وسىدان 84 جىل بۇرىن، ياعني، 1936 جىلى 18 مامىردا اقىن، مەملەكەت جانە قوعام قايراتكەرى، قازاقستاننىڭ حالىق جازۋشىسى ولجاس ومارۇلى سۇلەيمەنوۆ دۇنيەگە كەلدى.
الماتى قالاسىندا تۋعان. قازاق مەملەكەتتىك ۋنيۆەرسيتەتىنىڭ گەوگرافيا فاكۋلتەتىن ءبىتىرىپ، م.گوركي اتىنداعى ادەبيەت ينستيتۋتىندا وقىعان. «كازاحستانسكايا پراۆدا» گازەتى رەداكتسياسىنىڭ ءبولىم مەڭگەرۋشىسى، «قازاقفيلم» كينوستۋدياسى ستسەناري-رەداكتسيالىق القاسىنىڭ باس رەداكتورى، قازاقستان جازۋشىلار وداعىنىڭ حاتشىسى، قازاق سسر كينەماتوگرافيا جونىندەگى مەملەكەتتىك كوميتەتىنىڭ توراعاسى، قر جوعارعى كەڭەسىنىڭ دەپۋتاتى، قازاقستاننىڭ يتالياداعى توتەنشە جانە وكىلەتتى ەلشىسى قىزمەتتەرىن اتقارعان.
ءوز تۋىندىلارىن ورىس تىلىندە جازادى. ولەڭدەرى مەن پوەمالارىنىڭ العاشقى جيناعى 1961 جىلى «ارعىماقتار» دەگەن اتپەن جارىق كورگەن. ونىڭ ستسەناريى بويىنشا «اتامەكەن»، «كوگىلدىر مارشرۋت»، «قىس - قولايسىز ماۋسىم»، ت.ب. فيلمدەر تۇسىرىلگەن. «از ي يا»، «جازۋ ءتىلى» اتتى ءتىل بىلىمىنە قاتىستى زەرتتەۋلەرى، «نۇرلى تۇندەر»، «مەشىن جىلى»، «كوڭىل كوكجيەگى»، «ءار كۇن - ارايلى تاڭ»، «اق داريا اسپانى»، «جۇمىر جۇلدىز»، «شاپاعاتتى شاق»، «اتامەكەن»، ت.ب. جيناقتارى شىققان.
ءى دارەجەلى «بارىس»، «وتان»، ەڭبەك قىزىل تۋ، «قۇرمەت بەلگىسى»، قازان رەۆوليۋتسياسى وردەندەرىمەن، مەدالدارمەن ماراپاتتالعان.
يادرولىق سىناققا قارسى «سەمەي-نەۆادا» قوزعالىسىنىڭ كوشباسشىسى، قازاق سسر-ءىنىڭ اباي اتىنداعى مەملەكەتتىك سىيلىعىنىڭ، قازاقستان كومسومولى، بلكجو سىيلىعىنىڭ لاۋرەاتى، تاتارستان رەسپۋبليكاسىنىڭ ش.مارجاني اتىنداعى تاريح ينستيتۋتىنىڭ قۇرمەتتى دوكتورى. قازاقستاننىڭ يۋنەسكو جانىنداعى تۇراقتى وكىلى بولدى.
فوتو: ينتەرنەت جەلىسىنەن
