قۇرىلىس سالاسىنداعى ماماندار وزبەكستاننىڭ سىرداريا وبلىسىنداعى قايعىلى وقيعاعا سۋ قويماسىن سالۋ كەزىندەگى كوررۋپتسيا سەبەپ بولدى دەپ ەسەپتەيدى. بۇل تۋرالى centralasian.org حابارلادى.
1 مامىردا وزبەكستاندا ساردوبا سۋ قويماسى جارىلىپ، اينالاسىنداعى ەلدى مەكەندەردى سۋ الدى. 70 مىڭ ادام كوشىرىلدى. كەيىنىرەك تۇركىستان وبلىسى ماقتاارال اۋدانىنداعى بىرنەشە ەلدى مەكەنگە سۋ كىرىپ، اۋداندا توتەنشە جاعداي جاريالاندى.
ساردوبا سۋ قويماسى – وزبەكستانداعى ءبىرىنشى ءىرى سۋ نىسانى. ونىڭ قۇرىلىسى شاۆكات ميرزياەۆتىڭ ۇسىنىسىمەن، ول پرەمەر-مينيستر بولىپ تۇرعاندا باستالىپ، پرەزيدەنت بولعاندا اياقتالعان.
سۋ شارۋاشىلىعى مينيسترلىگىنىڭ وكىلى شاريفجون كۋچكاروۆ ازىرگە بوگەتتىڭ بۇزىلۋىنا "قاتتى داۋىل" سەبەپ بولدى دەگەن بولجام ايتىپ وتىر.
– قاتتى داۋىلدان سۋ تولقىنى كوتەرىلدى. بوگەتتىڭ ەڭ جوعارعى بيىكتىگى 32 مەتر، ەڭ تومەنگىسى – 28 مەتردى قۇرايدى. تومەنگى بولىگى قاتتى تولقىننان بۇزىلىپ، سۋمەن شايىلىپ كەتتى. ءبىزدىڭ بولجام بويىنشا، سوڭعى 2-3 كۇندەگى قاتتى داۋىلدان بوگەت بۇزىلدى. ودان كەيىن 3-4 كۇن نوسەر جاۋىن جاۋدى. وسى كەزەڭدە سۋ قويماسى 24 ساعات بويى باقىلاۋدا بولدى، – دەدى مينيسترلىكتىڭ وكىلى.
الايدا قۇرىلىس جانە سۋ قويماسى سالاسىنداعى ماماندار سىرداريا وبلىسىندا ورىن العان قايعىلى وقيعاعا بوگەت قۇرىلىسىنا دەپ بولىنگەن قارجىنىڭ ۇرلانۋى سەبەپ بولعان دەپ ەسەپتەيدى.
– ەگەر نىساندى سالىپ جاتقان كەزدە، ەشقانداي اقشا ۇرلانباي، بولىنگەن قارجىنىڭ ءبارىن قۇرىلىسقا جۇماساسا، ەشقانداي بوگەتتى سۋ شايىپ كەتپەس ەدى. سۋ قويماسىنىڭ كولەمى ۇلكەن. قۇرىلىسقا 25 ميلليون دوللار بولىنگەن. قازىرگى كەزدە قۇرىلىستان اقشا ۇرلاۋ قيىن ەمەس. ماسەلەن، نىعىزداۋعا 1000 تەكشە مەتر قۇم كەرەك بولسا، وعان 500 تەكشەمەتر جۇمسايدى. مىسالى، مەن – قۇرىلىسشىمىن، قۇم الۋ ءۇشىن زاۋىتپەن كەلىسىم-شارتقا وتىرامىن. قۇجات بويىنشا 1000 تەكشەمەتر قۇم ساتىپ الامىن دا، 10 مىڭ دوللار اۋدارامىن. بىراق شىن مانىندە 500 تەكشە مەتر قۇم الامىن. كەيىن زاۋىت وكىلى ەسەپشوتقا اۋدارىلعان قالعان قارجىنى ماعان قولما-قول قايتارادى. مۇنى قازىرگى تىلمەن "وتكات" دەپ اتايدى. بۇگىن مۇنداي سحەما بارلىق قۇرىلىس سالاسىندا ءجۇرىپ جاتىر، – دەيدى مامان.
ماماننىڭ بۇل پىكىرىن ساردوبا سۋ قويماسىن سالۋعا قاتىسقان قۇرىلىسشىنىڭ ءبىرى راستادى.
– مەن بۇل سۋ قويماسىنىڭ قۇرىلىسىن جۇرگىزۋگە قاتىستىم. وعان تاس الدەقايدا از مولشەردە قولدانىلعانىن جاقسى بىلەمىن. جۇك كولىكتەرىنە قۇرىلىس سالاسىنا دەپ ارتىلعان قيىرشىق تاس پەن ءىرى تاس جولشىباي ساتىلىپ كەلگەن. قازىر "چيمكۋرگاندا" سۋ قويماسى سالىنىپ جاتىر. وندا دا ءدال وسىنداي جاعداي ورىن الىپ جاتىر، – دەيدى قۇرىلىسشى.
ساردوبا سۋ قويماسىن سالۋشى "تۋپالانگ-گيدرو كۋريليش" كومپانياسى. ازاتتىقتىڭ وزبەك قىزمەتىنىڭ سەنىمدى دەرەككوزىنىڭ بەرگەن مالىمەتى بويىنشا، بۇل كومپانيا "وزبەكگيدروەنەرگو" كومپانياسىنىڭ باسقارما باسشىسى، سەناتور ابدۋگاني سانگينوۆقا تيەسىلى.
– وزبەكستاندا بارلىق سۋ قويماسىن ابدۋگاني سانگينوۆقا تيەسىلى كومپانيالار سالادى. بۇل – ونىڭ مونوپولياسى. "تۋپالانگ-گيدرو كۋريليش" تا سونىڭ كومپانياسى. سالىقتان جالتارۋ ءۇشىن، ءار ءۇش جىل سايىن كومپانيا اتىن وزگەرتىپ وتىرادى، – دەيدى دەرەككوز.
