سەنىڭ قالاۋىڭنىڭ ءبارى قورقىنىشتىڭ استارىندا

4443
Adyrna.kz Telegram

تاڭەرتەڭ وياندىڭ، وياتقىشتى قوسۋ ءۇشىن ارى اۋنادىڭ. كەشەگىدەن ايىرماسى جوق بۇگىنىڭ باستالدى. تاڭعى اس تا تۋرا كەشەگىدەي. ءبىر شىنىاياق كوفەنى جاڭا ءدامحانادان اۋىز تيسەم دەيسىڭ... ا، جوق جاڭا ءدامحانانىڭ كەرەگى جوق. ەسكى ءدامحانا بولا بەرسىن. سوسىن جۇمىسقا باراسىڭ. نەشە جىلدان بەرى ءبىر نارسەنى قايتالاي بەرەتىن قۇبىلىس.

كەشكە شارشاپ كەپ، ديۆانعا جانتايا كەتەسىڭ. جاقسى كورەتىن شوۋدى كورەسىڭ. سوسىن ۇيىقتاپ كەتەسىڭ. تۋرا وسىلاي ءبىر اپتا بويى. بۇگىن جۇما. ۋح، دەمالىس باستالدى. سول باياعى بارعا بارىپ، بۇرىننان بىلەتىن ادامدارمەن ۋاقىت وتكىزەسىڭ. جەكسەنبىنىڭ جەتىپ كەلگەنىن بايقاماي قالاسىڭ. ءومىر قايتادان قايتالانادى.

نە دەگەن وتپەيتىن ۋاقىت. كۇيبەڭ تىرلىك. ومىرىمدە ەش وزگەرىس جوق. ۋاقىت توقتاپ قالعانداي. سوڭعى رەت قاشان جۇمىستا جەتىستىككە جەتىپ ەدىڭىز؟ جۇرەك الىپ-ۇشىپ، مەن بىردەڭە تىندىردىم دەپ قۋاندى؟ جاڭا نارسە جاساپ، شاتتانعان ءساتتى باستان كەشكەنىڭىزگە كوپ بولدى ما؟

بالا كۇنىمدە ءبىر ءتۇستى قايتالاپ كورە بەرەتىنمىن. تۇرمەگە ءتۇسىپ قاپپىن. وندا ءومىرىمنىڭ سوڭىنا دەيىن نومىرلەنگەن بەلگى سوعادى ەكەنمىن. ءتۇرلى ارىپتەر مەن تسيفرلاردان قۇراستىرامىن. ەگەر قاتەلىك جاساسام، ءبارىن باسىنان باستاۋىم كەرەك. ماقسات جوق. مۇمكىندىك جوق. كۇيبەڭ تىرلىك. وسىنداي ءتۇس.

ويانا كەتسەم، شىلقىلداپ تەرلەپ جاتاتىنمىن. انامدى وياتىپ، جامان ءتۇس كوردىم دەپ ايتۋشى ەم. ول ماعان ەسىنەن اۋىسقان ادامعا قاراعانداي قارايتىن. بۇل ءتۇس مەنى نەگە سونشا شوشىتاتىنىن ايتىپ تۇسىندىرە الماۋشى ەم.

ول كەزدەگى قورقىنىشتىڭ سەبەبىن تۇسىنبەگەن دە شىعارمىن. ءبىراز جىل العا جىلجىپ كەتەيىن. بىردە جۇمىستىڭ كۇيبەڭىمەن وسىنداي قايتالانا بەرەتىن ءومىر جولىنا ءتۇستىم. جۇمىس، ءۇي. جالعاسا بەرەتىن اپتالار. دەمالىستار. جۇمىسىم ۇنامادى ەمەس، ۇنايتىن. مەن مۋزىكالىق بايقاۋلار مەن شارالار يندۋسترياسىندا جۇمىس ىستەپ ءجۇردىم. سوندا دا ءومىرىم قوبالجۋسىز، شاتتىقسىز ءوتىپ جاتتى. كۇندە ءبىر كورىنىس قايتالا بەرەتىندەي.

«مىنانداي ىشپىستىرارلىق ءومىر قاشان بىتەدى؟» دەپ ويلاپ ءجۇردىم. مەن ماقساتسىز ءومىر ءسۇرىپ جاتىر ەم. الگى تۇسىمدەگى جاعداي شىندىققا اينالعان كەز.

سونى تۇسىنگەن ساتتە، جۇمىستان ءوز ەركىممەن شىعىپ، وڭتۇستىك-شىعىس ازياعا بيلەت ساتىپ الدىم. وسى ساياحاتتا كوپتەگەن ومىرلىك جاعداياتتارددى باستان كەشتىم. سونىڭ ءبىرى ءومىردى تۇسىنۋىمە كومەكتەستى.

جايلى ءومىر – مەنىڭ رۋحاني وسۋىمە كەدەرگى كەلتىرگەن ەكەن. باقىتتى بولۋىما مۇمكىندىك بەرمەپتى.

ادامنىڭ ءتانى جايلىلىقتى قاتتى قالايتىنىن ۇقتىم. بۇل رۋحاني ىزدەنىستىڭ جولىن جاباتىن جايت ەكەن. جايلىلىقتان شىعۋ باستاپقىدا جايسىزدىقتى سەزىندىرەدى. الايدا ونىڭ قۇندىلىعى سول جايسىزدىقتان مىڭ مارتە ارتىق. سەبەبى، كەلەسى جاعىن كورۋ قيىن.

جايلىلىقتان شىعۋ ءار ادامدا اركەلكى دەسەك تە، مەيلى ول جۇمىستان شىعۋ، باسقا ەلگە ساياحات، سويلەسۋگە ۇيالاتىن اقىلدى اداممەن سۇقبات بولسىن، سول ادامدى وزگەرتەتىن قۇبىلىس. جايلى جەردەن شىعۋ وتە ماڭىزدى قادام.

ادامنىڭ دامۋى جايلى ورتانىڭ سىرتىندا، ول مىندەتتى تۇردە ساتسىزدىكتەرمەن بايلانىستى. «ءبارىمىز دە ساتسىزدىككە ۇشىرايمىز، ارامىزداعى ەڭ مىقتىلار جەڭىلىستىڭ ءدامىن تاتىپ كورگەندەر ەكەنى انىق» دەيدى دجەيمس مەتيۋ بارري.

باسىنان باستايىن. ادامدار كۇرەس پەن جايسىزدىق رۋحاني ءوسۋدىڭ باسپالداعى ەكەنىن ۇمىتىپ بارادى. ەسكە ءتۇسىرشى: بالا كەزدە ءار كۇن ءبىر ەرلىككە شاقىراتىن; ءار كۇن سايىن جاڭا بىردەڭە بىلەتىنسىڭ. اتا-اناڭ ءار نارسەگە جۇمسايتىن، جاساتقىزاتىن. قورقاتىن، قالامايتىندى ىستەتكىزەتىن. سونى دۇرىس ىستەسەڭ دە، جەرىنە جەتكىزە الماساڭ دا، سەن جەتىلىپ، وسەتىنسىڭ.

ۋاقىتى كەلگەندە اتا-انامىز ءبىزدى جۇمساعاندى دوعارادى. سەن باسىڭمەن جايلى ورتاعا سۇڭگيسىڭ. تۇراقتىلىق قاجەت دەرسىڭ. موينىڭا جۇكتەگەن مىندەتتىڭ ءبارى ءومىرىڭدى ءبىرسارىندى ەتەدى. تۇراقتىلىققا بوي ۇيرەتكەن ادام باتىلدىعىنان ايىرىلا بەرەدى. ولار جايلى ورتادان تىس ارتىق قادام جاساۋعا قورقادى.

ءتۇپسانامىزدا «ءبىلىم الۋدى» تەك بالالىقپەن بايلانىستىرىپ قويامىز. كۇلكىلى عوي. ءبىلىم قۋ ەشقاشان تولاستامايدى. وسكىسى كەلگەن ادام ءاردايىم مۇمكىندىك تابادى. وعان ادامنىڭ جاسى، جاعدايى اسەر ەتپەيدى.

قازىرگى ادامدار جاڭا نارسەنى جاساپ كورۋگە قورقادى. ءساتسىز شىقسا، قايتەم دەيدى. ساتسىزدىك – ءبارى ءبىتتى دەگەن ءسوز ەمەس. ول ءبارى ەندى باستالدى دەگەندى بىلدىرەدى.

ادام قاتەلىك جاساي ءجۇرىپ ۇيرەنەدى. كەيدە ساتسىزدىكتىڭ پايداسى ساتتىلىكتەن ارتىق. نار تاۋەكەلگە بەل بۋماعان قۇر الاقان قالادى.

باستاعان ءىسىڭ پايدا كلەتىرسە دە، كەلتىرمەسە دە – بۇل تاجىريبە ادامعا ءبىر ساتى ىلگەرىلەۋگە كومەكتەسەدى. تۇك بىتىرمەگەننەن جاقسى عوي.

جاتتىعۋدان كەيىن اياق-قولىڭنىڭ سالدىراپ اۋىرعانى بولسىن، جۇمىستى جۇرگىزۋ ءۇشىن تۇنىمەن ۇيىقتاماعان ساتتەر، الداعى بەلگىسىزدىك الدىنداعى ۇرەي، ساتسىزدىككە ۇشىراپ قالام-اۋ دەگەن قورقىنىش – ءبارىنىڭ ايتپاعى، جانىڭ اۋىرماسا، ءوسۋ جوق، ناتيجە جوق. نە وسەسىڭ، داميسىڭ، سول ارقىلى جەتىستىككە جەتەسىڭ، قاتەلىك جاسايسىڭ، قۇلايسىڭ، قايتا تۇراسىڭ. نە سول تۇرعان جەرىڭدە تۇرا بەرەسىڭ.

2. ماڭىزدى اۋەستىكتەرگە جول اشاسىڭ

بۇرىن بىلمەگەن دۇنيەلەرگە دەن قويۋ ادامدى دامىتادى. جاڭا اۋەستىكتى ادام ومىرگە دەگەن قۇشتارلىقتى قايتا سەزىنۋ ءۇشىن ۇيرەنەدى. بىراق كوپ ادام جاڭانى جاساپ كورۋگە قورقادى. قايدان نە ىزدەرىن بىلمەيدى. كۇندەلىكتى كۇيبەڭنەن اسا الماي ءومىرىن وتكىزە بەرەدى. سول جاڭا ونىڭ ومىرىنە وزدىگىنەن كەلە سالاتىنداي ۇمىتتەنەدى.

ءۇمىتتى وشىرگىم كەلمەيدى، بىراق ول جاڭا سەنى ءوزى ىزدەپ كەلمەيتىنىن ايتقىم كەلەدى. سول ءۇشىن جايلى ورتادان شىعۋ كەرەك. اسپاننان سىي تۇسپەيدى. شىنداپ ىزدەسەڭ، بۇرىن ويىڭ تۇگىلى تانازارىڭا كىرمەگەن نارسەلەردى تاباسىڭ. ازياعا اتتانعانىمدا ماقالا جازعىم كەلەتىنىن ءتۇسىندىم. كوڭىلىم سوقتى. بۇرىننان بەرى مازالاعان كوڭىل كۇيىمدى اق پاراققا توكتىم. ول كەزدە ومىرگە قۇشتارلىق وياتاتىن اۋەستىگىمدى تاپقانىمدى بىلمەگەن ەم.

ماقالانى بىرىنەن سوڭ ءبىرىن جازىپ، ويىمدى ورتاعا سالىپ وتىردىم. جول-جونەكەي نەشە ءتۇرلى سۋرەتتەردى كوبىرەك ءتۇسىرىپ، ماقالامدى وڭدەپ وتىردىم. كەيىن مۇنىڭ ءبارى ساياحاتتارىم تۋرالى بەينە بايان جاساۋعا پايداسىن تيگىزدى. مەن بۇرىن ويلاپ بىلمەگەن ءتورت نارسەنى ۇيرەندىم. وسىنىڭ ءبارى ماعان ۇنايدى دەپ كۇتپەپ ەم. جايلى ورتادان شىعا سالىپ جاڭا اۋەستىكتەرىمدى تاپتىم. جاي كۇتۋ ەشتەڭەگە جەتكىزبەيدى. جايلى ورتادان شىقساڭ، ءبىتتى، ءومىر وزگەرىپ كەتە سالاتىنىن كورەسىڭ.

3. بۇرىنعىدان اقىلدى، اشىق-جارقىن، تۇسىنىگى مول بولىپ، دانالىق جولىنا تۇسەسىڭ

ومىردە ەرەكشە ادامدار وتە كوپ. الايدا كۇيبەڭ تىرلىك كەشكەن ادام وزىنە ۇقساس ادامدارعا تارتىلا بەرمەك. بۇلاي بولۋ ادامدى شەكتەۋلەرگە بايلاپ قويادى. ادامدار اراسىنداعى وزگەشەلىكتەردى بايقاۋدى دوعارامىز.

ەگەر اينالاڭدا سەنىڭ ومىرلىك كوزقاراسىڭدى بولىسەتىن ادامدار تولا بولسا، ەندەشە تەك ءبىر پىكىرمەن ءومىر سۇرۋگە بەيىمدەلىپ كەتەسىڭ. ەلدىڭ ءبارى وسىلاي ويلايدى ەكەن دەپ قالاسىڭ.

جايلى ورتادان شىققان سوڭ ەرەكشەلىكتەردى تۇسىنۋگە، ءار تاراپتا ويلانۋعا بەيىمدەلەسىڭ. تۇسىنىكسىز پىكىرلەردى قابىلداپ ۇيرەنەسىڭ. باسىندا ءبىر ءتۇرلى جايسىز بولادى. بىراق كەلەسى دە ءوزىڭ كەلىسپەيتىن پىكىردى ەستىگەندە كەرىسىنشە داۋلاسپاي، مۇنداي ويعا نەلىكتەن كەلگەنىن تۇسىنۋگە تىرىساسىڭ.

ادامنىڭ ويى باي تاجىريبە مەن مىڭداعان وزگەرىستەردەن قالىپتاسادى. دەسەك تە، كەي ادامنىڭ پىكىرىنە اق-قارا كوزىلدىرىكپەن قارايمىز. نەگە باسقاشا ەمەس، ءدال وسىلاي ويلايتىنىن تۋرالى اركىمنىڭ ءوز سەبەبى بولماق. كوپ سەبەپ ءبىز ويلاعاننان دا تەرەڭ. بوتەن ادامنىڭ مادەنيەت جايىنداعى كوزقاراسىن ءتۇسىنۋ، ونىڭ يدەولوگياسىنىڭ قالىپتاسۋىن اڭعارۋ دانالىققا باستايتىن العاشقى قادام.

4. جايلى ورتانىڭ ماعىناسىز ويىن-ساۋىعىنان قۇتىلساڭ، ساناڭ تۇنىق بولا باستايدى

كۇندەلىكتى ءبىر كورگەن نارسەنى قايتالاپ كورىپ، ءبىر قوسىمشانى عانا قولدانىپ داعدىلانساق، ميدى ءوشىرىپ قويامىز. قايتالاناتىن دۇنيە ميدى ىستەن شىعارادى. تەلەديدار مەن تەلەفوندى ءسوندىرىپ، باسقا نارسەنى زەرتتەۋگە وتىرعاندا ءوزىڭ دە تاڭ قالاسىڭ. ونداي كەزدە مي جەڭىل جۇمىس ىستەپ كەتەدى. تەلەفونىڭدى ءسوندىر، كەلەسى جولى ءبىر كۇنگە ءسوندىر. سولاي ۋاقىتىن ۇزارتا بەر.

5. اشىق ءارى سەنىمدى بولا تۇسەسىڭ

بەيتانىس ادامدارمەن تىلدەسۋ كوپ جاندار ءۇشىن ىڭعايسىز قىلىق. بىرەۋ سىنار، بىرەۋ سوگەر دەپ قورقامىز. بىردەڭەنى ءبۇلدىرىپ قويام با دەپ قورقا بەرەمىز. مۇنداي كەزدە ەلدىڭ ءبارى ءوزىن ىڭعايسىز سەزىنەدى. وسىنى بىلگەلى بەرى ەلمەن ەمەن-جارقىن ارالاساتىن بولدىم. دۇرىس سويلەسپەي قالسام دەگەن ۇرەيدى جەڭدىم.

بۇرىن سويلەسىپ كورمەگەن ادامدى اڭگىمەگە تارتۋ جايلى ورتادان شىعۋدىڭ ءبىر امالى. تانىمايتىن ادامعا ماقتاۋ ءسوز ايت. ونىڭ نە زيانى بار؟ تاعى ءبىر امالى – باسقا ادامداردى ۇمىت. بۇرىن ىستەپ كورمەگەن نارسەگە دەن قويعاندا جايلى ورتادان شىعىپ، وسىنى ىستەۋدى ماقسات قىلماساڭ دا، وزىڭە ونىڭ ناتيجەسى ۇناۋى مۇمكىن. وزىڭە دەگەن سەنىم پايدا بولادى. بۇرىن ىستەپ كورمەگەن نارسەنى ىستەۋگە باتىلدىق قاجەت. قورقىنىشتى جەڭۋ كەرەك. باتىلدىق بەيتانىستارمەن سويلەسۋدىڭ ۇرەيىن جەڭەدى. سەنىمدىلىك پەن الەۋمەتپەن ارالاسۋ كۇيبەڭ تىرلىكتەن قۇتىلۋدىڭ ءبىر امالى.

6. ەش قينالماي مىقتى سۇقباتتاس بولۋ

«بىردە ءبىر ادام ساتسىزدىككە ۇشىراماي وزگەنى قىزىقتىرا الماس. نەعۇرلىم ءجيى ءسۇرىنىپ، سودان ناتيجە شىعارساڭ، سوعۇرلىم ءوزىڭ جەتىلە تۇسەسىڭ. ەشبىر كۇرەسسىز دىتتەگەنىنە قول جەتكىزگەن ادامدى كورىپ پە ەدىڭدەر؟ مۇندايلار مۇلدە جوق نە شالشىعى تەرەڭ بولعانى» دەيدى كريس حاردۆيك.

سەنىمدىلىك پەن الەۋمەتپەن ارالاسۋ جايلى ورتادان شىققان سوڭ كەلە باستايدى. دۇرىس سويلەسۋ داعدىلارىن دا مەڭگەرە باستايسىڭ. جايلى ورتادان شىققان سوڭ قانشاما قىزىقتى، كەزدەيسوق، تۇسىنىكسىز جايتتار بولا باستايتىنىن بايقايسىڭ. قىزىقتى حيكايالارىڭ كوبەيە تۇسەدى. بۇكىل ساتسىزدىكتەر مەن جەتىستىكتەر بولىسۋگە لايىق دەڭگەيگە كوتەرىلەدى. ءوز ومىرىڭنەن تاريحي وقيعا جاساي ءبىل، مۇمكىن كينو ءتۇسىرىپ قالارسىڭ.

7. بۇرىن بىلمەگەن الەمدى تانيسىڭ

بۇرىن-سوڭدى ويلاماعان قىزىققا بوي الدىراسىڭ. ءار ءتۇرلى توپ، مادەنيەت بارىن بىلەسىڭ. نە ۇنايتىنىن ويلان. ماسەلەن، گولف. ونىڭ امالى، ءتاسىلى، ءتۇرلى ەلەمەنتى قىزىقتىرادى.

مۇنداي اۋەستىكتەر جەتىپ ارتىلادى. مۋزىكانى جاقسى كورەتىندەر. جانكۇيەرلەر. ءار ءىستىڭ مايتالماندارى. مىڭداعان مادەنيەت پەن قوعامداستىقتىڭ وكىلدەرى. ىزدەگەن ادام قالاۋىن تابادى.

العان اسەرلەرمەن ءبولىسۋ، قازىرگى جاڭا اۋەستىككە قاتىستى پىكىرلەستەرمەن ارالاسۋ، وي ءبولىسۋ ومىردەگى ەڭ ۇلكەن جان راقاتى. مۇمكىندىكتەر شەكسىز. جاڭا الەمدى ءدال قازىر اشىپ، ءدال قازىر وزگەرسەڭ دە بولادى. كۇيبەڭ تىرلىكتىڭ جالىقتىراتىنى راس. ادامدى تەجەيدى. ءومىرىڭ الاقانداعىداي بولعانى – ەش جاڭالىق ورىن الماي، تەك ءبىر شەڭبەردىڭ بويىمەن جۇرە بەرۋ. ونداي دا جۇرەك سازىپ كەتەدى.

ەندەشە، ءومىر تىزگىنىڭدى ءوز قولىڭا الىپ، ەركىندىك، قىزىعۋشىلىق، شاتتانۋعا ەسىك اش. العاشقى قادامدى جاساۋ قيىن. ال جاساعان سوڭ بۇرىن نەگە قورىققام دەيسىڭ. بۇل فانيدە وتكىزگەن ءار ءساتىڭ باعالى. سوندىقتان، مىنانى ىستەسەم بە، جوق پا دەپ ويلانبا. ىستە. ءومىر ءوتىپ بارا جاتىر.

قۇلقىن سارىدەن ويانىپ، مەن ىستەيتىن شارۋا كوپ دەپ قۋاناتىن بولاسىڭ. بۇكىل الەمدى جاۋلاپ الۋعا دايىنسىڭ. جۇمىسقا ويىڭ تۇنىق، جاڭا يدەيمەن جونەلەسىڭ. جۇمىس كۇنىڭ لەزدە وتە شىعادى. ۇيگە كەلە جاتىپ كەلەسى كۇندى جوسپارلاپ، دەمالىستا قايدا باراتىنىڭدى ويلاپ جۇرەسىڭ. ءومىر قايتادان قىزىق، عاجايىپقا تولى بولا باستايدى.

ءنومىر جازىلعان بەلگى سوعۋدى ۇمىت.

دجەك كەنفيلد

اۋدارعان: شىنار ءابىلدا

"ادىرنا" ۇلتتىق پورتالى

پىكىرلەر