قوستانايدا زورلىق كوردىم دەپ شاعىمدانعان 22 جاستاعى قىزعا قاتىستى ءىس تەرگەلىپ جاتىر، - دەپ حابارلايدى Tengrinews.kz.
قوستانايلىق لاۋرا سۇندەت الەۋمەتتىك جەلىلەردە بەلگىسىز بىرەۋدىڭ ونى زورلاماق بولعانىن، سالدارىنان ۇرىپ-سوققانىن جازعان بولاتىن.
"وسى ءىس تۋرالى ايتقىم كەلەدى، سەبەبى ماعان مورالدىق جانە فيزيكالىق زاقىم كورسەتىلدى. ءبىزدىڭ پوليتسەيلەر مەنى كىنالى ەتىپ شىعارعانىن قالامايمىن", - دەيدى لاۋرا.
پوليتسەيلەردىڭ مالىمەتىنشە، بۇل وقيعا 10 مامىرعا قاراعان ءتۇنى بولعان. سول كۇنى 8 ادام وتىرىس ۇيىمداستىرعان.
"قازىرگى ۋاقىتتا سوت-مەديتسينالىق ساراپتاما تاعايىندالدى. ساراپتاما ناتيجەسى بويىنشا دەنساۋلىققا كەلتىرىلگەن زاقىم دەڭگەيى انىقتالادى. قر قىلمىستىق كودەكسىنىڭ 121-بابى بويىنشا ("سەكسۋالدىق سيپاتتاعى زورلىق-زومبىلىق ارەكەتتەرى") سوتقا دەيىنگى تەرگەۋ باستالدى. زارداپ شەككەن قىزدىڭ ءوزى دە جاۋاپكەرشىلىككە تارتىلادى. سونداي-اق، وتىرىستا بولعان بارلىق ادام توتەنشە جاعداي رەجيمىن بۇزعانى ءۇشىن جاۋاپكەرشىلىككە تارتىلادى", - دەدى پوليتسەيلەر.
زارداپ شەككەن قىزدىڭ ءوزى توتەنشە جاعداي رەجيمىن بۇزعانىن مويىنداپ وتىر جانە ول جاۋاپكەرشىلىك تارتاتىنىن ايتادى. بىراق ەر ادامنىڭ دا جازالانعانىن قالايتىنىن ايتادى.
لاۋرانىڭ ادۆوكاتى جانار شاپاگۇلوۆانىڭ ايتۋىنشا، زارداپ شەككەن قىز قىتايدا جۇمىس ىستەيدى. كارانتين كەزىندە قوستانايعا كەلگەن.
لاۋرا ايىپتاپ وتىرعان ەر ادام بولسا قانداي دا ءبىر پىكىر بىلدىرۋدەن باس تارتىپ وتىر.
