Búginde AQSh COVID-19 juqtyrǵan adam sany boıynsha da, qaıtys bolǵan adam sany boıynsha da birinshi orynda. Koronavırýs eldiń kóptegen qalasynda tirkelgen. Vırýsty juqtyrǵandardyń sany mıllıonǵa jýyqtaǵan eldiń qazirgi jaǵdaıy qandaı? Bul týraly Tengrinews.kz tilshisi Oregon shtatynda turyp jatqan Aısulý Abeldınadan surastyrdy.
Aısulýdyń otbasymen AQSh-ta turyp jatqanyna bir jyldaı bolǵan. Ol - ıoga boıynsha nusqaýshy. Aısulýdyń aıtýynsha, qurama shtattardaǵy qazirgi jaǵdaı turaqty emes.
"AQSh-ta koronavırýs juqtyrǵan 824 myńnan asa adam anyqtaldy. Eldegi qazirgi jaǵdaı turaqty emes. Tramp karantındi toqtatpaq. Sebebi el ekonomıkasy taǵy bir aı karantın jarııalansa shydamaýy múmkin. Al gýbernator-demokrattar buǵan qarsy. Sondyqtan keı shtattarda karantınge qarsy adamdar mıtıngige shyǵyp jatyr. Al Oregondaǵy jaǵdaı turaqty. Biraq bul shtat Trampqa qarsy shyqqan ózge de shtattarmen birikken. Oregonda 595 naýqas anyqtaldy", - deıdi Aısulý.
Keıipkerimiz halyqqa kórsetiletin áleýmettik tólem týraly sóz qozǵady.
"Bizde karantın jarııalanǵan. Qoǵamdyq oryndar jabyq, tek azyq-túlik dúkenderi men aýrýhanalar jumys istep tur. Jergilikti bılik azyq-túlik sebetin tarata bastady. Ol úshin arnaıy qujattyń da qajeti joq. Odan bólek, jyldyq tabysy 75 myń dollardan az adamdarǵa 1200 dollardan jáne ár balaǵa 500 dollardan beriledi. Qashyqtan jumys isteı alatyndar onlaın isteıdi. Kóptegen adam úıde jumyssyzdyqqa baılanysty járdemaqy alady. Jalaqynyń 60 paıyzy tólenedi. Qajet kásiporyndar ǵana jumysyn jalǵastyryp jatyr", - deıdi Aısulý.
Aısulýdyń aıtýynsha, jergilikti turǵyndar syrtta júrgen kezde araqashyqtyqqa úlken mán beretin kórinedi.
"Dúkende adam sany óte az. Barlyǵy araqashyqtyqty saqtap júredi. Jalpy dúkenderge adamdy az-azdan kirgizedi. Tipti trotýardyń boıynda ketip bara jatqanda qarsy bette adam kele jatsa, joldyń arǵy shetine ótip ketedi", - deıdi keıipkerimiz.
