ەۋروپالىق وداق قازاقستان اۋماعىندا بوسقىنداردى ورنالاستىرۋ ورتالىقتارىن قۇرۋ ماسەلەسى بويىنشا ەشقانداي كەلىسسوز جۇرگىزىپ جاتقان جوق. بۇل تۋرالى قازاقستانداعى ەۋروپالىق وداقتىڭ ەلشىسى الەشكا سيمكيچ ايتتى، دەپ حابارلايدى "ادىرنا".
ونىڭ ايتۋىنشا، ەو قابىلداعان جاڭارتىلعان كوشى-قون پاكتى ءۇش نەگىزگى باعىتقا نەگىزدەلگەن. ءبىرىنشىسى – زاڭسىز كوشى-قوننىڭ الدىن الۋ جانە ادام ساۋداسىمەن اينالىساتىن قىلمىستىق توپتارعا قارسى كۇرەس. ەكىنشىسى – سوعىس پەن قۋدالاۋدان قاشقان ادامدارعا حالىقارالىق قورعاۋ كورسەتۋ. ءۇشىنشىسى – ەۋروپاعا بىلىكتى مامانداردى تارتۋ.
ەلشى جاڭا پاكت اياسىندا ەنگىزىلگەن ەكى ماڭىزدى وزگەرىسكە دە توقتالدى. ەندى ەۋروپالىق وداققا مۇشە مەملەكەتتەر باسپانا سۇراعان ازاماتتاردىڭ ءوتىنىشىن ولاردى ەل اۋماعىنا كىرگىزبەي-اق، شەكارادا قابىلداپ، 12 اپتاعا دەيىن قاراي الادى. وسى مەرزىمنەن كەيىن ءوتىنىش بويىنشا شەشىم قابىلدانادى.
سونداي-اق جاڭا ەرەجەلەرگە سايكەس، باسپانا الۋ تۋرالى ءوتىنىشى قاناعاتتاندىرىلماعان ءارى ەو اۋماعىندا قالۋعا قۇقىعى جوق ادامداردى ولاردىڭ تۋعان ەلىنە ەمەس، ءۇشىنشى مەملەكەتكە جىبەرۋ مۇمكىندىگى قاراستىرىلعان. الايدا الەشكا سيمكيچ بۇل نورما ءالى تولىق زاڭنامالىق كۇشىنە ەنبەگەنىن ايتتى.
ەلشىنىڭ سوزىنشە، قازاقستاندا بوسقىندار لاگەرىن اشۋ تۋرالى اقپاراتتار نەگىزسىز بولجامداردان تۋعان.
«ەۋروپالىق وداق تا، ەۋروپالىق كوميسسيا دا قازىرگى ۋاقىتتا ەشبىر مەملەكەتپەن، سونىڭ ىشىندە قازاقستانمەن دە، ونى ءۇشىنشى ەل رەتىندە پايدالانۋ جونىندە كەلىسسوزدەر جۇرگىزىپ جاتقان جوق. مۇنداي باستامالاردى ەو ەمەس، مۇشە مەملەكەتتەردىڭ وزدەرى كوتەرۋى مۇمكىن. مىسالى، يتاليا مەن البانيا اراسىندا وسىنداي كەلىسىم بار. بولاشاقتا قانداي دا ءبىر ەل قازاقستانعا نەمەسە وزبەكستانعا ۇسىنىس جاساۋى مۇمكىن، بىراق بۇل سول مەملەكەتتىڭ ەگەمەن شەشىمى بولادى. قازىرگى ۋاقىتتا قازاقستانمەن مۇنداي كەلىسسوزدەر جۇرگىزىلگەن جوق جانە جۋىق ارادا جوسپارلانىپ وتىرعان جوق»، – دەدى ول.
الەشكا سيمكيچ ەۋروپالىق وداقتىڭ قازاقستان اۋماعىندا بوسقىندارعا ارنالعان لاگەرلەر سالۋ ماسەلەسىن كۇن تارتىبىنە شىعارماعانىن تاعى ءبىر مارتە اتاپ ءوتتى. ونىڭ ايتۋىنشا، مۇنداي شەشىمدەر تەك ءتيىستى مەملەكەتتىڭ كەلىسىمىمەن عانا قابىلدانادى جانە ەو ولاردى بىرجاقتى تۇردە جۇزەگە اسىرا المايدى.
