وسىدان 79 جىل بۇرىن، ياعني، 1941 جىلى 14 مامىردا بەلگىلى اكتەر، قازاقستان رەسپۋبليكاسىنىڭ حالىق ءارتىسى، سسسر مەملەكەتتىك سىيلىعىنىڭ لاۋرەاتى نۇرجۇمان بايجۇمانۇلى ىقتىمباەۆ دۇنيەگە كەلدى.
الماتى وبلىسى كەربۇلاق اۋدانىندا تۋعان. الماتى مۋزىكا ۋچيليششەسىن، پانفيلوۆ پەداگوگيكالىق ۋچيليششەسىن جانە «قازاقفيلم» ستۋدياسى جانىنداعى اكتەرلىك ستۋديانى بىتىرگەن، قازاق مەملەكەتتىك پەداگوگيكالىق ينستيتۋتىن تامامداعان.
كينوداعى مانسابى كەزدەيسوق باستالعان. بولاشاق كينواكتەردىڭ اۋىلىنا كەلگەن «مازاسىز تاڭ» ءفيلمىنىڭ ءتۇسىرۋ توبى ونى فيلمگە تۇسىرۋگە شاقىرادى.
1968 جىلدان «قازاقفيلم» كينوستۋدياسىنىڭ اكتەرى. اكتەر كينودا ارقيلى بولمىستى، مىنەزدى كەيىپكەرلەر بەينەسىن جاسادى، مىسالى، «ادامدار اراسىنداعى بولتىرىكتەگى» تۇيىق، قاتاڭ مىنەزدى، «ستالينگە سىيلىقتاعى» جۇمساق مىنەزدى، بىراق بىربەتكەي، ال «بارلاۋشىداعى» قاراپايىم، شىعىسقا ءتان دانالىق كورىنەتىن كەيىپكەرلەر، تاعى باسقالار.
اكتەردىڭ سوڭعى جۇمىستارىنان فرانتسۋز اكتەرى ج. دەپاردەمەن بىرلەسىپ تۇسكەن «كەش ويانعان ماحاببات» ءفيلمىن اتاۋعا بولادى. اكتەر انيماتسيالىق لەنتالاردى دىبىستاۋعا دا قاتىسادى («قادىردىڭ باقىتى»، 2000).
2007 جىلى «جول قاراۋشى» فيلمىندەگى ءرولى ءۇشىن «ادال جۇرەك» كينوفەستيۆالىندە باس جۇلدەنى، 2009 جىلى «شاكەن جۇلدىزدارى» فەستيۆالىنىڭ ەڭ ۇزدىك اكتەرى، 2009 جىلى چەبوكسارىداعى مكف - «ستالينگە سىيلىق»، «ەڭ ۇزدىك ەر ادام ءرولى ءۇشىن» سىيلىعىن، قاسىم ءرولى ءۇشىن بۇكىلامەريكالىق ونەردى قولداۋ قاۋىمداستىعىنىڭ ارنايى جۇلدەسىنە («ستالينگە سىيلىق») يە بولعان.
فوتو: ينتەرنەت جەلىسىنەن
