الماتى وبلىسىندا 1407 ونەركاسىپ نىسانى جۇمىس ىستەيدى، سونىڭ 32-ءسى - ءىرى، 64-ءى - ورتا جانە 1311-ءى - شاعىن نىساندار. ولاردا 85 مىڭنان استام ادام ەڭبەك ەتەدى. قازىرگى كەزدە وبلىستاعى بارلىق كاسىپورىندار سانيتارلىق-دەزينفەكتسيالىق شارالاردى قاتاڭ ساقتاي وتىرىپ، شتاتتىق رەجيمدە قىزمەتىن اتقارۋدا، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.
وبلىستىق كاسىپكەرلىك جانە يندۋستريالدى-ينوۆاتسيالىق دامۋ باسقارماسىنىڭ باسشىسى رۋسلان قوجاسباەۆتىڭ ايتۋىنشا، وڭىردەگى ونەركاسىپ كولەمى 2020 جىلدىڭ قاڭتار-ناۋرىز ايلارىندا 242,0 ملدر. تەڭگەنى نەمەسە 106% قۇرادى، بۇل 2019 جىلدىڭ سايكەس مەرزىمىنە قاراعاندا 53,7 ملرد. تەڭگەگە ارتىق. وڭدەۋ ونەركاسىبىنىڭ جالپى كولەمدەگى ۇلەسى 85,4% – بۇل رەسپۋبليكاداعى ەڭ جوعارى كورسەتكىش.
باسقارمانىڭ مالىمەتى بويىنشا، ونەركاسىپ ءوندىرىسىنىڭ كولەمى ازىق-تۇلىك شىعاراتىن «مارەۆەن فۋد تيان-شان» جشس-نىڭ ءوندىرىس كولەمىنىڭ ارتتىرىلۋىنىڭ (2019 ج. – 3,2 مىڭ توننا ازىق-تۇلىك، 2020 ج. – 3,9 مىڭ توننا نەمەسە 120,4%), كونديتەرلىك ونىمدەردىڭ ءىرى ءوندىرۋشىسى «حاملە كومپاني لتد» كومپانياسىنىڭ اسسورتيمەنتى مەن ساتۋ نارىعىن كەڭەيتۋىنىڭ (2019 ج. – 3,5 مىڭ توننا، 2020 ج. – 4,3 مىڭ توننا نەمەسە 123,5%), «ازيا اگروفۋد» اق-نىڭ ۇن ءوندىرىسىن ۇلعايتۋىنىڭ (2019 ج. – 45,7 مىڭ توننا، 2020 ج. – 65,1 مىڭ توننا نەمەسە 142,4%) ەسەبىنەن قامتاماسىز ەتىلدى.
جالپى كولەمنىڭ ۇلعايۋىنا شىرىندار مەن الكوگولسىز سۋسىندار وندىرەتىن كاسىپورىندار دا ءوز ۇلەسىن قوستى. ولاردىڭ قاتارىندا «كوكا-كولا الماتى بوتتلەرس»، «RG Brands Kazakstan»، «گاللانز بوتلەرس» (2019 ج. – 193,6 ملن. ليتر، 2020 ج. – 240,2 ملن. ليتر نەمەسە 124,1%) كاسىپورىندارى بار.
«تگپك» جشس-نىڭ قولدانبالى شويىن ءوندىرۋ كولەمىن 8 ەسە ارتتىرۋى دا زور ءرول اتقاردى. ماسەلەن، 2019 جىلى كاسىپورىن 5,8 مىڭ توننا ءونىم شىعارسا، 2020 جىلى بۇل كورسەتكىش 46,7 مىڭ تونناعا جەتتى.
اتاپ وتسەك، كوروناۆيرۋس ينفەكتسياسىنىڭ الدىن الۋ مەن تارالۋىنا جول بەرمەۋ ماقساتىندا وبلىستىق باس مەملەكەتتىك سانيتارلىق دارىگەردىڭ قاۋلىسىنا سايكەس وڭىردەگى بارلىق كاسىپورىنداردا سانيتارلىق جانە الدىن الۋ شارالارى قاتاڭ ساقتالىپ، تۇراقتى باقىلاۋعا الىنعان. سونىمەن قاتار، الماتى قالاسىندا كارانتين ەنگىزىلۋىنە بايلانىستى وبلىس اكىمدىگىنىڭ قولداۋىمەن 30 كاسىپورىننىڭ 1 مىڭنان استام قىزمەتكەرى الماتى اگلومەراتسياسىنا كىرەتىن 3 اۋدان مەن قاپشاعاي قالاسىنا ورنالاستىرىلدى. ولاردىڭ قاتارىندا جۇيەقۇراۋشى جانە ءىرى «مارەۆەن فۋد تيان-شان»، «دجەي تي اي»، «فيليپپ مورريس قازاقستان»، «دانون بەركۋت»، «گاللانز بوتتلەرز»، «لۋكويل لۋبريكانتس»، «Kagazy Recycling»، «ەفەس قازاقستان»، «RG Brands»، «حاملە كومپاني لتد» جانە باسقا دا كاسىپورىندار بار.
وبلىس اكىمى ءباسپاسوز قىزمەتىنىڭ حابارلاۋىنشا، وبلىس اكىمىنىڭ تاپسىرماسىمەن وڭىردە مەديتسينالىق ماسكالار تىگۋ جولعا قويىلعان، بۇل ىسكە ايماقتىڭ كوپتەگەن كاسىپورىندارى تارتىلدى. «Dolche-Pharm» جشس فارماتسەۆتيكالىق كومپانياسىنىڭ ءوزى كۇن سايىن 150 مىڭنان استام مەديتسينالىق ماسكا شىعارۋدا. وعان قوسا 70 مىڭعا جۋىق ماسكانى ءوز قىزمەتكەرلەرى ءۇشىن جانە باسقا كاسىپورىنداردىڭ تاپسىرىستارىنا وراي «ۋنيۆەرسال»، «جاركەنت پوليپروپيلەن زاۋىتى»، «جكپز»، «TEXTIL MARKET»، «كوكا-كوللا الماتى بوتلەرس»، «التىن جۇلدىز» جشس-لارى، «CLOTWELL»، «زەتا» كومپانيالارى مەن باسقا دا شاعىن كاسىپورىندار تىگىپ وتىر.
"ادىرنا" ۇلتتىق پورتالى،
الماتى وبلىسى
