بۇگىن شىمكەنت قالاسى اكىمدىگىندە شىمكەنت قالاسى اكىمىنىڭ ءبىرىنشى ورىنباسارى ەربول سادىردىڭ قاتىسۋىمەن كوروناۆيرۋس پاندەمياسىنا جول بەرمەۋ ماقساتىندا شەكتەۋ شارالارى جونىندە بريفينگ ءوتتى.
ءباسپاسوز ماجىلىسىندە ەربول ءابىلحايىرۇلى كوروناۆيرۋس ينفەكتسياسى ءورشىپ تۇرعانىن العا تارتىپ، وسىعان وراي كارانتين مەرزىمى ۇزاراتىنىن جانە كەيبىر شەكتەۋ شارالارى ەنگىزىلەتىنىن جەتكىزدى.
– قالامىزدا شەكتەۋ شاراسى 22 ماۋسىمعا دەيىن ەدى. ەندى بۇل 6 شىلدەگە دەيىن سوزىلىپ وتىر. ودان بولەك، كەيبىر شەكتەۋ شارالارى ەنگىزىلەدى. ارنايى توپپەن قوعامدىق كولىكتەر مەن قوعامدىق ورىنداردى ارالاپ شىقتىق. وكىنىشكە قاراي ساقتىق شارالارى دۇرىس ساقتالماعان. مۇنىڭ ءبارى قالاداعى ەپيدەميولوگيالىق جاعدايدىڭ كۇردەلەنۋىنە اكەلىپ سوعادى. وسىعان بايلانىستى دەمالىس كۇندەرى قالانىڭ كۇندەلىكتى ومىرىنە قاجەتتى نىسانداردان باسقا نىساندار جۇمىسىن توقتاتادى. ياعني، سەنبى، جەكسەنبى كۇندەرى بارلىق ازاماتتار ءوز وتباسىمەن ۇيلەرىندە وتىرۋى كەرەك. ەگەر ءبىز وسىنداي شارالاردى ساقتامايتىن بولساق، كوروناۆيرۋستى اۋىزدىقتاۋ مۇمكىن ەمەس. الداعى 20, 21 ماۋسىم كۇندەرىنەن باستاپ قالاداعى ويىن-ساۋىق ورتالىقتارى، ءىرى ساۋدا ورىندارى، بازارلار، ساۋدا ۇيلەرى مەن ورتالىقتارى، فيتنەس ورتالىقتارى، باسسەيندەر جانە سپورتتىق نىسانداردىڭ جۇمىسى توقتاتىلادى. بىراق تەك سەنبى، جەكسەنبى كۇندەرى. بۇل ورايدا كوپ قاباتتى تۇرعىن ۇيلەردىڭ اۋماعىنداعى ازىق-تۇلىك، جەكە ازىق-تۇلىك دۇكەندەرى جانە قالاداعى كوتەرمە بازار «جىبەك جولى» مەن «قازىبەك» بازارى جۇمىسىن ىستەيدى»، – دەدى قالا اكىمىنىڭ ءبىرىنشى ورىنباسارى.
وسى رەتتە ەربول سادىر قوعامدىق تاماقتانۋ ورىندارىنىڭ جۇمىسى توقتايتىنىن، تەك قانا اشىق دالادا تاماقتانۋ ورنى بار جانە سانيتارلىق نورمالاردى ساقتاعان ورىندار عانا ءوز جۇمىسىن جالعاستىراتىنىن ايتتى. سونداي-اق، قوعامدىق كولىكتەر سەنبى، جەكسەنبى تولىق توقتايدى. باسقا كۇندەرى مەرزىمىنە شەكتەۋلەر ەنگىزىلىپ، تاڭعى ساعات 07:00-دەن 11:00-گە دەيىن جانە تۇستەن كەيىن 17:00-دەن كەشكى ساعات 20:00-گە دەيىن عانا جۇرەدى. ال 22 ماۋسىمنان باستاپ حقكو جانە جۇمىسپەن قامتۋ ورتالىعىنىڭ جۇمىستارىنا دا شەكتەۋلەر قويىلادى. ولار تاڭعى ساعات 08:00-دەن 12:00-گە دەيىن عانا جۇمىس ىستەيدى. ونىڭ وزىندە ونلاين كورسەتىلمەيتىن قىزمەتتەردى عانا ىسكە اسىرادى. مۇندا كەلەتىن ازاماتتار ونلاين كەزەككە تۇرۋى كەرەك.
سونىمەن قاتار، حالىق كوپ جينالاتىن كوشەلەر، ارباتتار، سكۆەرلەر، سپورتتىق جانە بالالارعا ارنالعان الاڭشالار، تۋريستىك ورىندار، ساياباقتاردىڭ بارلىعى جۇمىسى توقتاتادى. ودان بولەك، قالاداعى وفيستە، مەملەكەتتىك مەكەمەلەردە جۇمىس جاسايتىن كاسىپورىنداردىڭ بارلىعىنا جۇمىسشىلارىنىڭ 80%-نا دەيىن ونلاين رەجيمدە جۇمىس ىستەۋگە كوشۋ تۋرالى شەشىم قابىلدانعان.
وسى رەتتە ەربول ءابىلحايىرۇلى: «قۇرمەتتى قالا تۇرعىندارى، مۇنىڭ ءبارى – سىزدەردىڭ دەنساۋلىقتارىڭىزدى ساقتاۋ ءۇشىن جاسالىنىپ جاتقان شارالار. سوندىقتان ءاربىر ازامات ءوزىنىڭ دەنساۋلىعى، جاقىندارىنىڭ اماندىعى ءۇشىن ساقتانۋى كەرەك. ەگەر سىزدەر تاراپىنان سانيتارلىق نورمالار ساقتالىنباسا، كوروناۆيرۋستى اۋىزدىقتاۋىمىز مۇمكىن ەمەس. ناتيجەسىندە، قالاداعى شەكتەۋ شارالارىن بۇدان دا قاتتى كۇشەيتۋگە ءماجبۇر بولامىز»، – دەدى ە.سادىر.
شىمكەنت
