Qurylys salasyndaǵy mamandar Ózbekstannyń Syrdarııa oblysyndaǵy qaıǵyly oqıǵaǵa sý qoımasyn salý kezindegi korrýpııa sebep boldy dep esepteıdi. Bul týraly centralasian.org habarlady.
1 mamyrda Ózbekstanda Sardoba sý qoımasy jarylyp, aınalasyndaǵy eldi mekenderdi sý aldy. 70 myń adam kóshirildi. Keıinirek Túrkistan oblysy Maqtaaral aýdanyndaǵy birneshe eldi mekenge sý kirip, aýdanda tótenshe jaǵdaı jarııalandy.
Sardoba sý qoımasy – Ózbekstandaǵy birinshi iri sý nysany. Onyń qurylysy Shavkat Mırzııaevtiń usynysymen, ol premer-mınıstr bolyp turǵanda bastalyp, prezıdent bolǵanda aıaqtalǵan.
Sý sharýashylyǵy mınıstrliginiń ókili Sharıfjon Kýchkarov ázirge bógettiń buzylýyna "qatty daýyl" sebep boldy degen boljam aıtyp otyr.
– Qatty daýyldan sý tolqyny kóterildi. Bógettiń eń joǵarǵy bıiktigi 32 metr, eń tómengisi – 28 metrdi quraıdy. Tómengi bóligi qatty tolqynnan buzylyp, sýmen shaıylyp ketti. Bizdiń boljam boıynsha, sońǵy 2-3 kúndegi qatty daýyldan bóget buzyldy. Odan keıin 3-4 kún nóser jaýyn jaýdy. Osy kezeńde sý qoımasy 24 saǵat boıy baqylaýda boldy, – dedi mınıstrliktiń ókili.
Alaıda qurylys jáne sý qoımasy salasyndaǵy mamandar Syrdarııa oblysynda oryn alǵan qaıǵyly oqıǵaǵa bóget qurylysyna dep bólingen qarjynyń urlanýy sebep bolǵan dep esepteıdi.
– Eger nysandy salyp jatqan kezde, eshqandaı aqsha urlanbaı, bólingen qarjynyń bárin qurylysqa jumasasa, eshqandaı bógetti sý shaıyp ketpes edi. Sý qoımasynyń kólemi úlken. Qurylysqa 25 mıllıon dollar bólingen. Qazirgi kezde qurylystan aqsha urlaý qıyn emes. Máselen, nyǵyzdaýǵa 1000 tekshe metr qum kerek bolsa, oǵan 500 tekshemetr jumsaıdy. Mysaly, men – qurylysshymyn, qum alý úshin zaýytpen kelisim-shartqa otyramyn. Qujat boıynsha 1000 tekshemetr qum satyp alamyn da, 10 myń dollar aýdaramyn. Biraq shyn máninde 500 tekshe metr qum alamyn. Keıin zaýyt ókili esepshotqa aýdarylǵan qalǵan qarjyny maǵan qolma-qol qaıtarady. Muny qazirgi tilmen "otkat" dep ataıdy. Búgin mundaı shema barlyq qurylys salasynda júrip jatyr, – deıdi maman.
Mamannyń bul pikirin Sardoba sý qoımasyn salýǵa qatysqan qurylysshynyń biri rastady.
– Men bul sý qoımasynyń qurylysyn júrgizýge qatystym. Oǵan tas áldeqaıda az mólsherde qoldanylǵanyn jaqsy bilemin. Júk kólikterine qurylys salasyna dep artylǵan qıyrshyq tas pen iri tas jolshybaı satylyp kelgen. Qazir "Chımkýrganda" sý qoımasy salynyp jatyr. Onda da dál osyndaı jaǵdaı oryn alyp jatyr, – deıdi qurylysshy.
Sardoba sý qoımasyn salýshy "Týpalang-gıdro kýrılısh" kompanııasy. Azattyqtyń ózbek qyzmetiniń senimdi derekkóziniń bergen málimeti boıynsha, bul kompanııa "Ózbekgıdroenergo" kompanııasynyń basqarma basshysy, senator Abdýganı Sangınovqa tıesili.
– Ózbekstanda barlyq sý qoımasyn Abdýganı Sangınovqa tıesili kompanııalar salady. Bul – onyń monopolııasy. "Týpalang-gıdro kýrılısh" ta sonyń kompanııasy. Salyqtan jaltarý úshin, ár úsh jyl saıyn kompanııa atyn ózgertip otyrady, – deıdi derekkóz.
