باق كۇنىنە ارنالعان سالتاناتتى جيىن ءوتتى (بەينەبايان)

2168

بۇگىن  ەلورداداعى "قازمەديا ورتالىعى" عيماراتىندا بۇقارالىق اقپارات قۇرالدارىنىڭ قىزمەتكەرلەرى كۇنىنە ارنالعان سالتاناتتى جيىن ءوتتى.

ءىس-شاراعا اقپارات جانە قوعامدىق دامۋ ءمينيسترى ايدا بالاەۆا، سالالىق مەملەكەتتىك ورگاننىڭ قىزمەتكەرلەرى، وتاندىق باق وكىلدەرى قاتىستى. شارا ەلدەگى ەپيدەميولوگيالىق جاعداي تالاپتارىنا بايلانىستى ونلاين-فورماتتا ءوتتى.

قر اقپارات جانە قوعامدىق دامۋ ءمينيسترى بارلىق جۋرناليستەر مەن باق قىزمەتكەرلەرىن كاسىبي مەرەكەسىمەن قۇتتىقتادى.

«سوڭعى ايلارداعى قيىن جاعداي كەزىندە ءوز دەنساۋلىعى مەن ومىرىنە قاۋىپتى ەكەنىنە قاراماستان، ادامدارعا شىنايى اقپارات تاراتىپ، ادامداردىڭ ەرتەڭگى كۇنگە دەگەن سەنىمىن ارتتىرۋ ماقساتىندا كاسىبي مىندەتىن ادال اتقارىپ جۇرگەن مەديا قىزمەتكەرلەرى جۇمىسىنا قوعام كۋا»، - دەدى ايدا بالاەۆا.

سالتاناتتى ءىس-شارا اياسىندا جوعارى كاسىبي شەبەرلىگى ءۇشىن ەلىمىزدىڭ بارلىق ايماقتارىنان ونداعان مەديا قىزمەتكەرلەر قر اقپارات جانە قوعامدىق دامۋ مينيسترلىگىنىڭ قۇرمەت گراموتاسىمەن جانە وتاندىق جۋرناليستيكانى دامىتۋعا ايرىقشا ۇلەس قوسقان مەديا مايتالماندارى "اقپارات سالاسىنىڭ ۇزدىگى " ءتوس بەلگىسىمەن ماراپاتتالدى. سانيتارلىق ەپيدەميولوگيالىق جاعدايعا بايلانىستى ماراپات تەك Qazaqstan جانە "حابار 24" تەلەارنالارىنىڭ جۋرناليستەرى ماقپال ۋكەنوۆا مەن قانات بازىلحانوۆ، Aiqyn جانە "كازاحستانسكايا پراۆدا" گازەتتەرىنىڭ جۋرناليستەرى ايتجان مۇرجانوۆ پەن اسقار بەيسەنباەۆقا تابىستالدى.

سونىمەن قاتار، بيىل العاش رەت بەلگىلى جۋرناليست جانە قوعام قايراتكەرى، قر پرەزيدەنتى سىيلىعىنىڭ لاۋرەاتى بەيسەن قۇرانبەك اتىنداعى "جىگەر" سىيلىعى تاعايىندالعانى بەلگىلى. ەستەرىڭىزگە سالا كەتەيىك، ءتورت نوميناتسيا بويىنشا كونكۋرسقا قاتىسۋ ءۇشىن وتىنىمدەر قابىلداۋ 2020 جىلدىڭ 26 مامىرى مەن 15 ماۋسىمى ارالىعىندا وتكەن بولاتىن. جەڭىمپازدارعا سىيلىقتى "اقپارات سالاسىنىڭ ۇزدىگى" توسبەلگىسىنىڭ جاڭا يەگەرلەرى تابىستاۋ قۇرمەتىنە يە بولادى.

"جىگەر" سىيلىعى:

مەرەي شوحمانوۆا – "حابار 24" تك، "الەۋمەتتىك تاقىرىپتاعى ۇزدىك تۆ سيۋجەتى" اتالىمىنا;

ازامات قاسىم – "Egemen Qazaqstan" گازەتى، «الەۋمەتتىك تاقىرىپتاعى ۇزدىك ماقالا»;

اقجەلەڭ راحاتدينقىزى – "الماتى" تك، "الەۋمەتتىك تاقىرىپتا ەڭ ۇزدىك جاريالانىم (الەۋمەتتىك جەلىدە);

ولگا بۋگاەۆا – اا "Pavlodarnews.kz",  "الەۋمەتتىك تاقىرىپتاعى ۇزدىك فوتوسۋرەت" اتالىمىنا يە بولدى.

سالتاناتتى شارا كەزىندە ارىپتەستەرىن بەينەبايلانىس ارقىلى شەتەلدىك بولىمشەلەردە جۇمىس ىستەيتىن وتاندىق باق جۋرناليستەرى، اتاپ ايتقاندا، مايرا كابيەۆا (اقش), سەرگەي ايسەندەر (يزرايل), يۋليا تۋجيلكينا (گرۋزيا), سونداي-اق جانات ەرنست (بەلگيا) جانە عالىمجان قارامانۇلى (ۇلىبريتانيا) قۇتتىقتادى.

جيىن بارىسىندا ءىس-شاراعا قاتىسۋشىلار 2020 جىل قازاقستاندىق جۋرناليستەر ءۇشىن تەك كوروناۆيرۋس پاندەمياسىمەن كۇرەسپەن عانا ەمەس، سونىمەن قاتار جۇزدەگەن ناعىز كاسىبي شەبەرلەردىڭ ادال ەڭبەگى مەن ماڭداي تەرىنىڭ ارقاسىندا جەتكەن جەتىستىكتەرمەن دە ەستە قالاتىنىن اتاپ ءوتتى. سونداي-اق، بيىلعى جىلى رەسپۋبليكالىق «كازاحستانسكايا پراۆدا» گازەتى مەن «كازينفورم» حالىقارالىق اقپارات اگەنتتىگى 100 جىلدىق مەرەيتويىن اتاپ وتۋدە، «حابار اگەنتتىگى» اق-نىڭ مەديا نارىققا شىققانىنا 25 جىل تولىپ وتىر.

اقپارات جانە قوعامدىق دامۋ ءمينيسترى ايدا بالاەۆا جۋرناليست ماماندىعىن تەك بويىندا ايرىقشا ازاماتتىق ۇستانىمى، كەڭ دۇنيەتانىمى مەن جوعارى ادامگەرشىلىك قۇندىلىقتارى بار ادامدار عانا الىپ جۇرەتىنىن اتاپ ءوتىپ، بارلىق باق قاۋىمداستىعى وكىلدەرىنە العىسىن ءبىلدىردى. مەرەكەلىك شارادا جۋرناليستەر كۇنىنە ارنايى جازىلعان ءاننىڭ تۇساۋى دا كەسىلدى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket