ەرنار ايدار ۇيىمداستىرعان ۇتىستا سىيلىققا بەرىلەتىن كولىكتەر جالعا الىنعان
الماتى قالاسى ەكونوميكالىق تەرگەۋ دەپارتامەنتى مەن پوليتسيا قىزمەتكەرلەرى الەۋمەتتىك جەلىدە جالعان لوتەرەيا ويىنىن ۇيىمداستىرعانداردى انىقتادى. ولاردىڭ اراسىندا ەلگە تانگىمال ءانشى ەرنار ايدار دا بار دەپ حابارلايدى ەكونوميكالىق تەرگەۋ دەپارتامەنتى ءباسپاسوز قىزمەتى.
"بۇل توپ 2020 جىلدىڭ 23 اقپان مەن 23 ءساۋىر ارالىعىندا وتە قىمبات ۇتىس سىيلىقتارىن - ياعني 4 اۆتوكولىك (2 سەدان جانە 2 دجيپ), الماتى قالاسىندا ءبىر بولمەلى پاتەر جانە باسقا دا تۇرمىستىق تەحنيكانى ويناتپاق بولىپ، جالعان لوتەرەيا ويىنىن ۇيىمداستىرعان. الايدا، جوعارىدا كورسەتىلگەن قۇندى سىيلىقتار بولماعان. ولار لوتەرەيا ويىنىنا قاتىسۋشىلاردى سەندىرۋ ءۇشىن 4 اۆتوكولىكتى باسقا جەكە تۇلعالاردان جالعا العاندىعى انىقتالدى", - دەلىنگەن رەسمي تاراتىلعان حابارلامادا. .
لوتورەيانى ۇيىمداستىرۋشىلار الەۋمەتتىك جەلىلەردە جاساعان جارناما ارقىلى 9 900 تەڭگە تۇراتىن 20 000 دانادان استام ويىن بيلەتىن ساتقان. ۇتىس ويىنىن ويناتاتىن باعدارلاماعا، ۇيىمداستىرۋشىلارمەن الدىن الا بەلگىلەنگەن ۇتىس بيلەتتەرى ياعني، ءوز ادامدارى ەنگىزىلگەن.
«قازىرگى تاڭدا، قر قىلمىستىق كودەكسى 190-بابىنىڭ 2-بولىگى 1-تارماعى بويىنشا (الاياقتىق، ادامدار توبىنىڭ الدىن الا ءسوز بايلاسۋى) بىرقاتار ازاماتقا قاتىستى سوتقا دەيىنگى تەرگەۋ امالدارى جۇرگىزىلىپ جاتىر»، - دەپ قوستى دەپارتامەنت وكىلدەرى.
سونىمەن قاتار زاڭسىز لوتەرەيا ويىنىن ۇيىمداستىرۋشىلار توتەنشە جاعداي رەجيمىن بۇزعانى ءۇشىن قر اكىمشىلىك كودەكسىنىڭ 476-بابىمەن اكىمشىلىك جاۋاپكەرشىلىككە تارتىلدى.
ەستەرىڭىزگە سالا كەتەيىك، بۇعان دەيىن ەرنار ايداردىڭ ۇستالعانى حابارلانعان
"ادىرنا" ۇلتتىق پورتالى
