بۇگىن اقپاراتتىق-كوممۋنيكاتسيالىق ورتالىعىندا شاھارداعى قوعامدىق كولىكتەرگە ەلەكتروندىق تولەم جۇيەسىن ەنگىزۋ بويىنشا ونلاين-بريفينگ ءوتتى.
بريفينگكە قاتىسقان شىمكەنت قالاسى اكىمىنىڭ ورىنباسارى ماقسۇت يساحوۆ «تسيفرلى قازاقستان» مەملەكەتتىك باعدارلاماسىن ىسكە اسىرۋ اياسىندا قالاداعى قوعامدىق كولىكتەردىڭ قىزمەتىن جاقسارتۋ جانە جولاۋشىلارعا قولايلى جاعدايلاردى جاساۋ، قولما-قول اقشاسىز تولەمدەردى ەنگىزۋ تۋرالى جان-جاقتى مالىمەت بەردى.
– قالامىزداعى قوعامدىق كولىكتەرگە ەلەكتروندىق تولەم جۇيەسىن ەنگىزۋ جوسپارلانۋدا. جوبا «QazSmartTrans» جشس جەكە ينۆەستورلار ەسەبىنەن ىسكە اسىرىلادى. ول جۇيە بيىل دەمالىس ۋاقىتىندا (جولاۋشىلار اعىنى ەڭ تومەن كەزىندە) ىسكە قوسىلماق. بۇگىنگى تاڭدا، جۇيەنى ەنگىزۋ ءۇشىن 24 كولىك كومپانياسىمەن شارت جاسالدى، قازىر اۆتوبۋستارعا كابەل مەن سىمدارىن ورناتۋ جۇمىستارى جۇرگىزىلۋدە. سونىمەن قاتار، جەكە كولىك كارتالارىن شىعارۋ ءۇشىن، قوعامدىق كولىكتە تەگىن جۇرەتىن الەۋمەتتىك ساناتتارعا جاتاتىن ازاماتتار، جوعارى وقۋ ورىندارىندا وقيتىن ستۋدەنتتەر، مەكتەپ جانە ورتا ارناۋلى وقۋ ورىندارىنداعى وقۋشىلار تۋرالى دەرەكتەر جيناقتالۋدا، - دەدى قالا اكىمىنىڭ ورىنباسارى.
ماقسۇت پەرنەبايۇلىنىڭ مالىمدەۋىنشە، ەلەكتروندىق تولەم جۇيەسىنىڭ ارتىقشىلىعى كوپ، ياعني جولاۋشىلار كولىك كارتاسىمەن، SMS, QR-كود، سمارتفوندى (NFC) قولدانا وتىرىپ، جول ءجۇرۋ اقىسىن تولەي الادى. ال ءتاريفتى بەلگىلەۋ ماسەلەسىنە كەلسەك، بۇل رەتتە كولىك كارتالارى ارقىلى قولما-قول اقشاسىز تولەۋ كەزىندە قازىرگى قولداناتىن تاريفپەن تولەيدى، ال قولما-قول اقشامەن تولەۋ كەزىندە تاريف جوعارى بولماق.
- بۇدان بولەك، اتالعان جۇيەنى مەديتسينا، ءبىلىم بەرۋ جۇيەلەرىمەن بىرىكتىرۋ ارقىلى، ياعني وقۋشىلارعا مەكتەپ اسحانالارىندا كولىك كارتاسىمەن تولەۋ مۇمكىندىگى بەرىلمەك. ول مەكتەپتەرگە كاسسالىق اپپاراتتار تەگىن بەرىلەدى. قالامىزدا كارانتين ەنگىزىلۋىنە بايلانىستى، ءتيىستى جابدىقتاردى جەتكىزۋ جۇمىستارى كەشىكتىرىلۋدە. دەگەنمەن، بۇل ماسەلە تاياۋ ۋاقىتتا تولىق شەشىمىن تابادى، - دەدى م. يساحوۆ.
قازىرگى تاڭدا جەتكىزۋشىگە تولەماقىنىڭ 50% تولەنگەن. جابدىقتاردى جەتكىزۋ اعىمداعى جىلدىڭ 1 مامىرىنان باستالادى. ال 1 ماۋسىمنان باستاپ جوبا تولىق ىسكە قوسىلماق.
ايتا كەتسەك، قوعامدىق كولىكتەرگە ەلەكتروندىق بيلەت جۇيەسىن ەنگىزۋ بويىنشا قاجەتتى مالىمەتتەردى قالا تۇرعىندارىنىڭ نازارىنا جەتكىزۋ ماقساتىندا ءتيىستى ءىس-شارالار ازىرلەنۋدە. بۇل رەتتە ارنايى PR اكتسيالار وتكىزىلمەك، سونداي-اق جارنامالىق بەينەروليكتەر مەن بۋكلەتتەر دايىندالىپ، وعان ەرىكتىلەر (ۆولونتەر) جۇمىلدىرىلادى.
شىمكەنت
