جوعارعى وقۋ ورنىندا ءبىلىم بەرۋ پروتسەسىن ۇيىمداستىرۋدا ماگيسترانتتار ءۇشىن تاجىريبەدەن ءوتۋ – بىلىكتىلىكتەرىن ارتتىرۋ ماقساتىندا جاسالاتىن ماڭىزدى قادامداردىڭ ءبىرى. وسى ورايدا ءال-فارابي اتىنداعى قازۇۋ-دىڭ ءبىرىنشى كۋرس ماگيسترانتتارى وقۋ جىلىنىڭ ەكىنشى جارتى جىلدىعىندا ون بەس اپتا بويى وقۋ تاجىريبەسىنەن وتۋدە. ءتورت جىل باكالاۆر بولىمىندە جانە قوسىمشا ماگيستراتۋرانىڭ العاشقى سەمەسترلەرىندە جيناعان بىلىمدەرىن سارالاي وتىرىپ ستۋدەنتتەرمەن جۇمىس ىستەۋگە بەيىمدەلۋدە. وقۋ تاجىريبەسىنەن ءوتۋشى ماگيسترانت رەىندە العاشقى اپتالاردا ءدارىس جانە سەمينار ساباقتارىنا قاتىسىپ ساباقتى قالاي وتكىزۋ كەرەكتىگى تۋرالى تاجىريبە جيناسام، كەيىنگى اپتالاردا ءوزىم ساباق جۇرگىزۋ ارقىلى بارلىق ءبىلىمىمدى ءىس جۇزىندە شىڭدادىم. تاجىريبە بارىسىندا ستۋدەنتتەرمەن بەلسەندى جۇمىس ىستەۋ ءۇشىن قاجەت تومەندەگىدەي ماسەلەلەرگە باسا نازار اۋداردىم:
- بىرىنشىدەن، وقۋ تاجىريبەسىنەن ءوتۋ كەزىندە ۇعىنعانىم: ءار ءبىلىم بەرۋشى ءوزىنىڭ الدىنداعى ستۋدەنتتەن بىرنەشە قادام الدىدا بولۋى جانە كەز كەلگەن سۇراعىنا تولىق ءارى ناقتى جاۋاپ بەرۋگە ءازىر بولۋى كەرەك;
- سەمينار ساباقتارىن جۇرگىزۋدە جاڭا تاقىرىپ بويىنشا ستۋدەنتتىڭ ءبىلىم دەڭگەيىن انىق كورسەتەتىن ۇتىمدى ءارى قىزىقتى سۇراق قويا ءبىلۋ قاجەت;
- الدىڭداعى ءار ءبىلىم الۋشىنىڭ پسيحيكالىق ەرەكشەلىكتەرىن نازاردا ۇستاي وتىرىپ ارقايسىنا ينديۆيدۋالدى قارىم-قاتىناس جاساۋعا داعدىلانۋ كەرەك;
- ماگيسترانتتاردىڭ جاس ەرەكشەلىگىنە بايلانىستى ساباقتا تىم ەركىنسىپ كەتكەن ستۋدەنتتەرگە بىردەن وقۋ پروتسەسىنىڭ ماڭىزدىلىعىن ۇعىندىرۋ قاجەت;
- سونداي-اق جاڭا يدەيالاردى جۇزەگە اسىرۋ ارقىلى ساباقتى بارىنشا قىزىقتى وتكىزۋگە تىرىسۋ كەرەك;
- تەك وقىتۋشى رەتىندە عانا ەمەس، ءارى تۇلعا رەتىندە ستۋدەنتتەرگە ۇلگى بولارلىقتاي قىرىڭنان تانىلۋ كەرەك.
ءبىلىم بەرۋ ۇدەرىسى تاجىريبە جەتەكشىسىنىڭ قاداعالاۋىمەن وتەتىندىكتەن ساباق سوڭىندا جاسالعان قاتەلىكتەر، كورىنگەن كەمشىلىكتەر جانە بايقالعان ارتىقشىلىقتاردى جەتەكشىنىڭ ەسكەرتىپ وتىرۋى كەز كەلگەن ماگسيترانت ءۇشىن وتە پايدالى. سەبەبى سول ارقىلى ون بەس اپتادا ءبىر ساباققا قاراعاندا كەلەسى ساباقتى ودان دا جاقسىراق وتكىزۋگە تالپىنىس پايدا بولادى. «تاجىريبە» دەپ اتى ايتىپ تۇرعانداي ماگيسترانتتار ءدارىس جۇرگىزۋ، سەمينار ساباقتارىن وتكىزۋ، اۋديتوريامەن قارىم-قاتىناس جاساۋ، ساباق سۇراۋ، ستۋدەنتتەردى باعالاۋ، دۇرىس سۇراق قويۋ دەگەن سەكىلدى كوپتەگەن ماسەلەلەر بويىنشا مول تاجىريبە جينايدى. ماگيسترانت رەتىندە جاڭا ءبىلىم الۋ بىلىكتىلىگىڭدى ارتتىرۋعا، عالىم، وقىتۋشى، جالپى مىقتى مامان بولۋعا جاسالاتىن العاشقى قادام ەكەنى انىق. ال وقۋ تاجىريبەسىنەن ءوتۋ – سول بىلىمىڭدى ءىس جۇزىندە پايدالانىپ، وقىتۋشى رەتىندە ءوزىڭدى تەكسەرىپ، دامىتىپ، الدىعا جىلجىتاتىن تاعى ءبىر ناقتى ءارى نەگىزگى قادام. سەبەبى جاڭا زامان تالابىنا ساي زاماناۋي ماگسيترانت مودەلى – ءبىلىمى مەن بىلىگى ۇشتاسقان، جان-جاقتى شىڭدالعان، تەحنيكانى تولىق مەڭگەرىپ، بىرەنەشە تىلدە ەركىن سويلەي الاتىن امبەباپ تۇلعا.
مەرۋەرت يمانگازينا
ءال – فارابي اتىنداعى قازاق ۇلتتىق ۋنيۆەرسيتەتى
فيلولوگيا جانە الەم تىلدەرى فاكۋلتەتىنىڭ
1-كۋرس ماگيسترانتى
كۋراتور-ەدۆايزەرى فيلولوگيا عىلىمدارىنىڭ كانديداتى، دوتسەنت ل.ت.الىمتاەۆا
