الماتى وبلىسىنداعى اقسۋ قانت زاۋىتىندا جاڭا ماۋسىمعا دايىندىق ءجۇرىپ جاتىر

880

الماتى وبلىسىنداعى اقسۋ قانت زاۋىتىندا جاڭا ماۋسىمعا دايىندىق ءجۇرىپ جاتىر. بۇل جۇمىستاردىڭ بارىسىن الماتى وبلىسى اكىمىنىڭ ورىنباسارى سەرىكجان بەسكەمپىروۆ كورىپ قايتتى.

زاۋىتتاعى قالپىنا كەلتىرۋ جۇمىستارى 18 مامىردان باستالدى. قازىرگى كەزدە تسەحتار تازالانىپ، توزعان بولشەكتەر جاڭاسىنا اۋىستىرىلۋدا. بۇعان دەيىن «جەتىسۋ» اكك» ءودي» اق ارقىلى جالپى سانى 288 بىرلىك اۋىل شارۋاشىلىعى تەحنيكالارى مەن قۇرال-جابدىقتار ساتىپ الىنىپ، «اقسۋ قانت» جشس-عا ليزينگىگە بەرىلگەن بولاتىن. سەرىكتەستىككە كادر تارتۋ ماقساتىندا «اقسۋ قانت» جشس مەن جەرگىلىكتى پوليتەحنيكالىق كوللەدج اراسىندا 50 قاجەتتى ارنايى مامان دايىنداۋ تۋرالى كەلىسىمشارت جاسالعان.

س.بەسكەمپىروۆتىڭ ايتۋىنشا، قازىر كاسىپورىندا 120 ادام جۇمىس ىستەيدى، جازعى ماۋسىمدا تاعى 100 ادام ەڭبەككە تارتىلادى، ال ىسكە قوسىلعاندا زاۋىتتا 600-دەي ادام جۇمىس ىستەيتىن بولادى: «كورىپ تۇرعانىمىزداي، جالپى جوندەۋ جۇمىستارى جوسپار بويىنشا ءجۇرىپ جاتىر. بيىلعى جىلى «جەتىسۋ» اكك-ءنىڭ قولداۋىمەن زاۋىت شامامەن 20 قىركۇيەكتە ىسكە قوسىلادى»، - دەدى وبلىس اكىمىنىڭ ورىنباسارى.

ءوز كەزەگىندە كاسىپورىن ديرەكتورى سامات ناديرباەۆتىڭ ايتۋىنشا، بيىلعى جىلى قانت قىزىلشاسىنىڭ سىعىندىسىن كەپتىرۋگە ارنالعان سىعىندى كەپتىرگىش جانە جومدى ۇنتاقتاعىش جەلى ورناتىلىپ، ىسكە قوسۋعا دايىن تۇر. كاسىپورىن ىرگەسىن ودان ءارى كەڭەيتۋ اشىتقى زاۋىتى مەن  قۇراما جەم شىعاراتىن زاۋىت سالۋ ارقىلى جۇزەگە اسىرىلماق: «زاۋىتتاعى پروتسەستەردى اۆتوماتتاندىرۋ مەن ءوندىرىستىڭ شيكىزاتتىق جۇيەسىن جۇزەگە اسىرۋ جۇمىستارىن جۇرگىزۋگە مۇمكىندىك بار، بۇل زاۋىتتىڭ جىل بويى ۇزدىكسىز جۇمىس ىستەۋىنە، اۋدان تۇرعىندارىن جۇمىسپەن قامتۋعا وڭ ىقپالىن تيگىزەدى»، - دەدى س.ناديرباەۆ.

اتاپ وتسەك، بيىلعى جىلى اقسۋ اۋدانىندا 3 167 گات جەرگە قانت قىزىلشاسى سەبىلگەن، ونىڭ  300 گەكتارى قانت زاۋىتىنا تيەسىلى. جالپى وبلىس بويىنشا ءتاتتى ءتۇبىر 6 100 گا جەرگە سەبىلدى.

جالپى اقسۋ قانت زاۋىتى 2017 جىلدىڭ قىركۇيەك ايىندا ىسكە قوسىلعان. وندىرىستىك قۋاتتىلىعى 300 مىڭ توننا قانت قىزىلشاسىن وڭدەۋگە جەتەدى، ياعني ءبىر ماۋسىمدا 35 مىڭ تونناعا دەيىن قانت شىعارا الادى. كاسىپورىن وڭىردەگى وڭدەۋشى «قاناتقاقتى» ءوندىرىس ورنى. زاۋىتقا شيكىزات قانت قىزىلشاسى باعاتىنداعى 17 سەرۆيستىك دايىنداۋ ورتالىعىنان جانە وبلىستاعى قىزىلشا ءوسىرۋشى 200-دەن استام شارۋاشىلىقتان جەتكىزىلەدى.

الماتى وبلىسى

پىكىرلەر
رەداكتسيا تاڭداۋى