بۇگىن اقپاراتتىق كوممۋنيكاتسيالار ورتالىعىندا شىمكەنت قالاسى پوليتسيا دەپارتامەنتىنىڭ باستىعى، پوليتسيا پولكوۆنيگى ەرالى جۇماحانبەتوۆتىڭ قاتىسۋىمەن توتەنشە جاعداي كەزىندە قالاداعى قاۋىپسىزدىكتى قامتاماسىز ەتۋ بويىنشا ونلاين-بريفينگ ءوتتى.
دەپارتامەنت باسشىسىنىڭ مالىمدەۋىنشە، قازىرگى تاڭدا كارانتينگە بايلانىستى قالادا 2000-نان استام ادام تاۋلىك بويى 3 اۋىسىمدا قىزمەت ەتۋدە. وعان 1206 پوليتسيا قىزمەتكەرى، №35748 اسكەري ءبولىمىنىڭ 196 ساربازى، 559 ۇلتتىق ۇلان ساربازى جانە 216 مەديتسينا ماماندارى جۇمىلدىرىلعان. ايتا كەتەرلىگى، جىل باسىنان قالا اۋماعىندا جالپى قىلمىستىڭ سانى 17%-عا، توتەنشە جاعداي كەزىندە 39%-عا ازايىپ وتىر.
- كوروناۆيرۋس ىندەتىنىڭ الدىن الۋ باعىتىندا پوليتسەيلەر تاراپىنان ۇگىت-ناسيحات جانە ءتۇسىندىرۋ جۇمىستارى كۇشەيتىلدى. قالادا قاۋىپتى ىندەتكە وراي 60 وشاق پەن 6 پروۆيزورلىق ورتالىق بار. كوشەلەر مەن قيىلىستاردا 20 بۇعاتتاۋ بەكەتى قويىلىپ، وعان 300-دەي پوليتسيا قىزمەتكەرى جۇمىلدىرىلدى. كولىكتەر مەن ازاماتتاردىڭ قوزعالىسى قىزمەتتىك پلانشەتتەردىڭ كومەگىمەن قاتاڭ تەكسەرىلىپ جاتىر. رۇقساتى جوق اۆتوكولىكتەردىڭ قوزعالىسىنا جول بەرىلمەۋدە، - دەپ اتاپ ءوتتى پوليتسيا دەپارتامەنتىنىڭ باسشىسى.
ەرالى جۇماحانبەتوۆ اتاپ وتكەندەي، شىمكەنتتىڭ كىرەبەرىستەرىندەگى 18 بلوك-بەكەتتە بۇگىندە 195 پوليتسيا قىزمەتكەرى جۇمىلدىرىلعان. وسى كۇنگە دەيىن بلوك-بەكەتتەردەن جالپى 67367 اۆتوكولىك (47836 ازامات) تەكسەرىلگەن. ونىڭ ىشىندە قالادان شىققان 12130 اۆتوكولىك (16289 ازامات); قالاعا كىرگەن 20803 (26962 ازامات); ترانزيت 2790 (4585 ازامات) تەكسەرىلىپ وتكىزىلگەن; رۇقساتى جوق 31653 اۆتوكولىك وتكىزىلمەي، قايتارىلعان.
توتەنشە جاعداي كەزەڭىندە، قويىلعان شەكتەۋلەر مەن سانيتارلىق تالاپتاردى ساقتاماعانى ءۇشىن 869 تۇلعاعا اقبتك-ءنىڭ 476-بابىمەن اكىمشىلىك حاتتاما تولتىرىلعان. ونىڭ 354-ءى بويىنشا مامانداندىرىلعان اكىمشىلىك سوتىمەن شەشىم قابىلدانىپ، 76 جايت بويىنشا تۇلعالار اكىمشىلىك قاماۋعا الىنعان، 127 تۇلعاعا ايىپپۇل سالىنعان، 151 تۇلعاعا ەسكەرتۋ بەرىلگەن. سونداي-اق توتەنشە جاعداي كەزەڭىندە 6 قىلمىستىق ءىس تىركەلگەن.
بريفينگتە ەرالى ءمۇساالىۇلى قالادا رۇقسات العان اۆتوكولىكتەردىڭ يەلەرى جانە ازاماتتاردىڭ باسىم بولىگى توتەنشە جاعدايعا نەمقۇرايلى قاراپ جاتقانىن دا تىلگە تيەك ەتتى.
- مونيتورينگ جۇرگىزۋ بارىسىندا كوشەدە بەيبەرەكەت جۇرگەندەر، كوپقاباتتى ۇيلەردىڭ اۋلاسىندا بالالارى بەتپەردەسىز جانە اتا-انا قاراۋىنسىز جۇرگەندەرى انىقتالۋدا. وسى ورايدا، قالا تۇرعىندارىنا ايتارىمىز، پوليتسيا تاراپىنان ايتىلعان تالاپتاردى ورىنداۋعا شاقىرامىن. قابىلدانىپ جاتقان شارالار ەڭ الدىمەن ىندەتتىڭ تارالۋىنا جول بەرمەۋگە جانە ازاماتتاردىڭ ءومىرى مەن دەنساۋلىعىنا قاۋىپ توندىرمەۋگە باعىتتالعان. ازاماتتاردىڭ تاراپىنان قۇقىقبۇزۋشىلىقتار ورىن العان جاعدايدا قر اقبتك-ءنىڭ 476-بابى بويىنشا اكىمشىلىك شارا قولدانىلادى. سىن ساعاتتا بىرلەسە وتىرىپ، كۇش-جىگەرىمىزدى جۇمىلدىرساق، بۇل ىندەتتى جەڭىپ شىعامىز، - دەدى ە. جۇماحانبەتوۆ.
شىمكەنت
