قازاقستانداعى توتەنشە جاعدايعا بايلانىستى مەملەكەت باسشىسى قاسىم-جومارت توقاەۆتىڭ قۇزىرەتى ارتاتىن بولدى. بۇل تۋرالى ءماجىلىس دەپۋتاتتارىنىڭ وتىرىسىندا تالقىلاندى، - دەپ حابارلايدى zhasalash سايتى.
قر ۇلتتىق ەكونوميكا ءمينيسترى رۋسلان دالەنوۆ توتەنشە جاعداي تۋرالى زاڭعا 14 باعىت بويىنشا جاڭارتۋلار ەنگىزىلگەنىن ءمالىم ەتتى.
«بۇل بانكتىك، سالىقتىق، بيۋدجەتتىك، كەدەندىك، مەملەكەتتىك ساتىپ الۋ جانە تاعى باسقا باعىتتار. ەلىمىزدە توتەنشە جاعداي كەزىندە وسى سالالارداعى رەتتەۋ شارالارى ەرەكشەلىككە يە بولادى. سەبەبى اتالعان سالالار ەلىمىزدىڭ ەكونوميكاسىنا تىكەلەي اسەر ەتەدى. سوندىقتان ولاردى قاداعالاۋعا تيىسىنشە كوڭىل ءبولۋ كەرەك»،-دەدى مينيستر.
اتالمىش زاڭ جوباسىنا سايكەس، ەل پرەزيدەنتى توتەنشە جاعداي كەزىندە قاجەت بولعان جاعدايدا قيىندىق تۋعىزعان كەز كەلگەن ماسەلەگە ارالاسا الادى. بۇل مەملەكەتتىڭ ەكونوميكالىق قاۋىپسىزدىگى ءۇشىن ماڭىزدى. ۇلتتىق ەكونوميكا ءمينيسترى تج كەزىندە قابىلدانعان زاڭ اكتىلەرى رەجيم اياقتالعانشا زاڭدىق كۇشكە يە ەكەنىن اتاپ ءوتتى.
"ادىرنا" ۇلتتىق پورتالى
