ارابقا كۇيەۋگە تيگەن قازاق قىزىنىڭ وكىنىشى

4327
Adyrna.kz Telegram

باي-ماناپتار باس سۇعاتىن دۇكەنگە داياشى بوپ ورنالاسقان تالدىقورعاندىق دارينا سۇلۋ ءارى جاس بولاتىن. تاباتىن تابىسى دا جامان ەمەس: 400 مىڭ تەڭگە. ءبىر كۇنى وعان ورتا جاستاعى ارابتىڭ كوزى ءتۇسىپ، ءسوز تاستايدى. از ۋاقىتتا „مەندىك بول„ دەپ قولقا سالادى. „جۇمىس ىستەمەيسىڭ، ءوزىڭنىڭ كۇتۋشىڭ بولادى، باعالى سىيلىقتارمەن ءۇيىپ-توگەمىن، ودان ارتىق نە كەرەك. ماعان ەكىنشى ايەل بولاساڭ، ۇل تۋىپ بەرسەڭ بولعانى„ دەپ قولقا سالادى ول.

قىزدارىن بالا دەپ سانامايدى

الايدا بالا تۋا سالىسىمەن دارينانىڭ ءسان-سالتاناتتى ءومىرى كۇرت وزگەرىپ قويا بەرگەن.

– مەنىڭ كۇيەۋىم وتە باي-قۋاتتى ادام. ول جۇمىسىنىڭ ءاربىر ساعاتىنا جالاقى الادى. ءتىپتى، ءۇشىنشى ايەل الامىن دەسە دە وعان سالماق ەمەس.

بىراق قازىر ول ماعان، ءتىپتى، بالالارىنا دا كومەكتەسپەيدى. ينتەرنەتتىڭ دە اقىسىن تولەمەيدى. ءۇش بالامىز بار. بالالارىم مەكتەپكە دە بارمايدى. ويتكەنى، ول وقۋ اقىسىن تولەگىسى كەلمەيدى. ال قىزدارىن بالا دەپ، مويىندامايدى.

بالالارىمنىڭ بارلىعى ماعان تارتقان، اققۇبا. سودان كەيىن دە ول بالالارىن جاقسى كورمەيتىن سەكىلدى، – دەيدى دارينا.

دۋبايداعى ءومىردى مەن بۇلاي ەلەستەتكەن جوقپىن. مۇندا ءۇي جانۋارى سەكىلدىسىڭ

شىمكەنتتىك مارجان ەسىمدى كەلىنشەك تە جاقسى ءومىردى اڭساپ، اراب ەلىنە بارىپ، تۇتىلىپ قالعانىن ايتادى.

– شەتەلدىك قىزدار ارابتاردىڭ تەك ەكىنشى ايەلى بولا الادى. شاريعات بويىنشا مۇندا ءبىرىنشى ايەل اراب بولعانى دۇرىس. مەنىڭ كۇيەۋىم وتە باي، ونىڭ مەنەن بولەك ءبىرىنشى ايەلى بار. ارينە، دۋبايداعى ءومىردى مەن بۇلاي ەلەستەتكەن جوقپىن. باسىندا ءبارى جاقسى بولدى. ءبىر ادامدى قۇلاي ءسۇيىپ، كۇيەۋگە شىعاسىڭ، بالا تۋاسىڭ، سودان كەيىن ءبارى ءبىتتى دەي بەرىڭىز.

ال مۇندا كۇيەۋىڭنىڭ رۇقساتىنسىز ەشقايدا شىعا المايسىز. ءبىر سوزبەن ايتقاندا، ءوز-وزىڭە تيەسىلى ەمەسسىڭ. ءۇي جانۋارى سەكىلدىسىڭ. اراب ايەلدەرىنىڭ ەشتەڭەگە قۇقىعى جوق.

جۇمىس ىستەۋگە ماعان تىيىم سالىنعان. مەنىڭ بار بىتىرەرىم: ۇيدە وتىرۋ، جۇمىستان كەلەتىن كۇيەۋىمدى قارسى الۋ. ال قانداي دا ءبىر ماسەلە تۋا قالسا، مەنى كىنالى ەتەدى. ءتىپتى، جۇمىستاعى ماسەلەسىنە دە مەن كىنالىمىن. كەيىنگى كەزدە ول قول كوتەرەتىندى شىعاردى. باسىندا ۇندەمەدىم، ارتىنان ونىڭ بارلىعىن بەينەتاسپاعا تۇسىرەتىن بولدىم. پوليتسيا شاقىرعان سوڭ، كۇيەۋىم سابىرعا كەلەدى، باسىلادى.

بالالارىمدى ول قاتتى جاقسى كورەدى. وسى عانا ماعان دەمەۋ، بالالارىم ءۇشىن ءومىر سۇرەمىن!

– دەيدى مارجان.

ءبىراز بولماعاندا، قىزىمىز ەكەۋمىز جەر باسىپ جۇرمەس تە ەدىك

ونىڭ سوزىنە قاراعاندا، اراب امىرلىگىندە جۇرگەن قازاقستاندىق قىزدار كوپ. ايەلدەر ءبىر-بىرىمەن بايلانىس ۇستاپ، ءوزارا تىلدەسىپ تۇرعاندى ءجون كورەدى ەكەن. تاجىريبەلەرىمەن بولىسەدى، كەڭەستەرىمەن الماسادى.

31-جاستاعى قوستانايلىق كەلىنشەك بۇگىندەرى اراب كۇيەۋىمەن اجىراسىپ كەتىپتى، بىراق ول ءالى دۋبايدا  تۇرىپ جاتىر.

„ول ءولىمشى ەتىپ مەنى ساباپ تاستايتىن، ءتىپتى، „ولتىرەمىن„ دەپ قوقان-لوقى كورسەتەتىن. سودان كەيىن مەن ودان اجىراسىپ كەتتىم.

شىنى كەرەك، ەندى ءبىراز بولماعاندا، قىزىمىز ەكەۋمىز جەر باسىپ جۇرمەس تە ەدىك. باقىتىمىزعا وراي، مەن وزىمە كورسەتىلگەن قورلىق-زومبىلىقتى دالەلدەي الدىم، ءسويتىپ ءبىزدى اجىراتتى.

ۇلىما وڭايىراق. ويتكەنى ول ۇل بالا عوي. ال اراب امىرلىگىندە ۇل بالاعا بارلىعى تولەنەدى: باسپانامەن قامتاماسىز ەتەدى، وقۋ اقىسىن تولەيدى، دارىگەرگە تەگىن قارالادى. ال ماعان قازاقستان ازاماتى رەتىندە بارلىعى اقىلى.

مىسالى، دارىگەردىڭ كومەگى كەرەك بولسا، اقىسىن تولەپ قانا قارالا الامىن. مەن اي سايىن جاردەماقى الامىن، ويتكەنى، اراب بالالارىن تاربيەلەپ وتىرمىن عوي„، – دەيدى ول.

بۇل ايتىلعان وقيعالار بەرگى جاعى عانا كورىنەدى. ويتكەنى، اراب ەلدەرىندە ەر ادامنىڭ قۇقىعى جوعارى، سوندىقتان ولار ويىنا كەلگەنىن ىستەي الاتىن كورىنەدى. سوندىقتان مۇندا قورلىققا شىداماي، ءوز ومىرىمەن قوش ايتىساتىن  نازىك جاندىلار كوپ كورىنەدى.

پىكىرلەر