شىمكەنت: "2-10-20" تۇرعىن ءۇي باعدارلاماسىنا قاتىسۋشىلار ساناتىنا وزگەرىس ەنگىزىلدى

2220
Adyrna.kz Telegram

«تۇرعىن ءۇي قۇرىلىس جيناق بانكىنىڭ» شىمكەنت قالالىق فيليالى “2-10-20” باعدارلاماسى بويىنشا وتىنىمدەر 18 مامىر مەن 30 مامىر ارالىعىندا قابىلدانادى. قازىر باعدارلاماعا قاتىسۋشىلار ساناتىنا وزگەرىستەر ەنگىزىلدى. بۇل جونىندە شىمكەنت قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ع. تولەپوۆ اقپاراتتىق-كوممۋنيكاتسيالىق ورتالىعىندا وتكەن ءباسپاسوز بريفينگىندە مالىمدەدى.

بيىل “باقىتتى وتباسى” تۇرعىن ءۇي باعدارلاماسى بويىنشا باسپانالى بولاتىندار سانى ارتاتىنى بەلگىلى. سەبەبى، باعدارلاماعا قاتىسا الاتىن ازاماتتار ساناتى ارتىپ وتىر.

ەندى «2-10-20» باعدارلاماسىنا تۇرعىن ۇيگە مۇقتاجدار ەسەبىندە كەلەسى ساناتتار بويىنشا تۇرعان ازاماتتار قاتىسا الادى:

- "التىن القا", "كۇمىس القا" القالارىمەن ماراپاتتالعان نەمەسە بۇرىن "باتىر انا" اتاعىن العان، سونداي-اق ءى جانە ءىى دارەجەلى "انا داڭقى" وردەندەرىمەن ماراپاتتالعان كوپ بالالى انالار، كوپ بالالى وتباسىلار;

- تولىق ەمەس وتباسىلار;

- مۇگەدەك بالالارى بار نەمەسە ولاردى تاربيەلەپ وتىرعان جانۇيالار بولۋى ءتيىس.

ال، نەسيە سوماسىنىڭ 10 پايىزى كولەمىندەگى العاشقى جارنا بولعان جاعدايدا جىلىنا 2% مولشەرلەمەمەن نەسيە بەرىلەدى. مەرزىمى – 20 جىلعا دەيىن. ءۇيدى مەرزىمىنەن بۇرىن ساتىپ الۋ كەزەڭىندە ەڭ جوعارعى قارىز سوماسى - 15 ملن تەڭگە.

باعدارلاماعا قاتىسۋ ءۇشىن، قر ازاماتى بولۋى شارت جانە وتباسىنىڭ ءاربىر مۇشەسىنە شاققاندا ايىنا كىرەتىن تابىس كوزى ەڭ تومەنگى كۇنكورىس دەڭگەيىنەن اسپايتىن بولۋى كەرەك. نەكە بۇزىلعان ساتتەن باستاپ 3 جىلدىق مەرزىمنىڭ ءوتۋى جانە تولەم قابىلەتتىلىگىن راستاۋى مەن جەرگىلىكتى اتقارۋشى ورگاننىڭ كوزدەلگەن ساناتتاعى قاتىسۋشىلار بويىنشا تۇرعىن ۇيگە مۇقتاج ادامنىڭ ەسەپكە قويىلۋىن جانە تۇرعىن ۇيگە مۇقتاج ادامنىڭ مارتەبەسىن راستاۋى بولۋى شارت.

قاجەتتى قۇجاتتار ءتىزىمى:
1) جەكە كۋالىك (وتباسى مۇشەلەرىن كۋالاندىراتىن قۇجاتتارىنىڭ كوشىرمەلەرى);
2) بالالاردىڭ تۋ تۋرالى كۋالىكتەرىنىڭ كوشىرمەلەرى;
3) نەكە تۋرالى نەمەسە نەكەنىڭ بۇزىلعاندىعىن راستايتىن كۋالىك;
4) تولەم قابىلەتتىلىگىن راستاۋ ءۇشىن جۇمىس ورنىنان سوڭعى 6 ايلىق كورسەتكىش.

يندۋستريا جانە ينفراقۇرىلىمدىق دامۋ مينيسترلىگى وڭىرلەر بويىنشا كرەديت بەرۋ ليميتتەرىن كەزەكتەگىلەردىڭ سانى مەن قارىزدىڭ ەڭ جوعارى سوماسىنىڭ مولشەرىنە قاراي بارابار ءبولۋدى كوزدەيدى. سوندىقتان دا
تۇرعىن ءۇي جانە تۇرعىن ءۇي ينسپەكتسياسى باسقارماسى كەزەكتە تۇرعانداردىڭ مارتەبەسىن تەكسەرۋ ارقىلى باعدارلاماعا قاتىسۋشىلارعا جەكە تىزىمدەرگە سايكەس كەزەكتىلىك تارتىبىمەن جانە ۋاكىلەتتى ورگان بەلگىلەگەن ليميتتەر شەڭبەرىندە تۇرعىن ءۇي قۇرىلىس جيناق بانكىسىنە ۇسىنۋ ءۇشىن جولداما جىبەرەدى. تۇرعىن ءۇي قۇرىلىس جيناق بانكىسى قاتىسۋشىلارعا قاتىستى قارىزداردى رەسىمدەگەنى ءۇشىن كوميسسيا المايدى.

قوسىمشا ساۋالدار تۋىنداسا، call-ورتالىعىنان كەڭەس الۋعا بولادى، تەلەفونى – 39-23-68. وتىنىمدەر ەلەكتروندى تۇردە "Shymkent-baspana.kz" سايتىندا قابىلدانادى.

شىمكەنت

پىكىرلەر