كەلەتىندىكتەن كەي دارىلەر ەكى-ءۇش كۇنگە كەشىگىپ جەتكىزىلۋدە. ءدال بۇگىن «زەردە» كومپانياسىنىڭ مالىمەتى بويىنشا دارىلەردىڭ بارلىعى كەلگەن. وسى رەتتە الەۋمەتتىك جەلىدە كىشى ءدارىحانا قىزمەتكەرلەرىمەن ورتاق توبىمىز بارىن ايتقىم كەلەدى. بۇل توپ ارقىلى كەز كەلگەن ءدارىحانادا قاي ءدارى تاۋسىلعانىن ءبىلىپ، شۇعىل تۇردە جەتكىزىپ وتىرمىز. وسى ورايدا دۇرلىگىپ، رەتسەپتسىز بوساتىلاتىن دارىلەردى تىم ارتىق ساتىپ الىپ جاتقان قالا تۇرعىندارىن سابىرعا شاقىرامىن! بۇگىندە ءبىزدىڭ ماماندار تاۋلىگىنە 24 ساعات جۇمىس ىستەۋدە. سول سەبەپتى جاعدايدى قالىپتى دەڭگەيدە ۇستايمىز، – دەدى ح.دەربەسقىزى.
شىمكەنت
