پرەزيدەنت قاسىم-جومارت توقاەۆتىڭ تاپسىرماسىمەن ساياسي قۋعىن-سۇرگىن قۇرباندارىن اقتاۋ جونىندەگى مەملەكەتتىك كوميسسيا قۇرىلاتىن بولدى.
بۇل جونىندە بۇگىن مەملەكەت باسشىسى ساياسي قۋعىن-سۇرگىن قۇرباندارىن ەسكە الۋ كۇنىنە وراي جولداعان ۇندەۋىندە ايتتى.
مەن تاريحشى رەتىندە پرەزيدەنتتىڭ بۇل باستاماسىن قولدايمىن. جازىقسىز جازالانعاندار شىن مانىندە دە جۇيەلى زەرتتەۋدى قاجەت ەدى. مەنىڭ ءوزىم دە ساياسي قۋعىن-سۇرگىنگە ۇشىراعان الاش زيالىسىنىڭ ۇرپاعى بولامىن.
سوندىقتان دا بۇل كۇن مەن ءۇشىن ەرەكشە. ياعني، اتالارىمىز اتۋ جازاسىنا تارتىلعان، اۋىر كۇن. جىل سايىن وسى جازىقسىز جانداردىڭ ارۋاعىنا قۇران باعىشتاپ، جانۇيامىزبەن ەسكە الامىز.
پرەزيدەنت ق.توقاەۆ اتاپ وتكەندەي، كەڭەس زامانىندا ءومىر سۇرگەن حالىقتارعا «ۇلكەن تەررور» وراسان زور قاسىرەت اكەلدى. زۇلمات جىلداردا قازاقستانعا كسرو-نىڭ تۇكپىر-تۇكپىرىنەن بەس ميلليوننان استام ادام جەر اۋدارىلدى. 100 مىڭعا جۋىق ازاماتىمىز قۋعىن-سۇرگىنگە ۇشىراپ، سونىڭ 20 مىڭنان استامى اتىلدى.
- تاريحي ادىلدىكتى قالپىنا كەلتىرۋ جۇمىستارىن اياقتاپ، ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى تاپسىردىم. ءبىز جازىقسىز جازالانعانداردىڭ ارقايسىسىن ەستە ساقتاۋ ارقىلى عانا كەمەل كەلەشەككە جول اشامىز. بولاشاقتىڭ بەرىك نەگىزى تاۋەلسىزدىكتەن باستاۋ الادى. وتكەن عاسىرداعى ەڭ قيلى كەزەڭنىڭ بىرىندە جازىقسىز جاپا شەككەندەردىڭ رۋحىنا تاعزىم ەتۋ – بارشامىزدىڭ پەرزەنتتىك بورىشىمىز، - دەدى پرەزيدەنت.
مەملەكەت باسشىسى بەرگەن تاپسىرماعا ساي، ەندى اتا-بابالارىمىز جونىندەگى تىڭ دەرەكتەردى تاريح بەتتەرىنە شىعارۋعا ءوزىم دە اتسالىساتىن بولامىن.
ويتكەنى بۇل ءبىزدىڭ ەلىمىزدىڭ تاريحى. ەگەمەندىكتىڭ وڭاي كەلمەگەنىنىڭ ايعاعى. وسى ارقىلى تاۋەلسىزدىكتىڭ قادىرىن ۇعىناتىن بولامىز.
الىبەك سەيدەحان،
تاريح عىلىمدارىنىڭ دوكتورى، پروفەسسور
