بۇگىندە اقش COVID-19 جۇقتىرعان ادام سانى بويىنشا دا، قايتىس بولعان ادام سانى بويىنشا دا ءبىرىنشى ورىندا. كوروناۆيرۋس ەلدىڭ كوپتەگەن قالاسىندا تىركەلگەن. ۆيرۋستى جۇقتىرعانداردىڭ سانى ميلليونعا جۋىقتاعان ەلدىڭ قازىرگى جاعدايى قانداي؟ بۇل تۋرالى Tengrinews.kz تىلشىسى ورەگون شتاتىندا تۇرىپ جاتقان ايسۇلۋ ابەلدينادان سۇراستىردى.
ايسۇلۋدىڭ وتباسىمەن اقش-تا تۇرىپ جاتقانىنا ءبىر جىلداي بولعان. ول - يوگا بويىنشا نۇسقاۋشى. ايسۇلۋدىڭ ايتۋىنشا، قۇراما شتاتتارداعى قازىرگى جاعداي تۇراقتى ەمەس.
"اقش-تا كوروناۆيرۋس جۇقتىرعان 824 مىڭنان اسا ادام انىقتالدى. ەلدەگى قازىرگى جاعداي تۇراقتى ەمەس. ترامپ كارانتيندى توقتاتپاق. سەبەبى ەل ەكونوميكاسى تاعى ءبىر اي كارانتين جاريالانسا شىداماۋى مۇمكىن. ال گۋبەرناتور-دەموكراتتار بۇعان قارسى. سوندىقتان كەي شتاتتاردا كارانتينگە قارسى ادامدار ميتينگىگە شىعىپ جاتىر. ال ورەگونداعى جاعداي تۇراقتى. بىراق بۇل شتات ترامپقا قارسى شىققان وزگە دە شتاتتارمەن بىرىككەن. ورەگوندا 595 ناۋقاس انىقتالدى", - دەيدى ايسۇلۋ.
كەيىپكەرىمىز حالىققا كورسەتىلەتىن الەۋمەتتىك تولەم تۋرالى ءسوز قوزعادى.
"بىزدە كارانتين جاريالانعان. قوعامدىق ورىندار جابىق، تەك ازىق-تۇلىك دۇكەندەرى مەن اۋرۋحانالار جۇمىس ىستەپ تۇر. جەرگىلىكتى بيلىك ازىق-تۇلىك سەبەتىن تاراتا باستادى. ول ءۇشىن ارنايى قۇجاتتىڭ دا قاجەتى جوق. ودان بولەك، جىلدىق تابىسى 75 مىڭ دوللاردان از ادامدارعا 1200 دوللاردان جانە ءار بالاعا 500 دوللاردان بەرىلەدى. قاشىقتان جۇمىس ىستەي الاتىندار ونلاين ىستەيدى. كوپتەگەن ادام ۇيدە جۇمىسسىزدىققا بايلانىستى جاردەماقى الادى. جالاقىنىڭ 60 پايىزى تولەنەدى. قاجەت كاسىپورىندار عانا جۇمىسىن جالعاستىرىپ جاتىر", - دەيدى ايسۇلۋ.
ايسۇلۋدىڭ ايتۋىنشا، جەرگىلىكتى تۇرعىندار سىرتتا جۇرگەن كەزدە اراقاشىقتىققا ۇلكەن ءمان بەرەتىن كورىنەدى.
"دۇكەندە ادام سانى وتە از. بارلىعى اراقاشىقتىقتى ساقتاپ جۇرەدى. جالپى دۇكەندەرگە ادامدى از-ازدان كىرگىزەدى. ءتىپتى تروتۋاردىڭ بويىندا كەتىپ بارا جاتقاندا قارسى بەتتە ادام كەلە جاتسا، جولدىڭ ارعى شەتىنە ءوتىپ كەتەدى", - دەيدى كەيىپكەرىمىز.
