شىمكەنتتىڭ كوپقاباتتى ۇيلەرى كوك تۋمەن كومكەرىلدى

2870
Adyrna.kz Telegram

بۇگىن – مەملەكەتتىك رامىزدەر كۇنى. وسىعان وراي ەرىكتىلەردىڭ ۇيىتقى بولۋىمەن شىمكەنتتەگى كوپقاباتتى تۇرعىن ۇيلەردىڭ قاسبەتتەرىنە مەملەكەتتىك تۋ ءىلىندى.

«ءنۇرسات» شاعىناۋدانىنداعى كوپقاباتتى ۇيلەردىڭ تۇرعىندارى بۇل يگى ىسكە ءوز ۇلەستەرىن قوسىپ، قولداۋ ءبىلدىردى. وسىلايشا، بۇل شارا ارقىلى قالا تۇرعىندارى وزدەرىنىڭ رامىزدەرگە دەگەن شەكسىز قۇرمەتىن بايقاتتى. ايتا كەتەيىك، «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم قازاقستاندا مەملەكەتتىك رامىزدەر كۇنى رەتىندە مەرەكەلەنەدى.

مەملەكەتتىك رامىزدەردى قاستەرلەۋ، قاسيەتىن ءبىلۋ، ونى جۇرەككە توقۋ – وتانسۇيگىشتىكتىڭ بەلگىسى. قازاقستاننىڭ ءاربىر ازاماتى ءانۇراندى جاتقا ايتىپ، ەلتاڭباسىنىڭ تاريحىن ءتۇسىنىپ، كوك تۋىن ماڭگى جەلبىرەتىپ قويسا، مىنە، وسى – ۇلتتىق رامىزدەرىمىزگە دەگەن وراسان قۇرمەتتىڭ بەلگىسى بولماق. ويتكەنى ۇلتتىق ايشىقتى تاڭبالار – ەلىن سۇيگەن كەز كەلگەن ازاماتتىڭ نامىسىن كوتەرىپ، رۋحىن اسقاقتاتاتىن ماقتانىشى.

شىمكەنت 

پىكىرلەر