قر مادەنيەت جانە سپورت مينيسترلىگىنىڭ ONLINEda bol جوباسى اياسىندا ۇيىمداسىرىلعان «جاڭا ءالىپبي نەگىزىندەگى ۇلتتىق جازۋدىڭ جاڭعىرۋى» ونلاين ءدارىسىنىڭ بۇگىن بەسىنشى جانە التىنشى دارىستەرى تىڭدالدى.
سارسەنبى كۇنگى ءدارىستى احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى، پروفەسسور ايمان الداش «جاڭا ءالىپبي جانە كىرمە سوزدەر ەملەسىنىڭ كەيبىر ماسەلەلەرى» تاقىرىبى اياسىندا وقىدى. دارىستە شەتتىلدىك سوزدەردىڭ جاڭا الىپبيدەگى ەملەسىنە بايلانىستى ماسەلەلەر قوزعالدى. ونىڭ ىشىندە قازىرگى قازاق ادەبي ءتىلىنىڭ سوزدىك قۇرامىندا كەزدەسەتىن V (ۆ) ءارپى تۋرالى كەڭىرەك تۇسىنىكتەمە بەرىلدى. V ءارپىنىڭ كىرمە سوزدەردىڭ قۇرامىندا، الەۋمەتتىك-تۇرمىستىق اتاۋلار، ءتارورىستى عىلىمي-تەحنيكالىق تەرميندەردىڭ، كىسى ەسىمدەرى مەن جەر-سۋ اتاۋلارىنىڭ جازبا تۇرقىندا ءسوز باسىندا، ءسوز ورتاسىندا جانە ءسوز سوڭىندا كەزدەسەتىنىنە قاراي جيناقتاۋ، جۇيەلەۋ جۇمىستارىنىڭ ناتيجەلەرىنە توقتالدى. قۇرامىندا ءVارپى بار سوزدەردىڭ تىلىمىزگە بەيىمدەلگەن ۇلگىلەرىن دە اتاپ كورسەتتى. سونىمەن قاتار شەتتىلدىك سوزدەردەگى قايتالاما داۋىسسىز دىبىس تاڭبالارىنىڭ ەملەسى بويىنشا ىزدەنىستەرىمەن ءبولىستى.
ءدارىستى ءارى قاراي احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، پروفەسسور، فيلولوگيا عىلىمدارىنىڭ دوكتورى قۇرالاي كۇدەرينوۆا «ءالىپبي، ورفوگرافيا ماسەلەلەرى» تاقىرىبىندا جالعاستىردى. دارىستە قازاقتىڭ اۋىزشا ءتىلى مەن جازبا ءتىلىن ءبىر دەپ تانۋ، جازۋدى ءتىل ءبىلىمىنىڭ دەڭگەيلەرى /قازاق فونەتيكاسى، مورفولوگياسى، سينتاكسيسى، لەكسيكولوگياسى/ تۇرعىسىنان قاراستىرۋدىڭ قاۋىپتەرىن كورسەتتى. جازۋدىڭ قىزمەتىن عىلىمي تۇرعىدان جان جاقتى تالداپ بەردى. عالىم جازبا ءتىل مەن اۋىزشا ءتىلدىڭ اراجىگىن اجىراتا ءبىلۋ ماسەلەسىنىڭ باستى نازاردا بولۋ كەرەكتىگىنە توقتالدى. سوزدەردىڭ گرافيكالىق بەينەسى مەن دىبىستىڭ بەينەسىنىڭ اراقاتىناسىن، ەرەكشەلىگىن ناقتى عىلىمي-پراكتيكالىق نەگىزدەرمەن تۇسىندىرە وتىرىپ، جازبا ءتىلدىڭ اۋىزشا تىلدەن وزگەشە كوممۋنيكاتسيالىق ماقساتىن ايقىنداپ بەردى. سونىمەن قاتار ءارىپ /فونەما/ دىبىستىق تاڭبا، دىبىستىق ەمەس تاڭبالار اراجىگىن اشىپ، فونەتيكالىق، مورفولوگيالىق تالداۋ جاساۋ ءۇشىن جازبا سوزگە ەمەس ورفوەپيالىق ەرەكشەلىككە نازار اۋدارۋدىڭ قاجەتتىلىگىن ءسوز ەتتى. دارىستە بولەك جازۋ، دەفيسپەن جازۋ جانە بىرگە جازۋدىڭ ەرەكشەلىكتەرىنە توقتالىپ، ناقتى مىسالدارمەن دالەلەلدەپ كورسەتە ءبىلدى. ءسوز سوڭىندا عالىم جازۋدىڭ قىزمەتى، جازۋدىڭ قاجەتتىلىگى تۋرالى عىلىمي تۇيىندەر كەلتىرىپ، اياقتادى.
دارىستە تىڭداۋشىلار جاڭا ءالىپبي نەگىزىندەگى ۇلتتىق جازۋىمىزدىڭ وتكەنى مەن بولاشاعى جايلى زەرتتەۋشى عالىمداردان تولىققاندى، دالەلدى ماعلۇمات الىپ، ءوز وي-پىكىرلەرىمەن ءبولىسىپ، دارىسكەرلەرگە ۇسىنىستارى مەن العىستارىن ءبىلدىردى.
دارىسكە Zoom سەرۆيسى بويىنشا 93 ءتىل مامانى قاتىستى. فەيسبۋك جەلىسىندەگى ONLINEda bol پاراقشاسى ارقىلى 47ادام تىڭداعان.
ەستەرىڭىزگە سالا كەتىمىز، قر مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرماسىمەن ء"تىل-قازىنا" ۇلتتىق عىلىم-پراكتيكالىق ورتالىعى ۇيىمداستىرىپ وتىرعان «جاڭا ءالىپبي نەگىزىندەگى ۇلتتىق جازۋدىڭ جاڭعىرۋى» ونلاين ءدارىسى 24 ساۋىرگە دەيىن جالعاسادى. الداعى ۋاقىتتا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ءلاززات ەسپەكوۆا، ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ دوتسەنتى مارحابا تۇرسىنوۆا، «ءتىل-قازىنا» ۇلتتىق عىلىمي-پراكتيكالىق ورتالىعىنىڭ عالىم حاتشىسى انار فازىلجان جانە وسى ورتالىقتىڭ جەتەكشى عىلىمي قىزمەتكەرى گۇلفار مامىربەك ءدارىس وقيتىن بولادى.
جازيرا اشىربەك،
ء"تىل قازىنا" ورتالىعى
