پرەزيدەنت قاسىم-جومارت توقاەۆ قازىر كينوتەاتردا كورسەتىلەتىن فيلمدەرگە قاتىستى قوعامدىق سىن بار ەكەنىن باسا ايتتى، بۇل تۋرالى ول بۋرابايدا وتكەن قۇرىلتايدا مالىمدەدى، دەپ حابارلايدى “ادىرنا” ۇلتتىق پورتالى.
«بىلتىر قازاقستاندىق ماماندار تۇسىرگەن 94 فيلم شىققان، ياعني، نەگىزىنەن ءوزىمىزدىڭ ءونىم شىعارىلىپ جاتىر. بۇل – جاقسى ءۇردىس. بىراق ءبىز ەڭ الدىمەن سانعا ەمەس، ساپاعا كوڭىل اۋدارۋىمىز كەرەك.
بۇگىندە فيلمدەردىڭ باسىم كوپشىلىگى مەملەكەتتىك تاپسىرىسپەن ەمەس، جەكە قارجىعا تۇسىرىلۋدە. كينو ماڭىزدى يدەولوگيالىق قۇرال ەكەنىن ءبارىمىز جاقسى تۇسىنەمىز. سوندىقتان جەكە قارجىعا تۇسىرىلسە دە، ءفيلمدى كينوتەاترعا شىعارماس بۇرىن الدىن الا سۇزگىدەن وتكىزۋ جولدارىن قاراستىرعان ءجون»، - دەدى پرەزيدەنت.
سونداي-اق مۋلتفيلمدەر ماسەلەسى دە نازاردان تىس قالمادى.
پرەزيدەنت جاقىندا شىققان «شوقان. قاشقاريا ساپارى» دەگەن مۋلتفيلمگە وتە جاقسى تۋىندى دەپ باعا بەردى. ول قازاق تىلىندە ۇلتتىق ناقىشتا تۇسىرىلگەن وسىنداي مۋلتفيلمدەر كوپ بولۋى قاجەت ەكەنىن ايتتى.
«بۇل – ۇلت بولاشاعىنا تىكەلەي ىقپال ەتەتىن ماسەلە. سوندىقتان انيماتسيانى دامىتۋ ماسەلەسىن قولعا الۋ كەرەك»، - دەدى مەملەكەت باسشىسى.
