ساردوباداعى بوگەت جارىلىسىنا كۇدىكتىلەر ۇستالدى

492

وزبەكستان باس پروكۋراتۋراسى ساردوبا سۋ قويماسى بويىنشا قىلمىستىق ءىس اياسىندا العاشقى كۇدىكتىلەر ۇستالعانىن مالىمدەدى. بۇل تۋرالى  Tengrinews.kz حابارلايدى.

"قازىرگى ۋاقىتتا اتالعان قىلمىستىق ءىس بويىنشا ەكى ادام كۇدىكتى رەتىندە ۇستالدى، ولارعا قاتىستى "قاماۋعا الۋ" بۇلتارتپاۋ شاراسى قولدانىلدى. ءىس بويىنشا ءمان-جايدى انىقتاۋعا كەدەرگى كەلتىرۋدىڭ الدىن الۋ ماقساتىندا باسقا مالىمەتتەر جاريالانبايدى", - دەپ حابارلايدى باس پروكۋراتۋرا ءوزىنىڭ Telegram-داعى ارناسىندا.

جەرگىلىكتى باق مالىمەتتەرى بويىنشا، ۇستالعانداردىڭ اراسىندا - سۋ قويماسى نىسانىن دامىتۋ جانە پايدالانۋ جونىندەگى ديرەكتسيانىڭ باسشىسى بار.

ەسكە سالايىق، وزبەكستاندا 1 مامىر كۇنى بولعان جاڭبىر مەن داۋىلدان كەيىن سىرداريا وبلىسىنداعى ساردوبا سۋ قويماسى بوگەتتەرىنىڭ ءبىرى جارىلعان بولاتىن. اپات سالدارىنان، ەلدى مەكەندەرگە، كوممۋنيكاتسيالىق جەلىلەر مەن اۋىل شارۋاشىلىعى الاڭدارىنا ۇلكەن زالال ءتيدى. تۇرعىن ۇيلەر مەن باسقا دا نىساندار سۋ استىندا قالدى.

پىكىرلەر